सौ. शुभदा भास्कर कुलकर्णी (विभावरी)
वाचताना वेचलेले
☆ आनंद विठुरायाचा… – कवयित्री : सौ. मनीषा अभ्यंकर ☆ प्रस्तुती सौ. शुभदा भा. कुलकर्णी (विभावरी) ☆
☆
आली ज्येष्ठ कृष्ण नवमी
गेला विठू आनंदूनी ।
माझा ज्ञाना निघे आज
आता अलंकापुरीतून ।।१।।
*
निवृत्ती सोपान आणि
मुक्ता चित्कलिका ।
संगे येतील घेऊन
नामा जना आणि एका ।।२।।
*
विसो गोरा बंका
संत गजानन चोखा ।
भक्त येतील घेऊन
साऱ्या संतांच्या पालख्या ।।३।।
*
संत मांदियाळी
आता येईल पंढरी ।
भक्त नाचतील
हरिनामाच्या गजरी ।।४।।
*
येता एकादशी ।
आता दक्षिण ती काशी ।
जाई फुलुनी भक्तांनी ।
देव बोले रखुमाईसी ।।५।।
*
राही माझी बाळे
आता येतील माहेरी ।
दुमदुमेल माझ्या
आता नावाने पंढरी ।।६।।
*
भक्त येतात चालत ।
मनीं दर्शनाचा हेत ।
संतांच्या पालख्या
खांद्यावरुनी वहात ।।७।।
*
नाही पावसाची पर्वा
नाही उन्हाची गणती ।
भूक तीही विसरून
भक्त मार्ग तो चालती ।।८।।
*
देई वस्त्रे नवी
आणि शेला तो पैठणी ।
कोणते दागिने
घालू राही अंगावरी ।।।९।।
*
नाथ सोन्याच्या ह्या माळा
आणि कंठा मोतियांचा ।
मुकुट मस्तकी
ठेवा कौस्तुभ रत्नांचा ।।१०।।
*
कंठामधे घाला
हिऱ्यामाणकांचे हार।
आणि कानामधे घाला
स्वामी कुंडले मकर ।।११।।
*
मग तुमचे रुपडे ।
अति दिसेल सुंदर ।
आल्या भक्तावरी घाला
तुम्ही शेल्याने पाखर ।।१२।।
*
प्रसाद वाटण्या
रांधू सांगा काय देवा ।
खीर, घावन घाटलं
की मिठाई नि मेवा ।।१३।।
*
उडे लगबग मग
राही आणि विठ्ठलाची ।
करिती तयारी दोघे
भक्त स्वागताची ।।१४।।
*
येता एकादशी
ठेवी हात निढळावर ।
जणु भक्ताचे दर्शन
घेण्या विठूची अधीर ।।१५।।
*
येता एकादशी
भक्त पोचती पंढरी ।
नाचती आनंदे
विठुनामाच्या गजरी ।।१६।।
*
झाली दर्शनाची बारी ।
भेटे भक्ता उरोउरी ।
भक्तही सुखावे
रूप पाहुनी अंतरी ।।१७।।
*
भक्ताच्या पायासी
लावी राही तेल प्रेमे ।
हळूवारपणे
हात विठूचा तो फिरे ।।१८।।
*
श्रम भक्तांचे ते मग
होऊनिया लुप्त ।
सांगता सोहळा होई
विठूच्या घरात ।।१९।।
*
आला दिवस काल्याचा ।
बसे भक्तांची पंगत ।
राही करीतसे नाना- ।
विध पक्वान्नांचा बेत ।।२०।।
*
लाडू जिलबी घीवर
आणि पुरणाच्या पोळ्या ।
शेवटी तो मिळे
दहीपोह्याचाही काला ।।२१।।
*
पार पडता सोहळा
आला वियोगाचा दिन ।
दुःख भक्तांचे अंतरी ।
मुख विठूचेही म्लान ।।२२।।
*
निरोप देण्यासी ।
देव येई वेशीप्रत ।
भक्त जाता दूरी
मुख लपवी शेल्यात ।।२३।।
*
भक्त जाईल रमून ।
राही फिरूनी संसारी ।
वाट पाहणे नशिबी ।
मम पुन्हा वर्षभरी ।।२४।।
*
एक दिसाचा आनंद ।
मज येत असे बळ ।
मग राही विटेवरी
सर्व सोसूनिया कळ ।।२५।।
☆
कवयित्री : सौ. मनीषा अभ्यंकर
प्रस्तुती : शुभदा भा. कुलकर्णी
कोथरूड-पुणे
मो.९५९५५५७९०८
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
