मराठी साहित्य – कवितेचा उत्सव ☆ देव हृदयात आहे… ☆ प्रा. सौ. सुमती पवार ☆

☆ देव हृदयात आहे… ☆ प्रा. सौ. सुमती पवार ☆

☆

देव हृदयात आहे, वेड्या मना शोध, पाहे

देव मनात तनात नसानसात तो राहे..

देव हृदयात आहे…

*

श्वास चालतो चालतो, देव जाताच थांबतो

हृदयाचा एक ठोका देव आहे त्यात चोखा

देव अनंत अनंत देवा वाचून आहे काय?

देव हृदयात आहे..

*

देव श्रीमंतीचे वाण, देव शेतातले धान

बीज अंकुरत नाही नसे देव तया ठायी

देव म्हणजे चैतन्य देव जीवातला प्राण…

देव हृदयात आहे…

*

जीवाशिवाचे मिलन आहे विश्वाचे चलन

एकरूप एकप्राण माणसा तू जाण जाण

देव नाही अशी जागा मना शोघून तू पाहे..

देव हृदयात आहे..

*

देव विश्वाचे कोंदण दिले माणसा आंदण

देव बिल्लोरी आरसा त्यात तुमचाच ठसा

देव पहावा स्वत:त हृदयाच्या रांजणात

मनी आणता देवाने सारे विलयात जाये..

देव हृदयात आहे…

☆

© प्रा.सौ.सुमती पवार