Category: चित्रकाव्य

सुश्री नीलांबरी शिर्के

  चित्रकाव्य  

वात्सल्याचा गाव  सुश्री नीलांबरी शिर्के ☆

☆

(१)

घरी परतता संध्याकाळी

कोणी तरूणी लेकुरवाळी

मना पिलाची ओढ लागते

तटतटते अंगी काचोळी!!

*

पिलू भुकेले नजरेपुढती

पाय आपसूक वेगाने पडती

पिलू पाहता वक्षामधूनी

अमृत धारा बरसत जाती!!

*

  कवयित्री : नीलांबरी शिर्के

 

(२) 

गायीच्या न् आईच्या नेत्री

वात्सल्याचा वसतो गाव

बुडी मारूनी तिथे खोलवर

घ्यावा म्हणते त्याचा ठाव!!

*

नाक दाबुनी डोळे मिटले

आणि तळाशी गेले थेट

सदाचार अन संस्कृतीचे

ममताभरले काळीज बेट!!

*

त्या गावातुन फिरता जाणवे

निरामय विचारसहवास

पावन हळवी लहर भरवी

आपुलकीने विचार घास!!

*

तृप्तपणे माघारी फिरताना

मातृत्व वात्सल्य मिळे वसा

वसा घेऊन परतताना  

भरला जाई काळीज कसा!!

☆

© सुश्री नीलांबरी शिर्के

मो 8149144177

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. रेणुका धनंजय मार्डीकर

  चित्रकाव्य  

गरसोळीची श्वेतपाकळी… सौ.रेणुका धनंजय मार्डीकर ☆

(वृत्त : पादाकुलक, मात्रा : 8+8=16)

☆

तुझा नाजूक नखरा राजा 

जणू मोरणी चमचम नाकी

उमलली सान ती सूर्यफुले

बटव्यात तुझ्या पुंजी बाकी 

*

तुझ्या गुणाला तोडच नाही

बंदुकीचेच फूल शोभले

कंबरमोडी तव् नामाने

किती फायदे तुझे लाभले

*

एकदांडीत दगडी पाला

दिसे वेलीस वेढली पाने

असेे कुठेही रानोमाळी

कशी बहरली सजली राने

*

नाही केली कुठे लागवड 

नाही जपले तुझ्या फुलाला

माळरानात वाढवले रे

भगवंताने तुझ्या रुपाला

*

कुटकुटी तुला गुडघेमोळी

गरसोळीची श्वेत पाकळी

पिवळा गोंडा शोभून दिसे

किती नाजूक तुझी रे कळी

*

तुझ्या फुलाला गुंफत गेले

त्याचे गजरे सुंदर झाले

शब्द अलवार त्यात गोवता 

काव्यसाजात समोर आले

☆

© सौ.रेणुका धनंजय मार्डीकर

औसा.

मोबा. नं.  ८८५५९१७९१८

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

सुश्री वर्षा बालगोपाल

  चित्रकाव्य  

आनंदी जीवन…   सुश्री वर्षा बालगोपाल ☆

☆

कुठे जन्मलो यास महत्व न देणे 

आशावाद हृदयी धारून येणे 

कुठेही कसेही फुलारून जाणे 

हेच जाणसी तू आनंदी जगणे ||

*

आनंदी जगणे देई दुसऱ्या आनंद

अवचित हृदयी येतसे मकरंद

जरी पंकात त्या विलसे अरविंद

विष्णू लक्ष्मी येती रूपे मिलिंद||

*

रूपे मिलिंदाचा होई गुंजारव

भ्रमणातून लाभे दूजा जागी ठाव

विस्तार किर्तीचा लाभे त्यास गाव

जिद्दीने जगे त्यास मिळे आदर्शाचा वाव||

☆

© सुश्री वर्षा बालगोपाल

मो 9923400506

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

जरासं ‘ऑफलाईन’…  श्री आशिष  बिवलकर ☆

☆

७) चित्रकाव्य — 

“ जरासं ऑफलाईन.. “ कवी : आशिष बिवलकर

चित्रकाव्य : “ जरासं ‘ऑफलाईन’.. “.

कितीही चुका असल्या तरी,

पदरात घेत असते माय मराठी |

लिहिणाऱ्याच्या भावना जाणते 

सारं काही समजून घेत जगजेठी |

* 

शब्द जरी इंग्रजी असले तरी,

समजणारा समजून घेतो |

‘ध’ चा ‘मा’ न करता,

त्याच्या परी खपवून घेतो |

*

सर्व्हर जरी कनेक्ट नसला तरी,

सूचना माणसांना कनेक्ट ठेवते |

आधुनिक तंत्रज्ञानाच्या जगात,

तिच्या परी तरी परफेक्ट वाटते |

*

ऑनलाईनच्या दुनियेत,

थोडं ऑफ लाईन जगावं |

व्हरच्युअल झालेल्या जगात,

प्रत्यक्ष एकमेकांना भेटावं |

*

कितीही आधुनिक झालो तरी,

बांधिलकीची नाळ तूटू नये |

आपल्यापासून दुरावला गेलाय,

स्वप्नात देखील कुणाला वाटू नये |

©️ वास्तवरंग

☆

(चित्र सौजन्य – श्री आशिष बिवलकर) 

© श्री आशिष  बिवलकर

28/01/26

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री नीलांबरी शिर्के

  चित्रकाव्य  

हळदीकुंकू असेही  सुश्री नीलांबरी शिर्के ☆

☆

हळदकुंकू भाळी लेऊन

गवत हिरवे डोलू लागले

सुवासिनींचा मेळा जमला

गप्पाचे फड जणू रंगले

*

अल्पायुषी जरी आहे जगणे

देखणेपणातच दरवळणे

हिरव्या गालिचावर लोळत

सुंदर वाटे मना.. फूल होणे

☆

© सुश्री नीलांबरी शिर्के

मो 8149144177

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. रेणुका धनंजय मार्डीकर

  चित्रकाव्य  

मुग्धी देखण्या गुच्छात… सौ.रेणुका धनंजय मार्डीकर ☆

(अष्टाक्षरी)

☆

मन गेले वेलीपाशी

जुई बहरून आली

मधाळल्या श्रावणात

किती गोरी गोरी झाली

*

 तिच्या सुगंधाने मला 

 अशी भुरळ पाडली

 दव भरल्या पानात

 शुभ्र गणिका वेढली

*

कधी गजऱ्यात तिला 

गाठी गाठीत माळले

मुग्धी देखण्या गुच्छात 

तिच्यावर मी भाळले

*

किती नाजूक साजूक 

मुलायम पाकळीत 

सुगंधीत सांजवेळी

जुई चिमण्या कळीत

*

मोह घालीते आंबष्ठा

सूर्यकिरणाची ओढ 

बहरात पर्जन्याच्या 

जुई दिसतसे गोड

*

कुणी मगधी म्हणती 

कुणी उसीमल्लीगाई 

किती तरी नावे तुला

कादरमल्लीगे बाई

*

वैद्य बहुगुणी तू गं

अत्तराची नवलाई

पान फूल खोड मूळ

अनमोल वनराई

*

तुला ओंजळीत घेते

शब्द मोत्यांचे शिंपण

कवितेचे गोड देते

बहुमोल गं कोंदण

☆

© सौ.रेणुका धनंजय मार्डीकर

औसा.

मोबा. नं.  ८८५५९१७९१८

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

सुश्री ज्योत्स्ना तानवडे

  चित्रकाव्य  

– दुधावरची साय – ☆ सुश्री ज्योत्स्ना तानवडे ☆

☆

कोण मी? ओळखा पाहू 

डोळे झाकी आजोबांचे 

कोण बरं? कोण आहे?

बोल खोटे फसण्याचे ||

*

साखरेचे पोते गोड 

आवडते सगळ्यांचे 

ओढ लावी जीवा भारी 

असे सर्वस्व घराचे ||

*

आजी-आजोबा नातीचे 

मस्त रंगे रसायन 

घोडा घोडा करताना 

हृदयाचे सिंहासन ||

*

नाती संगे खेळताना 

देहभान हरपते 

आजोबांच्या जगण्याचे 

प्रयोजन ती ठरते || 

*

खेळ लुटूपुटीचा हा 

गाभा आनंदाचा असे 

डोळ्यांमध्ये पाणी अन 

ओठांवर गोड हसे ||

☆

© सौ.ज्योत्स्ना तानवडे

वारजे, पुणे.५८

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

घायाळ मी…  श्री आशिष  बिवलकर ☆

☆

घायाळ केलंस सखे,

नयन तुझे तलवार!

हृदयाला भिडलीस,

केलेस जुलमी वार!

 

कुंतल तुझे

रेशमी जाल!

गोरे गोरे

मऊ मऊ गाल!

 

किती सुंदर अशी,

बहारदार तू हसते!

हास्यात तुझ्या

शरद पौर्णिमा भासते!

 

सौंदर्यात तुझ्या,

पुरता मी बुडालो!

प्रेमात तुझ्या,

पार वेडावलो!

 

एकटक तुला,

पहावेसे वाटे!

ह्रदयात तुझ्या,

पत्ता माझा भेटे!

 

तुला पहात पहात लिहावी 

कविता की गझल!

अप्सरा जरी अवतरली,

तुझ्या पुढे काय तिची मजल!

 

तुझ्या वर्णनात

शब्द सुंदर होतात!

शृंगार रसात

कवितेत सजतात!

 

तुझ्या नावाने अखंडित,

श्वासांची गुंफलीय माळ!

मृत्यू जरी आला तरी,

थांबेल तो ही सर्वकाळ!

 

स्तुतीने सुखावलीस तू,

हरवून गेलीस काही काळ!

एव्हढ्या शिट्या दिल्यात मी ,

शिजली का ग माझी डाळ! 

☆

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री नीलांबरी शिर्के

  चित्रकाव्य  

सृष्टीचा आहेर  सुश्री नीलांबरी शिर्के ☆

☆

नाजुक हलकी

गिरकी घेऊन

तलम पाकळी

देठात स्थिर!!

फिकट गुलाबी

देखणे फुल

सृष्टीचा दृष्टीला

जणू आहेर!!

हात लावता

मलीन होईल

वाटतो मनाला

उगाच घोर!!

दुरून पाहू

पाहत राहू

फुलाचे सौंदर्य

मनोहर!!

☆

© सुश्री नीलांबरी शिर्के

मो 8149144177

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. रेणुका धनंजय मार्डीकर

  चित्रकाव्य  

गुलदाउदीस प्राची… सौ.रेणुका धनंजय मार्डीकर ☆

(अक्षरगणवृत्त : आनंदकंद – लगावली : गागालगा लगागा गागालगा लगागा) 

☆

आली पहाट वेळी उमलून ताटव्याने 

गुलदाउदीस प्राची सजवी पहा दवाने ||ध्रु ||

*

मेघास धुंद वेळी आली नशा निराळी

दव सांडल्या फुलांना प्रेमे पहा न्यहाळी

वारा खट्याळ जातो छेडून फूल पाने

गुलदाउदीस प्राची सजवी पहा दवाने ||१||

*

रंगात नाहलेली दिसते पहा दिवाणी

कुंदन म्हणू हिला की सोनार राज राणी 

वर्षा न् शरदमाला किती शोभली नव्याने

गुलदाउदीस प्राची सजवी पहा दवाने ||२||

*

गेला वसंत आता पावस ऋतू सुखावे

शेवंतिच्या सुखाने देवालये खुलावे

ती चंद्रमा ती तारा, कुंदन दिसे रुपाने 

गुलदाउदीस प्राची सजवी पहा दवाने ||३||

*

निलिमेस माळताना कुंतल पुन्हा हसावे 

अन् शब्द फूल माझे कवनातुनी दिसावे 

स्वरसाज मी दिल्यावर गाईन कौतुकाने

गुलदाउदीस प्राची सजवी पहा दवाने ||४||

☆

© सौ.रेणुका धनंजय मार्डीकर

औसा.

मोबा. नं.  ८८५५९१७९१८

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈