मराठी साहित्य – कविता ☆ साप्ताहिक स्तम्भ # 105 – वाट ☆ कविराज विजय यशवंत सातपुते

कविराज विजय यशवंत सातपुते

साप्ताहिक स्तम्भ # 105 – विजय साहित्य

☆ वाट ☆ कविराज विजय यशवंत सातपुते ☆

चंद्र लाजरा  पहा, काय काय बोलतो

मेघ कुंतलातूनी, शब्द शब्द डोलतो…  ||धृ.||

सांग तू मनातले, कोण आवडे तुला

छेड प्रीत मारवा, हास लाजऱ्या फुला

हात दे हातात तू, पाय वाट सोडतो… ||१||

दोन चंद्र भोवती, सांग कोण देखणा

एक सांगतो मना, प्रेम पुष्प वेचना

ये अशी समीप तू, भाव रंग वाचतो… ||२||

कला, कळा अंतरी, भावती तुला मला

शब्द श्वास जाहला, दाटला पुन्हा गळा

पौर्णिमा मनातली, प्रीत स्पर्श जाणतो..||३||

रात राणी सोबती,देई साक्ष चांदवा

भावना मनातल्या, प्रेम रंगी नांदवा

भेट तू पुन्हा पुन्हा, मीच वाट पाहतो..||४||

© कविराज विजय यशवंत सातपुते