श्रीशैल चौगुले
कवितेचा उत्सव
☆ असा हेमंत… ☆ श्रीशैल चौगुले ☆
☆
मोती ढळतात तेंव्हा
माती अश्रुनी भिजते
पान-पान पापण्यांनी
किती धरती सजते.
*
हळूच थंडी हिवाळा
कोट्यात पाखरु शांत
सकाळ कशी हसरी
देहा हुडहुडी प्रांत.
*
चौफेर हरिते चिंब
धुक्यात सूर्य झाकून
अजून पहाट भासे
माथ्यावर तेज बिंब.
*
आकडून पुन्हा ताजे
ओलेती पाकळी फूल
स्वप्नांचे स्वर्ग भुवरी
हेमंत मानवा भुल.
*
क्वचित कोकिळी साद
ओहोळे पैंजणी गाणे
निरभ्र शुभ्र नभात
पंख वा-यास दिवाणे.
*
हटकून आठवणी
पुन्हा बिलगून जीवा
मिठीत घ्यावे तारुण्य
विझण्या आधी सांजवा.
☆
© श्रीशैल चौगुले
मो. ९६७३०१२०९०.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
