सौ.अश्विनी कुलकर्णी
मनमंजुषेतून
☆ ‘ईसीजी ‘ आयुष्याचा ☆ सौ.अश्विनी कुलकर्णी ☆
☆
आयुष्य एकच,
पण…
रोज वेगवेगळे नवे निकाल देत राहतं ,
हे कस काय बर?
असे प्रश्न….
या निकालांची,
परीक्षा केव्हा दिली होती ?
कधी आठवतं,कधी नाही…
तेव्हा प्रश्नपत्रिका समोर आल्या की,
काही वाटायच्या अगदी सोप्या,
तर काही परत परत प्रश्न वाचत,
त्यावर नजर फिरवत ठेवणाऱ्या ….
गोंधळात टाकणाऱ्या…
आयुष्यातील प्रश्नांची उत्तर,
शोधताना…..ती,
शांत राहून, व्यक्त होऊन ,कृतीतून,संवादातून,
संघर्षातून, आनंदातून, दुःखातून लिहिली गेली…
आयुष्यावर!
डोळे मिटून स्तब्ध पडताच
आपल्या आयुष्यातील हालचालींची मोजमापं
दिसू लागली…
मधूनच थोडस तिरकस नजरेने,
जस ईसिजी मशीनकडे पाहतो
तस भूतकाळात पाहिला जीवनाचा ईसीजी…
अनेक डोंगर दऱ्याच दिसल्या…
त्या पार करण्याच्या प्रयत्नात मी,
कधीतरी काहीकाळ सरळ रेषांनी,
चकवाही दिला होता…
गात्र खचली असली तरी,
मन त्यांना प्रत्येक वेळी उठवायचं…
वेळी अवेळी मिळालेले, हेच ते निकाल…
शेजारच्या त्या मशीनमध्ये
होत असते जीवनाच्या ईसीजी ची नोंद..
अजूनही सुरू आहे ते मशीन,
सुरूच राहणार…
पण आता भीती वाटत नाही मशीनची…
मशीनने दऱ्या डोंगर दाखवले तरी,
मन शांत, शाबूत ,भक्कम आहे!
☆
© सौ अश्विनी कुलकर्णी
मानसतज्ञ, सांगली (महाराष्ट्र)
मो – 9421225491 Email – asharticles831@gmail.com
≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
