कवितेचा उत्सव
☆ पक्षी ☆ श्री हरिश्चंद्र कोठावदे ☆
पंख वेगळे रंग वेगळे
या पक्ष्यांचे ढंग वेगळे
झेप चिऊची चिमणी चिमणी
गरुडाचे आभाळ वेगळे !
पाझरणाऱ्या मेघासाठी
सदैव चातक आसुसलेला
परी प्राशण्या टिपुर चांदणे
चकोर कोणी तहानलेला !
इंद्रधनूचे रंग पाखरां
पण एखादा कोकिळ शापित
दिव्य सुरांची करी साधना
दुःख आपुले काळे झाकित !
हिरव्या रानी धो धो धारा
थुइथुइ चाले मयूरनर्तन
कुणा दिसावा रम्य पिसारा
विरुप पदांचे कुणास दर्शन !
कुणी अंगणी टिपती दाणे
कुणास लाभे मोतीचारा
कुणा नभांगण कुणा पिंजरा
दैवगतीचा खेळच न्यारा !
ज्या पक्ष्यांना नसती घरटी
त्यांचे जगणे दुसरे मरणे
कवेत घेई गगन तयांना
रुजवी कंठी अभाळगाणे !
© श्री हरिश्चंद्र कोठावदे
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
