Category: सूचनाएँ/Information

सूचना/Information 

(साहित्यिक एवं सांस्कृतिक समाचार)

सौ. दीप्ती कुलकर्णी

💐 अ भि नं द न 💐

गाडगीळ मॅनेजमेंट, सांगली आयोजित मराठी काव्य लेखन स्पर्धेत आपल्या समुहातील ज्येष्ठ साहित्यिका श्रीमती दीप्ती कुलकर्णी यांच्या काव्य रचनेस उत्तेजनार्थ पुरस्कार मिळाला आहे. ई अभिव्यक्ती मराठी तर्फे श्रीमती दीप्ती कुलकर्णी यांचे मनःपूर्वक अभिनंदन आणि पुढील वाटचालीसाठी शुभेच्छा 💐🖊️

पुरस्कार प्राप्त कविता आज प्रकाशित करत आहोत.

 संपादक मंडळ

ई अभिव्यक्ती मराठी

☆ ☆ ☆ ☆ ☆

पुरस्कार प्राप्त कविता

 कवितेचा उत्सव 

☆ “पाऊस” ☆ दीप्ती कुलकर्णी ☆

☆

 पाऊस आला, पाऊस आला, घेऊन मृदगंधाला

ग्रीष्मातील त्या उष्ण धरेचा, कणकण संतोषला

जलधारांनी बरसत आला, थेंबातुनी प्रगटला

बळीराजाही पेरायाला, शिवारात गुंतला ||१||

 *

इंद्रधनुचा मोहक पट तो, आकाशी उमटला

बालचमुसह सर्वांसाठी, आनंददायी बनला

जलाशयांचा, तरुवेलींचा, जीवनदाता ठरला

चिंबही भिजल्या सृष्टीचा तो, सखा जणू भासला ||२||

 *

धरतीनेही हिरवा शालु, अंगभरी ल्यायला

गवतफुलांचा, फळाफुलांचा, सुगंध साकारला

मातीतुनी या नवकोंबांचा, हर्ष दिसू लागला

तनामनाने चाहुल घेता, आसमंती विहरला ||३||

 *

चातकासही थेंबा घेऊनी, जन्म नवा लाभला

रिमझिम येता जलधारांचा, नाद ही झंकारला

पाऊस आला, पाऊस आला, मोद असा जाहला

नव आशांचा, नव स्वप्नांचा, झुला जणू झुलला ||४||

☆

© दीप्ती कुलकर्णी

कोल्हापूर

भ्र. ९५५२४४८४६१

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सूचना/Information 

(साहित्यिक एवं सांस्कृतिक समाचार)

सुश्री ज्योत्स्ना तानवडे

🎇 अ भि नं द न  🎇

जागतिक साहित्य कला व्यक्तित्व विकास मंच या संस्थेने आयोजित केलेल्या काव्य स्पर्धेत आपल्या समुहातील ज्येष्ठ साहित्यिका सौ. ज्योत्स्ना तानवडे यांच्या काव्यास उत्तेजनार्थ पुरस्कार प्राप्त झाला आहे.

ई अभिव्यक्ती परिवारातर्फे सौ. तानवडे यांचे मनःपूर्वक अभिनंदन आणि पुढील वाटचालीसाठी शुभेच्छा 💐

आज पुरस्कार प्राप्त काव्य प्रकाशित करत आहोत.

संपादक मंडळ

ई अभिव्यक्ती मराठी

☆ ☆ ☆ ☆ ☆

 कवितेचा उत्सव 

☆ “सांग दर्पणा” ☆ सौ.ज्योत्स्ना तानवडे ☆

(जागतिक साहित्य कला व्यक्तित्व विकास मंच आयोजित काव्य स्पर्धा ‘उत्तेजनार्थ सन्मान प्राप्त’)

☆

न्याहाळते दर्पणी मी

सज्ज होऊनी साजिरी

ल्याली आभूषणे भारी

शालू माझा भरजरी ||

* 

केला शृंगार देखणा

फिदा माझ्यावरती मी

सांग दर्पणा यामध्ये

काही नसे ना रे कमी ||

 *

तूच खरा मित्र जगी

रूप अचूक दाखवी

उणे अधिक काहीही

ओळखाया तू शिकवी ||

 *

ऐक दर्पणा एवढे

आठवाने मी लाजते

छबी नयनात त्याच्या

पाहण्याला आसुसते ||

 *

त्याची चाहूल लागता

सुखावले मी अंतरी

लाज साखर मिठीची

उमटली गालावरी ||

 *

नेत्र दर्पणी दोघांना

खूण पटे अंतरीची

सरे क्षणातच दूरी

साथ सात पावलांची ||

 ☆

© सौ.ज्योत्स्ना तानवडे

वारजे, पुणे.५८

≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सूचना/Information 

(साहित्यिक एवं सांस्कृतिक समाचार)

सुश्री ज्योत्स्ना तानवडे

🎇 अ भि नं द न  🎇 

शुभंकरोती साहित्य परिवारातर्फे आयोजित करण्यात आलेल्या वृत्त बद्ध काव्य स्पर्धेत आपल्या समुहातील ज्येष्ठ साहित्यिका सौ. ज्योत्स्ना तानवडे यांना त्यांच्या गंगा माहेराची या काव्यरचनेसाठी उत्तेजनार्थ पुरस्कार प्राप्त झाला आहे.

सौ. तानवडे यांचे ई-अभिव्यक्ती परिवारातर्फे मन:पूर्वक अभिनंदन आणि पुढील वाटचालीसाठी शुभेच्छा 💐

आज त्यांची पुरस्कार प्राप्त कविता प्रकाशित करत आहोत.

संपादक मंडळ

ई अभिव्यक्ती मराठी

☆ ☆ ☆ ☆ ☆

शुभंकरोति साहित्य परिवार आयोजित भव्य वृत्तबद्ध काव्य स्पर्धा ‘उत्तेजनार्थ सन्मान प्राप्त‘

 कवितेचा उत्सव 

☆ “गंगा माहेराची” ☆ सौ.ज्योत्स्ना तानवडे ☆

(वृत्त – लवंगलता (८|८|८|४))

☆

मनी घालती पिंगा अवचित फेऱ्या आठवणींच्या

फेर धरोनी नाचत थयथय गाऱ्या भिंगोऱ्याच्या ||

 *

शेतामधले कौलारू घर सदैव गजबजलेले

तीन पिढ्यांचे बंध रेशमी प्रेमळ गुरफटलेले ||

* 

दारापुढती गोधन दावण खूण वैभवी झुलते

ढवळ्या पवळ्या खिलार जोडी घुंगुरमाळा घुमते ||

 *

सख्खे मावस आत्ते मामे चुलत नातलग सारे

एकोप्याच्या मेळाव्याला भेटण्यास येणारे ||

 *

सरस्वतीचे मंदिर मोठे जीवन घडवत जाई

संस्कारांची दिली शिदोरी वाटे दुसरी आई ||

 *

मंदिरातल्या आरतीमधे मन रेंगाळत राही

आशीर्वादे आयुष्याला कळस यशाचा पाही ||

 *

गावाकडल्या मातीमध्ये नाळ जोडली आहे

माहेराच्या घरामधुनिया प्रेमळगंगा वाहे ||

 ☆

© सौ.ज्योत्स्ना तानवडे

वारजे, पुणे.५८

≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈