सुश्री दीप्ती कुलकर्णी
कवितेचा उत्सव
☆ हिरवाई… ☆ सुश्री दीप्ती कुलकर्णी ☆
☆
हिरवी शेते, हिरवे डोंगर, हिरवी ही वनराई
तुझ्या कृपेने आज पाहते
होऊ कशी उतराई ||
देण्याचा हा नित्य वसा रे
घेशी तू वरुणा
ग्रीष्मातील त्या उष्ण धरेची
पुरविशी तू करुणा ||
पृथ्वी माता हिरवा शालु,
लेते अंगावरी
फळा फुलांचे साज मढवुनी
गंधही दिगंतरी ||
गवतफुलांसह, वड, पिंपळ नि अबोली,
चाफा, जाई जलधारांच्या वर्षावाने
चिंब-चिंब होई ||
बळीराजासह प्राणीमात्रा
हर्ष मनी होई
घेण्या जीवन, देण्या जीवन
तटिनी झेप घेई ||
सृष्टीच्या या विविध रुपातुनी
मानव विस्मित होई
ईशकृपेची करणी सारी
शास्त्र अचंबित होई ||
भाग्य आज हे मला लाभले
दीप्ती ही गुण गाई
गाता-गाता, हिरवाई सह
मनी धन्य होई ||
☆
© सुश्री दीप्ती कोदंड कुलकर्णी
हैदराबाद.
भ्र.९५५२४४८४६१
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
