Marathi Kavita
कवितेचा उत्सव
☆ रक्षाबंधन… ☆ सौ. मुग्धा कानिटकर ☆
*
प्रेमळ, सद्गुणी माझे गं भाऊ
नेत्रनिरांजने त्यांचं औक्षण करू
*
जगन्मित्र, उद्योगी, अन् कार्यतत्पर
उभे सदा राहती पाठिशी खंबीर
*
आपापल्या क्षेत्रात भारी निपुण
छंदात लाभो त्यांना नवं संजीवन
*
निरामय आरोग्य दीर्घायुष्य लाभावे.
बहिणींना भावांचे प्रेम उदंड मिळावे …
*
© सौ. मुग्धा कानिटकर
सांगली
फोन 9403726078
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री सुजित कदम
कवितेचा उत्सव
☆ सुजित साहित्य # 121 – पाऊस… ☆
तुझ्या माझ्यातला पाऊस
आता पहिल्यासारखा
राहिला नाही..
तुझ्या सोबत जसा
पावसात भिजायचो ना
तसं पावसात भिजण होत नाही
आता फक्त मी पाऊस
नजरेत साठवतो…
आणि तो ही
तुझी आठवण आली की
आपसुकच गालावर ओघळतो..
तुझं ही काहीसं
असंच होत असेल
खात्री आहे मला
तुझ्याही गालावर नकळत
का होईना
पाऊस ओघळत असेल…!
© सुजित कदम
संपर्क – 117, विठ्ठलवाडी जकात नाका, सिंहगढ़ रोड,पुणे 30
मो. 7276282626
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ.मंजुषा आफळे
कवितेचा उत्सव
☆ गान मैफिल..सप्तक ☆ सौ. मंजुषा आफळे ☆
असे सूर जुळले
दरबारी सात
तृप्तता येई
अंतरात
ऐकता
शब्द
जे.
असे सूर जुळले
रुजले मनात
अजरामर
रचनेत
भावार्थ
थोर
तो.
असे सूर जुळले
रसिक रंगले
आळवण्यात
हरपले
भाग्याचे,
क्षण
ते.
© सौ.मंजुषा सुधीर आफळे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
चित्रकाव्य
– चलावे आता घरी – ☆ सुश्री मधुवन्ती कुलकर्णी ☆
☆
विठोबा दयाळा
माझ्या रे लेकरा
आलासी कृपाळा
पंढरीनाथा॥
☆
झाला तो सोहळा
वैष्णव सोयरा
किर्तनाचा मेळा
वाळवंटी गा॥
☆
दमूनी आलासी
भेट दे माऊलिसी
चलावे आता घरी
विश्रांतीस गा ॥
☆
पुढील वरषी
जा म्हणे पंढरीसी
भगवी पताका
खुणावती गा॥
☆
गहीवरे नेत्र ते
विठोबा शिणला
भक्तांच्या काजासाठी
ह्रदयात विसावला॥
☆
चित्र साभार – सुश्री मधुवंती कुलकर्णी
© सुश्री मधुवंती कुलकर्णी
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ.मंजुषा मुळे/सौ.गौरी गाडेकर≈
सुश्री प्रभा सोनवणे
कवितेच्या प्रदेशात # 145
☆ श्रावण- अष्टाक्षरी चारोळ्या भाग – २ ☆ सुश्री प्रभा सोनवणे ☆
☆
पानाफुलात रमले
आला श्रावण महिना
रिमझिमता पाऊस
हर्ष मनात मावेना
☆
येता श्रावण अंगणी
मला सखी आठवते
मेंदी भरली पावले
डोळे मिटून पहाते
☆
झोका बांधला झाडाला
कोणी येता जाता पाही
उंच उंच नेऊ झोका
पर्वा कशाचीच नाही
☆
सण नागपंचमीचा
वाटे त्याची अपूर्वाई
भारी बांगड्याचा सोस
आणि माहेराची आस
☆
चित्र नाग नरसोबा
भिंती वर शोभतसे
लाह्या फुटाणे नैवेद्य
घरोघरी मिळतसे
☆
बालपणीचा श्रावण
चारोळीत चितारला
तुझ्या आठवांनी सखे
माझा पदर भिजला
☆
बेल वाहते शिवाला
श्वेत वस्त्र ते लेवून
करते मी उपासना
एकवेळच जेवून
☆
शिव सावळा तो भोळा
माझा सांबसदाशिव
असे श्रावणात माझी
नित्य मंदिरात धाव
☆
दिन स्वातंत्र्याचा येतो
याच श्रावण मासात
मुक्तता भारतभूची
करू साजरी झोकात 🇮🇳
☆
माझा श्रावण मला
बाई किती शिकवतो
रांधा वाढा उष्टी काढा
अर्थ नव्याने कळतो
☆
धोत-याचे फूल तसे
किती उपेक्षित असे
महादेवाला परंतू
श्रावणात शोभतसे
☆
श्रावणात अन्नपूर्णा
सर्वां प्रसन्नच होते
अन्नदानाची पुण्याई
मग पदरी पडते
☆
शुक्रवारी जिवंतिका
घरी भोजनास येई
पोळी पुरणाची खास
दूधा तूपा संगे खाई
☆
ह्या नारळी पौर्णिमेला
नारळाचा गोड भात
केशराच्या रंगाचीच
भावा बहिणीची प्रीत
☆
पोरी, मंगळागौरीचा
आज आहे गं जागर
झिम्मा फुगडी खेळण्या
तुझा पदर सावर
☆
© प्रभा सोनवणे
संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ. विद्या पराडकर
कवितेचा उत्सव
☆ मनमयुरा… ☆ सौ. विद्या पराडकर ☆
मनमयुरा तू नाचूनी घे
श्रावणातल्या जलधारानी
देहपिसारा भिजवूनी घे
मनमयुरा तू नाचूनी घे
शितल ओला सुगंध हर्षित स्पर्श तो
वृक्ष लतांना बहर आणि जो
आनंदाने होऊनी बेहोश
चरचरा तू पाहून घे
मेघ गर्जना होता अंबरी
दामिनी येई पळत भूवरी
तेजस्वी पण क्षणभर त्या
ज्योतीला तू पाहूनी घे
गंधयुक्त या वातावरणी
समरसतेच्या विशाल अंगणी
जलाशयाच्या दर्पणातूनी
प्रतिबिंब अपुले पाहूनी घे
देवदूत तू जीवनाधार
मानवाचा आधार
प्रसन्नतेचे मळे पिकवूनी
दे प्राशाया अमृत संजीवनी
मनमयुरा तू नाचुनी घे
श्रावणातल्या जलधारानी
देह पिसाराभिजवून घे
मनमयुरा तू नाचुनी घे.
© सौ. विद्या पराडकर
पुणे.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री सुहास सोहोनी
कवितेचा उत्सव
☆ मागणे हे एक देवा 🌺☆ श्री सुहास सोहोनी ☆
विठ्ठल तू, माउली विठू तू,
तू पंढरिचा राजा, ॥
माय-बाप, कानडा, सखा तू
ये भक्तांच्या काजा, ॥
दामाजीचा महार तू,
तू एक्याचा पाणक्या ॥
बहिणाई आणखी जनीचा
जिवलग तू, तू सखा ॥
अभंग गाथा रूप तुझे अन्
ओवी चित्र तुझे ॥
कांद-मुळा-भाजीत घातले
रंग आगळे तुझे ॥
सुईस जोडी दोर दिला तू
मडक्यासी आकार
दिधली पिवळी चमक सुवर्णा
उष्ट्याला जोहार ॥
भक्तिरसाचा मळा बहरला
ये भक्तीला बहर ॥
चंद्रभागेच्या वाळवंटि ये
भक्तिनदीला पूर ॥
वारस सारे अम्ही अज्ञजन
संतसज्जनांचे ॥
विठुराया वरदान अम्हा दे
कृपाकटाक्षाचे ॥
🌺
© सुहास सोहोनी
रत्नागिरी
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 150 ☆ विखारी आग… ☆
प्राक्तनाने जाळली ही बाग आता
कोणता काढेल साबण डाग आता
वारुळाचे पूर्ण होता काम सारे
फस्त करती मुंगळ्यांना नाग आता
घर्षणाने पेटलेले रान आहे
विझत नाही ही विखारी आग आता
भावकीच्या भांडणाचा लाभ त्यांना
तू शहाण्या सारखा रे वाग आता
भिस्त ज्यावर ठेवली होती इथे मी
तोच गेला मारुनी मज टांग आता
पबमध्ये मी रात्र सारी जागतो रे
कोंबड्या तू दे दुपारी बांग आता
वार हा पाठीत केला आज त्यांनी
काढतो मी लेखणीतुन राग आता
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री अरूणा मुल्हेरकर
कवितेचा उत्सव
☆ सरी आठवांच्या… ☆ सुश्री अरूणा मुल्हेरकर ☆
(वृत्त~दिंडी)
नभी दाटी ही गर्दघन ढगांची
तशी गर्दी का स्मृतींच्या थरांची ॥१॥
पावसाच्या ह्या सरी मोद देती
भिजत असताना आठवणी येती ॥२॥
विसरते मी स्थळ काळ बंधनांना
पुन्हा रमते मी जागवित स्मृतींना॥३॥
आठवे मज ते स्वैर बाल्य सारे
माय बापाचे लाड कोड प्यारे ॥४॥
दिले संस्कारा किती मला त्यांनी
उभे केले मज जीवनी सुखानी ॥५॥
भेट होता त्या राजकुमाराची
गंध दरवळला वाट यौवनाची ॥६॥
प्रीत सुमने ती उधळली सुखाने
बकुळ पुष्पासम जाहलो मनाने ॥७॥
चिंब भिजलो की प्रेम पावसाने
हरित झालो ना प्रीति भाषणाने ॥८॥
दिवस गेले ते हवेसम उडाले
नाटकाचे हे अंक सर्व सरले ॥९॥
चित्त आता मम हरि नामस्मरणी
समज आली ही प्रभू तुझी करणी ॥१०॥
© सुश्री अरूणा मुल्हेरकर
डेट्राॅईट (मिशिगन) यू.एस्.ए.
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ.गौरी गाडेकर≈
महंत कवी राज शास्त्री
हे शब्द अंतरीचे # 92
☆ निसर्ग-राजा ☆
(काव्यप्रकार:- “अंत-ओळ” काव्य…)
श्रावण धारा मुक्त बरसता
“निसर्ग-राजा” गहिवरे
हर्ष त्याच्या मनांत दाटता
अंग -प्रत्यांग मोहरे …०१
अंग -प्रत्यांग मोहरे
गवतावर दिसती तुडतुडे
गाई वासरे मुक्त चरतांना
शब्द माझे होती तोकडे…०२
शब्द माझे होती तोकडे
नदी ओहोळ एकवटती
नदी ओहोळ एकवटतांना
स्वर्ग प्रगट, भूमीवरती …०३
स्वर्ग प्रगट, भूमीवरती
बळीराजा आनंदून जाई
शेतात घाम गाळतांना
त्याचा घामाला सुगंध येई…०४
त्याच्या घामाला सुगंध येई
शेत शिवार खुलून गेले
टपोर कणसे जोमात येता
छान कपाशी बोंड खुले…०५
छान कपाशी बोंड खुले
शुभ्र सोने बाहेर येई
सोने शुभ्र बाहेर येता
कास्तकार मोहून जाई…०६
कास्तकार मोहून जाई
“राज” ला मग विषय सापडे
ऐसा हरित विषय सापडता
कागदास जाणवती, ओरखडे…०७
© कवी म.मुकुंदराज शास्त्री उपाख्य कवी राज शास्त्री
श्री पंचकृष्ण आश्रम चिंचभुवन, वर्धा रोड नागपूर – 440005
मोबाईल ~9405403117, ~8390345500
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ.गौरी गाडेकर≈
