मराठी साहित्य – कवितेचा उत्सव ☆ चैत्रमास आला बाई…… ☆ प्रा. सौ. सुमती पवार ☆

☆ चैत्रमास आला बाई… ☆ प्रा. सौ. सुमती पवार ☆

☆

चैत्र मास आला बाई आला मोहोर घेऊन

आधी गेली पाने आता आला अंकूर लेवून..

*

सजलाय पर्णभार कोवळी ती पाने किती

सुंदर ती दिसतात हात, झाडावर हलवती…

*

लाल तांबूस पिवळी गर्द हिरवी ती छटा

मोहोराच्या हलवी हो चैत्र झाडावर बटा…

*

कैऱ्या डोलती डौलात गुलमोहोर फुलारला

छत्र लालीचे घेऊन पळस पांगाराही आला..

*

सणासुदीचा आनंद गुढी सुख पावित्र्याची

नांदी नवीन वर्षाची गोड प्रेम नि सौख्याची..

*

माणूस तो एक आहे हाच संदेश देऊ या

गुढी चैतन्याची हाती सण साजरा करू या….

☆

© प्रा.सौ.सुमती पवार