सुश्री नीलांबरी शिर्के
कवितेचा उत्सव
☆ आयुष्य फाटले तेंव्हा… ☆ सुश्री नीलांबरी शिर्के ☆
आयुष्य फाटले तेंव्हा
शब्दाने शिवित गेले
जोडून शब्द मी तेंव्हा
कविता करीत गेले
मुडपून दुखऱ्या भागा
हळूवार घातली टिप
प्रत्येक टाक्यामागे
मूरे अश्रू आपोआप
ते जिथे फाटले जादा
त्या कधी सांधले नाही
रफुच्या छान टाक्यांनी
मी केली हो चतुराई
ठिगळाच्या तुकड्यांनी मी
त्या कधी लपवीले नाही
..काढून त्वचेची साल
मी दुख: झाकले बाई.
आयुष्य वाटते आता
सुरेख तलमसे वस्त्र
आतुन टोचते काही
की तडजोडीचे अस्त्र
© सुश्री नीलांबरी शिर्के
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
