मराठी साहित्य – विविधा ☆ संवेदनशीलता… ☆ श्री गुरुनाथ चंद्रकांत ताम्हणकर ☆

श्री गुरुनाथ चंद्रकांत ताम्हणकर

🌸 विविधा 🌸

☆ संवेदनशीलता… ☆ श्री गुरुनाथ चंद्रकांत ताम्हणकर ☆

मे महिन्याची सुट्टी संपत आली होती. नवीन वर्षाची शाळा आता सुरू होणार होती. काही मुले शाळेत जाण्यासाठी आनंदली होती, तर काही मुले आता खेळायला, उनाडक्या करायला मिळणार नाही म्हणून हिरमुसली झाली होती. तरीसुद्धा नवीन वर्ष, नवा वर्ग, नवे सोबती मिळणार म्हणून प्रत्येकाच्या मनात एक उत्सुकता होती.

अजय एका गावातील शाळेत शिकत होता. गावातील शाळा चौथीपर्यंतच असल्यामुळे त्याला आता शहरातील शाळेमध्ये जावे लागणार होते. तो सुद्धा शाळा सुरू होण्याची आतुरतेने वाट पाहत होता. नवीन शाळेतील वातावरण कसे असेल, मित्र कसे वागतील, नवीन गुरुजी व बाई आपल्याशी कशाप्रकारे जुळवून घेतील, याविषयी त्याच्या मनात अनेक विचार येत होते. गावात राहिल्यामुळे त्याच्या वागण्यात, बोलण्यात व राहणीमानातही थोडासा गावंढळपणा होता. तरीसुद्धा त्याच्याकडे खेळाचे व चित्रकलेचे उत्तम कौशल्य होते. गावातील शाळेच्या गुरुजींचा तो लाडका विद्यार्थी होता. अनेक चित्रकला स्पर्धेमध्ये व खेळण्याच्या स्पर्धेत त्याने बक्षीसे मिळवली होती. त्याच्याकडील कौशल्ये शहरातील शाळेतही अशीच विकसित व्हावीत असे त्याच्या गुरुजींना मनोमन वाटत होते.

जून महिना उजाडला. अजयच्या वडिलांनी शहरातील आदर्श विद्यालयात अजयला प्रवेश घेतला. या शाळेतील अनेक मुले शहरी संस्कृतीमध्ये वाढलेली होती. अजयला ही मुले चिडवू लागली. त्याला भाषेवरून, राहणीमानावरून हसू लागली. मात्र अजयने त्याकडे फारसे लक्ष दिले नाही. तो नियमितपणे शाळेत जायचा. मन लावून अभ्यास करायचा. शाळेतील सर्व उपक्रमांमध्ये उत्साहाने सहभागी होवू लागला. अल्पावधीतच तो या शाळेतीलही गुरुजींचा आवडता विद्यार्थी बनला.

स्वातंत्र्य दिनानिमित्त शाळेमध्ये चित्रकला स्पर्धेचे आयोजन करण्यात आले होते. अजयच्या वर्गातील तसेच शाळेतील बऱ्याच मुलांनी यात सहभाग घेतला होता. स्पर्धेदिवशी अजयने मन लावून चित्र काढले. आकर्षक रंगसंगतीने चित्र सुबक बनविले. इतर मुलांना त्याच्याइतके सुंदर चित्र काढायला जमले नव्हते. नेहमी त्याला हसणारी चिडविणारी मुले आज मात्र कौतुकाने त्याचे चित्र न्याहाळत होती. स्पर्धा संपल्यावर गुरुजींनी सर्वांची चित्रे गोळा केली. काही वेळाने स्पर्धेचा निकाल जाहीर करण्यात आला. अर्थातच अजयचा शाळेमध्ये प्रथम क्रमांक आला होता. अजयला खूप आनंद झाला. त्याचबरोबर अजयमुळे आपल्या वर्गालासुद्धा बक्षीस मिळाल्याचा आनंद इतर मुलांना झाला. सर्व मित्रांनी अजयचे कौतुक केले. “आजपासून आम्ही तुला चिडवणार नाही, तुझ्याबरोबर पक्की मैत्री करणार, ” असे प्रत्येकाने अजयला सांगितले. अजयने नम्रपणाने सर्वांचे कौतुक स्विकारले.

वर्गशिक्षक वर्गात आले. वर्गातील मुलांमध्ये झालेला बदल व मुलांना झालेला आनंद पाहून त्यांनाही समाधान वाटले. ते म्हणाले, “पाहिलेत विद्यार्थी मित्रांनो, प्रत्येकाजवळ काही ना काही कौशल्य हे असतेच. कोण अभ्यासात हुशार असतो; तर कोणाजवळ इतर कौशल्ये असतात. प्रत्येकाने एकमेकांचा आदर करायला शिकले पाहिजे. एकमेकांविषयी संवेदनशील असले पाहिजे.”

© श्री गुरुनाथ चंद्रकांत ताम्हणकर

सदस्य, अखिल भारतीय साने गुरुजी कथामाला मालवण

पत्ता – मु. बागायत, पो. माळगाव, ता. मालवण, जि. सिंधुदुर्ग. 416606

संपर्क – 9420738375

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈