Marathi Kavita
नीलांबरी शिर्के
चित्रकाव्य
☆ अशीही प्रचिती … ☆ नीलांबरी शिर्के ☆
☆
इवल्या इवल्या पोरांनाही
कळू लागलंय आता
फूल तिचा माईक झाला
स्टॅन्डसह पुढे येता!!
*
टक टक करून खात्री
करून घेतेय ध्वनीची
आजू बाजूचेच शिकती पोरं
प्रचिती येते इथे त्याची!!
☆
© सुश्री नीलांबरी शिर्के
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित /मंजुषा मुळे/गौरी गाडेकर≈
स्वाती विकास गाडेकर
कवितेचा उत्सव
☆ आपली मुंबई... ☆ स्वाती विकास गाडेकर ☆
☆
ही मुंबई, आम्हा सर्वांच्या जीवाभावाची..
सगे-सोयरे मित्र परिवार, सर्वांच्याच लाडाची!!
*
मुंबई आजची, आणिक कालची..
तशी वेगळी, पण सर्वांच्याच प्रेमाची!!
*
राजी खुशीने, नांदती सखेसाबती..
जीवाला जीव देणे, हीच मुंबईकरांची ख्याती!!
*
नाही झोपत मुंबई कधीही..
अशी महती असे, जगात अत्रतत्र सर्वत्रही!!
*
राहती खोपट्यात-झोपडीत आनंदाने..
तशीच राहती, बिल्डिंग अन् बंगल्यात सुखाने!!
*
समुद्र असे, तिची अस्सल शान..
ट्रॅफिक जॅम चा, मुंबईकर सदा गुलाम!!
*
लोकल ट्रेन, असे तिची जीवनवाहिनी..
सदा तत्पर असे, सर्वांसाठी मान उंचाऊनी!!
*
सजलेली ही मायानगरी नटनट्यांनी..
आर्थिक उद्योगाची, नावाजलेली राजधानी!!
*
इतका मुंबईचा पसारा मोठा..
चारही टोके कुणीही सहज गाठा!!
☆
© स्वाती विकास गाडेकर
ए१०२, गगनगिरी सोसायटी, सेक्टर १७, वाशी, नवी मुंबई, ४००७०३ मो ९८३३७००५७१
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
कविराज विजय यशवंत सातपुते
कवितेचा उत्सव # २९८ – विजय साहित्य
☆ मला तुझ्यात शोध तू….! ☆ कविराज विजय यशवंत सातपुते ☆
(वृत्त कलिंदनंदिनी.)
☆
चुकेन मी, तरी पुन्हा, वसेन माणसात मी
मला तुझ्यात शोध तू, दिसेन काळजात मी. . . . !
*
मनास सागणे नको, जपावयास गोडवा
हसून गोड बोल तू, फसेन आरशात मी. . . . !
*
उगाच फूल लाजले , तुला उन्हात पाहता
पहा जरा स्वतःकडे, असेन त्या फुलात मी . . . !
*
मनामनात होतसे , क्षणाक्षणात कालवा
हवेत थांब मोकळ्या , घुसेन कुंतलात मी. . . !
*
निघून दूर चालली, प्रवास दूरचा जरी
अबोल प्रीत छेड तू, शिरेन अंतरात मी
*
खुशाल वाट चाल तू, चुकू नको नव्या पथा
नसेन सोबतीस मी, बसेन आठवात मी. . . !
*
विशाल त्या पथावरी, जपून टाक पावले
नसेन मी तुझा जरी, उरेन आसवात मी. . . . !
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री राजकुमार दत्तात्रय कवठेकर
कवितेचा उत्सव
☆ ध्यास… ☆ श्री राजकुमार कवठेकर ☆
☆
घडुन घडत नाही सर्व ही कष्ट वाया
झिजत शिणत राही व्यर्थ ही नित्य काया
फिरुन परत लागे यावया; बंद सारे
बुडवत हसणारे भेटलेले किनारे
*
फळत फुलत नाही स्वप्न.. आशा मनीची
छळत.. सलत राही धार ही श्रावणाची
टळुन टळत नाही दैव हे दु:खदायी
निसटुन पळण्याची जन्मत: सोय नाही
*
अवजड दिवसांचे घेऊनी नित्य ओझे
कण्हत.. थकत चाले, धापती श्वास माझे
हरतच जगण्याचे चालले खेळ सारे
मरणहि हुलकावी, वाकुल्या दावणारे
*
तरिपण विजयाचा सोडला ध्यास नाही
अवखळ जगण्याची सोडली कास नाही
☆
© श्री राजकुमार दत्तात्रय कवठेकर
कवी / गझलकार
संपर्क : ओंकार अपार्टमेंट, डी बिल्डिंग, शनिवार पेठ, आशा टाकिज जवळ, मिरज मो ९४२११०५८१३
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री प्रमोद वामन वर्तक
चित्रकाव्य
सुखी निद्रा! श्री प्रमोद वामन वर्तक ☆
☆
गाढ झोप तुझी माझी
‘त्यानेच’ नशिबी लिहिली,
जरी होतसे उकाड्याने
साऱ्या अंगाची काहीली !
*
येईल कशी आठवण
उदरातल्या आगडोंबाची,
भरतो स्वप्नातच खळगी
भाकर तुकड्याने पोटाची !
*
जगूया उद्याच्या आशेवर
मिळावे कोरड्याचे घास,
जगावे तर लागेल दोघां
असेपर्यंत शरीरात श्वास !
असेपर्यंत शरीरात श्वास !
(चित्रकार – अनिल खरे, मिनिआपोलीस, USA)
☆
© प्रमोद वामन वर्तक
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610
मो – 9892561086 ई-मेल – pradnyavartak3@gmail.com
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
वंदना अशोक हुळबत्ते
कवितेचा उत्सव
☆ महागाई… ☆ वंदना अशोक हुळबत्ते ☆
☆
पाहता पाहता
पेट्रोल, डिझेल वाढले
महागाईचे भूत उरावर बसले
खर्चाचा ताळमेळ बसेना
कारभार कसा चलवावा कळेना ?
झाली नोकरीत कपात
बसली लाथ कंबरड्यात
नाही सरकार जगू देत
नाही आई ती मरू देत
दात टोकरून पोट कधी भरतं ?
जगण्याच कोड अधिक बिकट होत
भाजीला मिळते तेल चमचाभर
खमंग फोडणीच स्वप्न उधारीवर
आधीच मान टाकली शाळूने
जेवणाशी कट्टी केली भाकरीने
दूधाने पण गाठली शंभरी
मुलेबाळे भुकेने तळमळली
भेटच होत नाही हातातोंडाची
सारखी गाठ पडते महागाईची
नाही धरला मोह श्रीमंतीचा
नाही धरला मोह पर्यटनाचा
नाही धरला मोह सोन्याचा
तरी
बट्ट्याबोळ झाला संसाराचा
☆
© वंदना अशोक हुळबत्ते
मो.९६५७४९०८९२
सांगली
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित /मंजुषा मुळे/गौरी गाडेकर≈
रेणुका धनंजय मार्डीकर
चित्रकाव्य
रिंगणी भुईरिंगणी… रेणुका धनंजय मार्डीकर ☆
(भावगीत: वर्ण संख्या १६ यती ८ व्या अक्षरावर)
☆
शुभ्रखणी जांभूळली अवनीच्या गं अंगणी
काटेदार जाळी तुझी रिंगणी भुईरिंगणी ||ध्रु||
*
नागमोडी चाल तुझी खोडावर काटेकुटे
पानावर हिरव्याशा देखणी कलिका फुटे
शुभ्रकांती मनमोही भासते जणू चांदणी
काटेदार जाळी तुझी रिंगणी भुईरिंगणी ||१||
*
फुले जांभळी पांढरी कनकाचा वर गोंडा
देखण्याशा रुपावर मधमाशांचा गं लोंढा
तुला चिचुर्डी म्हणती कुणी डोर्ली भोरिंगणी
काटेदार जाळी तुझी रिंगणी भुईरिंगणी ||२||
*
अनेक रूपात तुझी नावे वेग वेगळाली
फुलाफळांसह फांदी बहराला पहा आली
वैद्य तू बहुगुणी पान, फूल, खोड, चणी
काटेदार जाळी तुझी रिंगणी भुईरिंगणी ||३||
*
कतेली कताई आणि निदिग्धिका, कंटकारी
नागमोडी चाल तुझी रानीवनी दिसणारी
करतात सारे तुझी भाजी, आमटी, चटणी
काटेदार जाळी तुझी रिंगणी भुईरिंगणी ||४||
*
पावसात बहरते कटेरी तू कंटकारी
काटे रिंगणी गं बाई नावे तुझी किती सारी
रानरिंगणी म्हणती तुला गं मोतीरिंगणी
काटेदार जाळी तुझी रिंगणी भुईरिंगणी ||५||
☆
© रेणुका धनंजय मार्डीकर
औसा.
मोबा. नं. ८८५५९१७९१८
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
प्रभा सोनवणे
कवितेच्या प्रदेशात # ३१८
☆ घर… ☆ प्रभा सोनवणे ☆
☆
घरातली सगळीच घड्याळे
बंद पडली,
त्यांची टिकटिक ऐकू येत नाही!
बाहेर वाहनांची वर्दळ!
सवयीचे आवाज, हाॅर्नस्…
रिक्षा,बस, अँब्युलन्स…!!
सणावारी डी.जे.चं ध्वनिप्रदूषण!
आतल्या जगापेक्षा खूप वेगळं
बाहेरचं जग !
बाहेरच्या कोलाहलाने
काहीच बिघडत नाही,
आतल्या शांततेचं!
किती मूकं झालंय घर…
तुझ्या नसण्याने!
तू असताना—-
घड्याळे कधीच बंद
पडायची नाहीत,
इतका वेळ!
सदा टिकटिकत राहायची!
जिवंत असल्यासारखी!!!
कालचक्र थाबलंय जणू,
माझ्यापुरतं!
☆
© प्रभा सोनवणे
संपर्क – “सोनवणे हाऊस”, ३४८ सोमवार
पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- sonawane.prabha@gmail.com
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित / मंजुषा मुळे/ गौरी गाडेकर≈
श्री शरद कुलकर्णी
कवितेचा उत्सव
☆ गाणे… ☆ श्री शरद कुलकर्णी ☆
☆
गाणे जे ह्रदयातून
मग कंठातून
आणि ओठातून येते.
देहातून देहाचे होते.
देह गाण्याचे देहभान विसरते.
रक्तातून शब्दशब्द वाहते.
नि:शब्द करते
कधीकधी नीरवतेचे आक्रोश होते.
संयमाचे काठ मनाचे सांभाळीत
धीर होउन नदीच होते.
देहातून, रक्तातून, मनातून
पापणी पाशी थेंब होउन येते.
शहाणे होउन मग ते
बंद डोळ्यात राहते.
गाणे हे असेच असावे
गाणे हे असेच असते.
☆
© श्री शरद कुलकर्णी
मिरज
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # ३३१
☆ सुखाच्या सरी… ☆ श्री अशोक श्रीपाद भांबुरे ☆
☆
सुखाच्या सरी झेलता येत होत्या
मला चांदण्या माळता येत होत्या
*
सुखाशीन माहेर होते तिचेही
घरी सोंगट्या खेळता येत होत्या
*
झग्यासारखी वेशभूषा फिराया
घरी पैठण्या नेसता येत होत्या
*
धुरा वाहिलेली गुरूंनींच माझी
कथा त्यामुळे वाचता येत होत्या
*
सदाचार माझ्या सभोवार कायम
म्हणूनच शिव्या टाळता येत होत्या
*
नसो ओढ ही शिक्षणाची तरीही
इथे बघ मुली छेटता येत होत्या
*
घराभोवताली असे फक्त लादी
बिया ना कुठे लावता येत होत्या
☆
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
