मराठी साहित्य – कवितेचा उत्सव ☆ कवयित्री शांताबाई शेळके विशेषांक – अशा होत्या शांताबाई !! ☆ सौ.ज्योत्स्ना तानवडे

कवयित्री शांताबाई शेळके विशेषांक

सौ. ज्योत्स्ना तानवडे

 कवितेचा उत्सव 

☆ कवयित्री शांताबाई शेळके विशेषांक – अशा होत्या शांताबाई !! ☆ सौ.ज्योत्स्ना तानवडे ☆ 

जणू वडीलधारी आक्का किंवा ताई

अशा होत्या शांताबाई !!

दिसणे त्यांचे राजसवाणे

हसणे त्यांचे लोभसवाणे

काव्या मधले स्निग्ध चांदणे

मुखावरती जणू विलसणे

त्यांची गाणी,त्यांची वाणी घंटा किणकिणत जाई

अशा होत्या शांताबाई !!

ती बालगीते, ती लावणी

ती प्रेमगीते, ती विराणी

विचार, प्रज्ञा,सौंदर्य, माधुरी

यांची सुरेल हातमिळवणी 

या साऱ्यांचा चित्ताकर्षक काव्यौघ खळाळत जाई

अशा होत्या शांताबाई !!

कथा-कादंबरी, गीते-कविता

ललित लेख,अनुवाद समीक्षा

प्राध्यापिका,बालसाहित्यिका

भावसंपन्न साहित्य,रसिकता

एका बिंबातून असंख्य प्रतिमा उमटत जाई

अशा होत्या शांताबाई !!

विरहाला या नाव नसे

अंतरीचा हा भाव असे

या हृदयीचे त्या हृदयासी

भावबंध जुळाले जसे

मुकुट मस्तकी ल्याली शारदा ‘शांत-रत्न’ झळाळून जाई

अशा होत्या शांताबाई

अशा होत्या शांताबाई!!

© सौ. ज्योत्स्ना तानवडे

वारजे, पुणे.५८

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈