Category: कवितेचा उत्सव 2

सौ राधिका भांडारकर

 कवितेचा उत्सव 

☆ “ते गंध रांगडे...” ☆ सौ राधिका भांडारकर ☆

☆

धुक्यात गेल्या अबोलवाटा ओलावुनि त्या स्मृती

स्पर्शात गंध जाणवे किती..

*

चंद्र नभीचा कधी खुणावे चमचमत्या चांदण्या

आरक्त शृंगारा सजविण्या…

*

सळसळ पानी शीळ वाऱ्यात थेंबात गळे कशी

ओल्यात होते वेडीपिशी..

*

का दुराव्यात क्षण हे वेचू माझे मला नकळे

संपले वाटता परत गळे..

*

ते क्षितिज उगा भासे उदास रंगात सोनसळी

मावळे गालावरची खळी…

*

वचनांना त्या वेढतो तमस मिटोनि त्या भावना

हुरहुरत झाकोळी कामना.. (का मना)

*

तू नसल्याचे दुःख मोडके उरावरी पेलते

खोटेच फूल दगडी खुलते..

*

त्या पुष्पांना नसतो सुगंध गडद रंग बेगडे

फांदीत झुले फक्त रांगडे

☆

© सौ. राधिका भांडारकर

ई ८०५ रोहन तरंग, वाकड पुणे ४११०५७

मो. ९४२१५२३६६९

radhikabhandarkar@yahoo.com

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ विजया कैलास हिरेमठ

 कवितेचा उत्सव 

☆ “हो… ती बदलली” ☆ सौ विजया कैलास हिरेमठ ☆

☆

सारे सहजच म्हणतात

ती बदलली.. ती बदलली

हो… पण तिच्यासाठी

सोप्पे नव्हते हे काही….

*

अनुभवातून शहाणी झाली

बदलण्यासाठी तिने

मेहनत खूप घेतली….

*

कोणा आवडली

कोणा खटकली

नजर साऱ्यांनी रोखली….

*

एकदा नाही कित्येकदा

कधी जगासाठी

कधी स्वतःसाठी जगली…

*

मऊ मखमली पावली

काट्याकुट्यातून चालली

जपली तिने स्वतःची सावली…

*

अनेक प्रश्न ठेवुनी निरुत्तरीत

मन सुंदर विचारात व्यतीत

जगणे झाले अकल्पित…

*

जग दुनिया अचंबित

तिला पाहून सदा सुगंधित

ती दरवळते स्वतःलाच शोधीत…

*

हो… ती बदलली

प्रेमात स्वतःच्या न्हाहुन आली

सुंदर तिच्या विश्वात रमली

आनंदाने भरभरून जगू लागली…

☆

💞शब्दकळी विजया 💞 

©  सौ विजया कैलास हिरेमठ

पत्ता – संवादिनी ,सांगली

मोबा. – 95117 62351

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री हरिश्चंद्र कोठावदे

 कवितेचा उत्सव 

☆ समुद्रमंथन… ☆ श्री हरिश्चंद्र कोठावदे ☆

☆ 

नाही जाणे ज्या गावाल खुशाल त्याची वाट पुसावी

ना घेणे ना देणे तरि त्या बाजाराची वाट धरावी

*

जमीन अनवट घ्यावी पायी परिपाटीला देउन फाटा

केले ज्याला विद्ध फुलांनी हळूच उचलुन घ्यावा काटा

*

वाळूवरले नाही अक्षर शिलालेख तव शब्द असू दे

करारनाम्यावर शपथेच्या रक्तस्वाक्षरी तुझी असू दे

*

दुःख एकले निघे प्रवासा काळोखाला घेउन सोबत

गळाभेट दु:खांशी होता दुःख होय हे स्वयंप्रकाशित

*

आव्हानांचा नित्य सामना इथे कसोटी पुरुषार्थाची

वैशाखाच्या वणव्यांची धग इथेच उधळण इंद्रधनूंची

*

अमरत्वाचा नाही पट्टा क्षणभंगुर हे आहे जीवन

क्षणाक्षणांवर व्हावे येथे युगायुगांचे प्रत्यारोपण

 *

अस्थिदान हे दधिचीचे अन् मांस शिबीने केले अर्पण

दीड वितीची नाही काया रक्तमांसमय हे नंदनवन

*

बरेच सुंदर, विरूप थोडे तरीहि अद्भुत आहे जीवन

विषामृताचा हा तर सागर अविरत चाले समुद्रमंथन!

☆

© श्री हरिश्चंद्र कोठावदे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री सुहास सोहोनी 

  चित्रकाव्य  

– देव चिंतामणि आले हो अंगणी –  ☆ श्री सुहास सोहोनी ☆

🌹

भाद्रपद मास, चतुर्थीचा दिस

सज्ज स्वागतास, स्वर्ग साती

हासत नाचत, गायन करीत

आले गजानन, गणपती…

🌹

आले हो अंगणी, देव चिंतामणी

सुखाची पर्वणी, नेत्रा वाटे

काय वर्णू रूप, काय वर्णू तेज

भाषा शब्दकळा, थिटी वाटे…

🌹

मेखला कटीस, घुंगरू पायात

नादबद्ध लय, साधतसे…

स्थूलाचे सौष्ठव, नयनी मार्दव

अंतरी लाघव, नांदतसे…

🌹

नृत्य दर्शविते, लालित्य पदांचे

शुंडा आणि कर्ण, हिंदळती…

प्रसन्न चित्ताने, हासर्‍या मुद्रेने

आनंदाची फुले, उधळिती…

🌹

एका हाती पुष्प, कमळाची शोभा

तेज परशूचे, दुजातुन

तृतीय करात, मोदक प्रसाद

लाभे आशीर्वाद, चौथ्यातुन…

🌹

गृहासि आमुच्या, लावावे चरण

हर्षोल्लासे तुम्ही, गणराया

कृपेचा कटाक्ष, राहो आम्हावरी

असो द्या स्मरणी, देवराया…

🌹

सानुल्या मूषका, भार वहाण्यासी

देता बळ तुम्ही, गजेंद्राचे

गौरिपुत्रा तैसी, द्यावी शक्ति आम्हा

आणायास राज्य, सद्धर्माचे…

🌹

©  श्री सुहास सोहोनी 

दि. २७-०८-२०२५

रत्नागिरी

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री अशोक श्रीपाद भांबुरे

अशोक भांबुरे जी यांची कविता अभिव्यक्ती # २९८

☆ मोती… ☆ श्री अशोक श्रीपाद भांबुरे ☆

☆

रात सरता सरता

उधळलं हे दवार

कसं मोत्यानं भरलं

सारं माझं हे शिवार

दवाचे हे झाले मोती

दिसे पाना-पानावर

परि वेचता येईना

असा कसा कारभार

अशी मांडली आरास

थोड्या वेळेसाठी सारं

*

काळ्या मातीनं शोषलं

कसं मोती थंडगार

आली किरणं वरती

थोडं भिनलं रं वारं

*

कसं व्हत्याचं नव्हतं

पुन्हा झालं सारं सारं

☆

© श्री अशोक श्रीपाद भांबुरे

श्रीशैल चौगुले

 कवितेचा उत्सव 

☆ संस्कृत स्तुती… ☆ श्रीशैल चौगुले ☆

☆

सुधा प्राशिता शब्दाक्षरी

कवण सुचिते सुभाषिता.

*

मम मनी ती अभिलाषा

ज्ञान पुलकित आशिषा.

*

श्रावण तरुतल उमल

तैसीया प्रतिभा कमल.

*

राजस्वी आरुढ कुमार

भाषाही शोभित शृंगार.

*

शुध्द तिथी ऋतू संस्कृत

हृदय भाव तव स्वीकृत.

*

अब्द जलद वेग नभी

काव्यरचा मणी कौस्तुभी.

*

भृंगर नाद पुष्प दली

कोकिल शब्द लय झुली.

*

ऐसी श्रेष्ठ महती प्राप्ती

कवी मन पावन तृप्ती.

 ☆

© श्रीशैल चौगुले

श्री विनायक कुलकर्णी

 कवितेचा उत्सव  

☆ सदाचार… ☆ श्री विनायक कुलकर्णी ☆ 

(वृत्त.. कलिंदनंदिनी)

[लगालगा लगालगा लगालगा लगालगा (अक्षरगणवृत्त)]

[अक्षरे.. १६ मात्रा.. २४]

☆

कुणावरी हसू नको कुणास तू फसू नको

बरे जपून वागणे कुणावरी रुसू नको

*

हयात ही हवा असे क्षणातला दिवा असे

कुणी इथे नवा असे कुणी जरा जुना असे

इथेच राख तोल हा भ्रमात तू असू नको

बरे जपून वागणे कुणावरी रुसू नको

*

करू नकोस माज तू उगा भरून व्याज तू

जराच ठेव भान तू भरून ठेव ज्ञान तू

फुका कुठे कुणा घरी गहाण तू बसू नको

बरे जपून वागणे कुणावरी रुसू नको

*

उगाच काळजी तुझ्या मनात काजळी असे

धनास साध्य मानसी तनात वाळवी असे

विचार सोडुनी असा विराण तू दिसू नको

बरे जपून वागणे कुणावरी रुसू नको

*

कुणी असेल रावही कुणी असेल रंकही

तुझ्याच सावलीतूनी कुणा फुटेल पंखही

कुणी करेल घातही तरी कुणा डसू नको

बरे जपून वागणे कुणावरी रुसू नको

*

कुणावरी हसू नको कुणास तू फसू नको

बरे जपून वागणे कुणावरी रुसू नको

☆

© श्री विनायक कुलकर्णी

मो – 8600081092

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

सुदाम्या खरंच भाग्यवान आपण   श्री आशिष  बिवलकर ☆

☆

स्वर्गातल्या रोजच्या कामाला

कंटाळून भगवंताने मारली दांडी |

भगवंत अवतरले सुदाम्यासंगे

बघायला भूतलावरची दहीहंडी |

*
कुठे जावे विचार करून

आले दोघेही मुंबापुरीत |

आपला जयघोष ऐकून

हायसे वाटले या नगरीत |

*
भगवंत आश्चर्याने म्हणाले

कोणाचे प्रयत्न चालले अथक |

सुदामा हसत हसत उत्तरले

हे मुंबईतले गोविंदा पथक |

*
दही हंडी का रे टांगली 

त्यांनी इतक्या उंचावर |

पुढाऱ्यांनी महत्वाकांक्षेचे

लावलेत इथे थरावर थर |

*
मडक्यात काय घातलंय 

दही का नुसतेच पाणी |

व्यासपीठावरच्या मंडळीनीच

आधीच मटकवलंय लोणी |

*
अरे त्या कोण नाचताहेत 

तिथे त्या सुंदर गौळणी |

सेलिब्रिटी तारका डोलती 

डीजे वरची कर्कश्य गाणी |

*
लोणी नाही तर मिळेल का 

थोडंसं दूध अन् दही |

जीएसटी लागलाय आता 

प्रश्न विचारता तुम्ही काही |

*
सुदाम्या भाग्यवान आपण

द्वापार युगातच सरलो |

कलयुगात नामस्मरणासाठी

पोथीतच नाममात्र उरलो |

©️ वास्तवरंग

☆

(चित्र सौजन्य – श्री आशिष बिवलकर) 

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ शिकत चला ना… ☆ प्रा तुकाराम दादा पाटील ☆

☆

नाही कळले का देवाने

चंद्र जडवला तुझ्या रुपाला

तुला लाभले रूप देखणे‌

भुलवत असते उभ्या जगाला

*

उंबरठ्याच्या आत कोंडता

तारूण्याचे कशास वादळ

सोडा त्याला खुल्या अंगणी

मुक्तपणाणे खेळायाला

*

आवेगाला नका थांबवू

हवी तेवढी मोकळीकद्या

कर्तृत्वाचा जोम वाढतो

जगणे सुंदर घडवायाला

*

मना सारखे उंच मनोरे

रचत जायला धमक लागते

जगात कोठे नसते किंमत

गुलाम केवळ बनणाराला

*

धनदौलत ही फसवी माया

हसवत येते रडवत जाते

तोडच नाही जगात कुठली

माणसातल्या आत्मसुखाला

*

कल्पनेतले रमणे नुसते

उपयोगाचे नसते काही

बसतो मोजत आपण तारे

आभाळाच्या किती छताला

*

जुन्यापुरान्या उचापतीना

गाडून किंवा पुरून टाका

शिकत चलाना अभिमानाने

जगणे सुंदर जगत जायला

*

माणुसकीला जपत जयला

इच्छा शक्ती खूप लागते

तीच तेवढी देत जायला

विनवत जावू देवाजीला

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈