शालिनी जोशी
कवितेचा उत्सव
☆ भावरंग ☆ शालिनी जोशी ☆
सौंदर्याचा साज लेवून बहरतात रोज नवी फुले
उत्सवाच्या गंधात तो परमेश्वर रंगभाव उधळे
सुवासिक कुंद मदनबाण मोगरा
शुद्ध पावित्र्य स्वच्छतेचा रंग पांढरा
जपापुष्प सजे लालभडक रंगात
प्रेम उत्साह धैर्य आणि राग सांगत
पिवळ्या धमक रंगी शेवंती देखणी
आशा आनंद सात्विक वृत्तीची ही खाणी
अबोलीलाही कौतुक केशरी रंगाचे
मौनव्रती प्रतीक ऊर्जा आणि त्यागाचे
गगननील तो गोकर्णीचा आवडता
सांगे तोच गुढता स्थिरता व शांतता
गुलाबी गुलाब गालावरच फुलतो
शृंगारासह कोमल निरागसता तो
शोभा खरी फुलांना पानांच्या मखरात
हरित वर्णात सृजनाची सुरुवात
© शालिनी जोशी
संपर्क – फ्लेट न .3 .राधाप्रिया टेरेसेस, समर्थपथ, प्रतिज्ञा मंगल कार्यालयाजवळ, कर्वेनगर, पुणे, 411052.
मोबाईल नं.—9850909383
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ.मंजुषा मुळे/सौ.गौरी गाडेकर≈
