श्रीमती अनुराधा फाटक
कवितेचा उत्सव
☆ कुलुप ☆ श्रीमती अनुराधा फाटक ☆
आजी नावाचं एक कुलुप
असतं बहुतेक घरात
किल्लीही त्याची असते
सर्वांच्याच खिशात !
कुलुप उघडण्याचा
असतो सदाच हुरुप
घेण्यासारखे आजीचे
असतेच खूप खूप !
कधी लाडीक हट्टाने
तर कधी कौतुकाने
किल्ली फिरवली जाते
हवे नको घेतले जाते !
आजीजवळ मात्र नसते
तिच्याच कुलपाची किल्ली
मायापाशात हरवलेली आजी
मूग गिळून गप्पच बसते !
© श्रीमती अनुराधा फाटक
≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
