सौ. गौरी सुभाष गाडेकर
जीवनरंग 
☆ सात कुलुपे आणि चावी – श्री कमलेश भारतीय ☆ (भावानुवाद) सौ. गौरी सुभाष गाडेकर ☆
श्री कमलेश भारतीय
मूळ हिंदी कथा 👉 “सात ताले और चाबी”
“ए मुली, तू कुठे आहेस?”
“सात कुलुपांत बंद.”
“काय? कुठली कुलुपं?”
“पहिलं कुलूप – आईच्या गर्भावरचं. मुश्किलीने ते तोडून जीवन मिळवलं.”
“दुसरं?”
“भावाबरोबरचं प्रेमाचं कुलूप. मुलगा लाडका. आणि मुलगी म्हणजे आईवडिलांची, कुटुंबाची विवशता.”
“तिसरं कुलूप?”
“शिक्षणाच्या दारांवरची कुलुपं -माझ्यासाठी.”
“पुढे?”
“माझ्या रंगीबेरंगी, सुंदरसुंदर कपड्यांवरही कुलुपं.हे नाही घालायचं, ते नाही नेसायचं. घरंदाज मुलींसारखी राहत जा. असे कपडे घालतात मुली?”
“आणि मग?”
“समाजाच्या नजरांचे पहारे. चालते कशी? जाते कुठे?असं का करते? तसं का करते?”
“आणखी?”
“गायीसारखं ढकलून लावलेलं लग्न. माझ्या पसंतीवर कुलुपंच कुलुपं. चुपचाप सांगतील, त्याच्याशी लग्न कर.आणि आमचा पिच्छा सोड.”
“अजून?”
“पत्नी झाल्यावरही कुलुपंच कुलुपं. हे नको करूस. ते नको करूस. माझे पंख व माझ्या स्वप्नांना कुलुपं. कोणतीही झेप घेऊ शकत नाही. बंधनंच बंधनं.”
“आता आहेस कुठे?”
“सात कुलुपात बंद.”
“ही कुलुपं लावली कोणी?”
“सांगितलं ना.ज्याला ज्याला शक्य झालं, त्याने त्याने लावली.”
“उघडणार कोण?”
“मीच उघडणार. दुसरं कोण?”
☆ ☆ ☆ ☆ ☆
मूळ हिंदी कथा – “सात ताले और चाबी” – मूळ लेखक – श्री कमलेश भारतीय
भावानुवाद – सौ. गौरी सुभाष गाडेकर
संपर्क – 1/602, कैरव, जी. ई. लिंक्स, राम मंदिर रोड, गोरेगाव (पश्चिम), मुंबई 400104.
फोन नं. 9820206306
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
