सुश्री प्रभा सोनवणे
कवितेच्या प्रदेशात # २९०
☆ पुरूष… ☆ सुश्री प्रभा सोनवणे ☆
☆
तू खरंच एक महान पुरूष आहेस,
मीच खूप यद्किंचित,
मी विचारला होता तुला,
तुझ्या सिगारेटचा ब्रँड,
तेव्हा तू म्हणालास,
“तसले कोणतेच,
नाद किंवा छंद नाहीत मला !”
असा तू स्वच्छ, सात्विक,
सद्गुणीच !
लोक म्हणतात,
तुला काहीच गरज नाही,आध्यात्माची ,
तू स्वतःच आध्यात्म आहेस,
इतका निष्कलंक!
तुझी कडवट भाषा,
पुरूषी अहंकार,
अनुभवूनही, मी मानलेच,
तुझे महानपण,
पुरूषोत्तमच तू !
पण मी खूप वेगळी आहे,
तुझ्यापेक्षा—
सर्वसामान्य!
म्हणून नाहीच पोहचू शकले,
मी कधीच….
तुझ्या उंचीपर्यंत!!
इतकेच विधिलिखित दोघांचेही !
☆
© प्रभा सोनवणे
संपर्क – “सोनवणे हाऊस”, ३४८ सोमवार
पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- sonawane.prabha@gmail.com
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
