श्री स्वानंद कुलकर्णी
परिचय
श्री स्वानंद चिंतामणी कुलकर्णी.
शिक्षण – MSc Computer Science
साहित्यिक परिचय – साधारण इयत्ता १० वी पासून कविता लेखनाला सुरुवात झाली. कवितेच्या जगात जास्त रमलो. ललितलेखन, कथालेखन, चिंतनात्मक लेखन याचीही मुशाफिरी केली परंतु आतून ओढा नेहमी कवितेकडे, गीतरचनेकडे राहिला आहे. वृत्तबद्ध, छंदोबद्ध रचनांचा अभ्यास केल्यानंतर त्याची आवड निर्माण झाली. मुक्तछंद लिहिताना पण लयीत लिहिण्याची आवड कायम राहिली. कवितेत यमक अलंकार फार आवडता आहे. कवितेचे विषय निसर्ग, वैचारिक, चिंतनात्मक, प्रसंग चित्रणात्मक अशा प्रांतात वावरणारे जास्त आहेत. ग दि माडगूळकर, बा भ बोरकर, कुसुमाग्रज, गोविंदाग्रज, मंगेश पाडगावकर हे अत्यंत आवडते कवी आहेत. संत वा‌ङमय, अभंग यांची आवड आहे. कवींच्या, संताच्या रचनांचा व्यासंग आणि अभ्यास करणे आवडते. विविध काव्यसंमेलने आणि काव्यस्पर्धांमध्ये सहभाग घेतलेला आहे.
कवितेचा उत्सव
☆ उमेद… ☆ श्री स्वानंद कुलकर्णी ☆
☆
उमेद घेउन आकाशातुन सूर्य अंबरी आला
ज्योत त्याची शतवातींची उजळवते जगताला
त्याच्या कोमट स्पर्शाने उब तरुवेलींना मिळते
मुख किरणांचे गिरी तमांचे आत आपल्या गिळते
*
जाग कळ्यांना आली थोडी रंग वेलीस चढला
काकण भरल्या हातांमधून सडा अंगणी पडला
रांगोळीचे कण विस्कटले सुरेख रेखत नक्षी
आभाळाच्या प्रवासास वर उडले इवले पक्षी
*
घनमालांच्या घरास तोरण सोनसळीचे शोभे
उमलणाऱ्या फुलाफुलांचे अत्तर हवेस लागे
चराचराला प्राण लाभले भोवताली जग जागे
रंग ऋतूंचा गंध फुलांचा बाग मनाची मागे
*
प्रसन्न होउन फुले पाहती झाड हासते मौजी
उतरून जाती भिती काळजी खांद्यावरची ओझी
मौना आतुन सुचे प्रार्थना स्मित विसावे ओठी
सुखदुःखाची लाट पाहतो पैल उभारुन काठी
☆
© श्री स्वानंद कुलकर्णी
गाव – शिरोळ तालुका – शिरोळ जिल्हा – कोल्हापूर
≈ संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/ सुहास रघुनाथ पंडित / मंजुषा मुळे/ गौरी गाडेकर≈
हिमालयी फुलराणी… 
