Tag: #मराठी-कविता

श्री सुहास सोहोनी

 वाचताना वेचलेले 

☆ म्हातारी लागली दळायला…… – कवी : श्री इंद्रजीत पाटील ☆ प्रस्तुती – श्री सुहास सोहोनी ☆

 – एक मराठमोळी लावणी –

☆

उन्हाळ झळा पाेटी कळा,

धरणी लागलीय जळायला

म्हातारी लागली दळायला,

वळीव लागला गळायला ll ध्रु ll

*

कसं संकट उभं म्हाेरं,

बाई सुटलंय बेभान वारं

पाठवण करी साठवण घाई,

साठलं तळ्यात सारं

साऱ्यात पाणी वाऱ्यात गं,

लागलंय धुमाट पळायला

म्हातारी लागली दळायला,

वळीव लागला गळायला ll १ ll

*

वीज कडकड करीत आली,

म्हणे पुढे पडुनी गेली

वढ्यावघळी भरूनी वाहता,

तरारल्या रे तरूवेली

वेल तरणी कुणाची करणी,

लागली साली सळायला

म्हातारी लागली दळायला,

वळीव लागला गळायला ।।२।।

*

लई वंगाळ मालक जीणं,

पुन्हा खुणाविते राणी रानं

बघा माजलंय शिवारी तणं,

सवाल सतावी गहनं

घाणीचं जीणं दु:खित मनं,

लागलीच लागे कळायला

म्हातारी लागली दळायला,

वळीव लागला गळायला ।।३।।

☆

कवी : श्री इंद्रजीत पाटील

 माे. नं. – ८००७७८९६१०

प्रस्तुती – श्री सुहास सोहोनी

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री प्रणिता प्रशांत खंडकर

 कवितेचा उत्सव 

☆ पृथ्वीचे मनोगत… ☆ सुश्री प्रणिता खंडकर ☆

☆

अरे मानवा मानवा, सांगू काय आणि कसे?

उंच बांधण्या इमले, नको नष्ट करू राने!

*

तुझ्या प्रगतीचे बाळा, मज कौतुकच आहे,

ग्रह-ताऱ्यांशी पोचली, तुझी अवकाशयाने!

*

विकासाची घोडदौड, तुझी, चालूच राहू दे,

पण पेरू नको तू रे, तुझ्या विनाशाची बीजे!

*

लोकसंख्या बेसुमार, किती वाढते वाढते,

तोल सांभाळेना माझा, शेषनागही थकले!

*

वृक्ष तोडून तोडून, काँक्रिटीकरण सगळे,

मग पावसाचे पाणी, जिरणार सांग कुठे?

*

कधी कडाक्याची थंडी, ऊन साहवेना झाले,

ढगफुटी, महापूर, अतिवृष्टी, अवर्षणे!

*

 झाडे लावा नि वाढवा, जपा कसोशीने राने,

पाणी वाचवा, जिरवा, स्वच्छ करा जलाशये!

*

अन्नधान्य हे दूषित, श्वास घेणे ना मोकळे,

प्रदूषण हे थांबवा, जपा कवच ओझोनचे!

*

 बाळ शहाणा तू माझा, विश्वास मज आहे,

 समजावूनी म्हणून, पृथ्वी माता मी सांगते!

☆

© सुश्री प्रणिता खंडकर

दिनांक.. २१. ०४. २०२५

संपर्क – सध्या वास्तव्य… डोंबिवली, जि. ठाणे.

ईमेल pranitakhandkar@gmail.com केवळ वाॅटसप संपर्क.. 98334 79845.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री प्रमोद वामन वर्तक  

  चित्रकाव्य  

☆ भा न! ☆ श्री प्रमोद वामन वर्तक ☆

☆

पाहून तव गोड छबी 

तार हृदयात झंकारली 

वर्णन कराया मग तुझे 

लेखणी मी सरसावली

*

एका गाली करी लगट

केश कलाप सोनेरी 

नजर तव डोळ्यांतली 

धकधक वाढवी उरी 

*

लालचुटूक ओठांवरती 

नासिका धारदार छान 

पाहून स्मित मुखावरचे 

जाते हरपून देहभान 

*

प्राक्तन गुलाबाचे बघून

असुया दाटली मनांत

येता “अहो” हिचे कानी 

आलो भानावर क्षणात

 आलो भानावर क्षणात

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – pradnyavartak3@gmail.com

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

  चित्रकाव्य  

तिच्यासम तीच …

☆ चित्रे दोन.. काव्ये दोन.. आशय मात्र एकच ☆ कवयित्री : सुश्री रेखा हिरेमठ आणि कवि: अज्ञात – प्रस्तुती: सुश्री शोभा जोशी  ☆

☆ ☆ ☆ ☆

सुश्री रेखा हिरेमठ

( १ )

कशाला पाहिजे वंशाला दिवा

ही तेजस्वी समई एकवार पहा 

*

मंद जळते साऱ्या कुटुंबासाठी

तरीही नाही दुषणे जिच्या ओठी

*

साक्षात सूर्याला घेऊन माथ्यावर

हास्य विलसे जिच्या चेहऱ्यावर

*

 पैसे कमवून नवऱ्याच्या जोडीने

घरी येऊन पुन्हा घरकाम करे गोडीने

*

आई आजी बहिण मुलगी बायको

कोणतेही नात्याने जोडलेली असो

*

 बनते प्रेरणा ही कायम चरा चराची

 तेवणारी ज्योत ही शोभा घरा घराची

*
उगीच म्हणत नाहीत तिला शक्ती

तिच्या सम कोणाला जमते भक्ती

☆

कवयित्री : सौ. रेखा दयानंद हिरेमठ

सांगली

☆ ☆ ☆ ☆

सुश्री शोभा जोशी 

(२) 

रोज रोज एकटा चालून,

सूर्य होता दमला,

बघून ही टोपली,

त्यात जाऊन बसला,

माताच ती,

समजला तिला त्याचा कंटाळा,

निघाली ती घराला।

Son in Hand n Sun in Basket.

☆ ☆ ☆ ☆

कवी : अज्ञात 

प्रस्तुती : सौ. शोभा जोशी 

मो ९४२२३१९९६२ 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 

 कवितेचा उत्सव 

☆ प्रवासी… ☆ श्रीशैल चौगुले ☆

☆

कोणत्या तीराला

लागते ही नाव

वादळांची वेढ

बेभानले घाव.

*

अंतरी लाटात

हिंदोळतो जीव

दैवाचा घेराव

प्रारब्धाचे डाव.

*

भरोसा कुणाचा

आयुष्य क्षितीज

संघर्ष मनाचा

विश्वासात भाव.

*

पेलूनीया शीड

जीवन सदैव

नाव चाले पुढे

प्रवासी सराव.

 ☆

© श्रीशैल चौगुले

सुश्री शोभना आगाशे

 वाचताना वेचलेले 

☆ सावरकर भारतात अवतरोत पुन्हा… कवी : ह. त्र्यं. देसाई ☆ प्रस्तुती – सुश्री शोभना आगाशे ☆

(२८ मे.. स्वा. सावरकर जयंती – त्यानिमित्त त्यांना आदरांजली)

☆

प्रभु चरणी हिंदु राष्ट्र करित प्रार्थना

सावरकर भारतात अवतरो पुन्हा।। ध्रु।। 

*
‘अभिनव भारत’ नामे क्रांती-कारिणी

संघटना निर्मियली देश-व्यापिनी

शत्रूच्या शिबिरातहि ठाण मांडिले

क्रान्तिस्तव देशबंधू तेथ जमविले

करूनि तया शपथ बद्ध योजिले रणी

संगरार्थ शस्त्रात्रे जमविली झणी

संघटन-क्रांतीने राष्ट्र तारण्या

सावरकर भारतात अवतरो पुन्हा।। १।। 

*

सत्तावन-वर्षी ना बंड जाहले

स्वातंत्र्यास्तव राष्ट्रे समर लढविले

संशोधन करुनि नवा ग्रंथ निर्मिला

मॅझिनीचा चरित-ग्रंथ तेवि रचयिला

उभय जप्त झाले तरी गुप्त मुद्रिले

सर्वत्रहि युक्तीने धाडुनी दिले

अभिनव भारत वैभवशालि बनविण्या

सावरकर भारतात अवतरो पुन्हा।। २।। 

*

त्रस्त आंग्ल सरकारे अटक करुनिया

अंदमान कारागृहि कोंडिले तया

शिक्षा जरि वर्षे पन्नास जाहली

यातनामय भिन्न परी धृति न भंगली

‘कमला’ सम नवकाव्या तेथ रचियले

बंदीजना शिक्षित नी शुद्ध बनविले

हिंदु-बंधु विघटन ते त्वरित रोखण्या

सावरकर भारतात अवतरो पुन्हा।। ३।। 

*

रत्नागिरीमाजि स्थलबद्ध जै असे

लेखन भाषण उत्सव विविध करितसे 

शुद्धिकार्य सहभोजन करवूनी स्वयें

जाति-भेद निर्मूलन घडविले तये

मंदिरही पतितपावनाख्य उभविले

आणि हिंदु-संघटन-प्रेम निर्मिले

चेतविण्या पुनरपि या हिंदवी जनां

सावरकर भारतात अवतरो पुन्हा।। ४।। 

*
हिंदुसभाध्यक्ष बनून राष्ट्र जगविले

झुंजुनिया प्रथम निजामासि नमविले

उत्तेजुनि हिंदूंना सैन्य वर्धिले

त्यायोगे ‘नेताजी’ समर झुंजले

कट पाकिस्तानाचा शिजत पाहुनी

वंग नि पंजाब अर्ध रक्षिला झणी

कर्तव्य न उरता उपवास योजिला

‘आत्मार्पण’ करुनि धन्य धन्य जाहला

देवा! नव देहाने त्यास धाड ना

सावरकर भारतात अवतरो पुन्हा।। ५।। 

☆

(त्यांच्याच ‘शतपैलू सावरकर, तिसरी आवृत्ती, या स्वा. सावरकर प्रेमी मंडळ, पुणे यांनी प्रकाशित केलेल्या पुस्तकातून साभार)

रचयिता – ह. त्र्यं. देसाई

प्रस्तुती – सुश्री शोभना आगाशे

सांगली 

दूरभाष क्र. ९८५०२२८६५८

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

जगणे हलाखीचे, मरण सुखाचे!!  श्री आशिष  बिवलकर ☆

☆

वीतभर खळगीने नाचवले,

अर्धपोटी देह त्यानं पोसला।

निपचित पडला एकटाच,

जगाला आज तो दिसला।

*

आयुष्यभर लक्तरं मिरवली,

आज नवा पांढरा कपडा।

उचलाया लोक दारी आले,

सुखावला गरीबाचा झोपडा।

*

स्वतः स्वतःचा भार ओढला,

आज मिळाले खांदेकरी चार।

निरोपाला जमलीत मंडळी,

निष्प्राण देहाचा उचलाया भार।

*

येड्यागत रित्या खिशाने राहिला,

नाही समजली जगाची जत्रा।

रंक म्हणून जगला आयुष्यभर,

राजावानी खांद्यावर ही अंत्ययात्रा।

*

चुलीत घालाया कधी नव्हती लाकडं,

आज त्याच्यासाठी रचले जगाने सरण।

हसत हसत स्वतःशी पुटपुटला,

हालाखीचे ते जगणे, सुखाचे हे मरण।

☆

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ नदी… ☆ प्रा तुकाराम दादा पाटील ☆

(आत्मजाणिवेची कविता या कविता संग्रहा मधून)

☆

नदी दुथडी भरून आता निघाली माहेरी

काठावरी निरखती झाडं कावरीबावरी //धृ //

*

गच्च भरतेस तेव्हा तुला ओढ भ्रताराची

ससेहोलपट होते तेंव्हा किती माहेराची

नको तोडूस तू ताल नको होवूस नवरी //१//

*

रान पालटत जाते दिस उगवून येतो

ओलसर पुनवेच्या मनी चांदवा रुजतो

नव्या जगण्याच्या साठी होते मनाची तयारी //२//

*

आम्ही शेतकरी साधे तुझ्यावर जडे जीव

तुझ्या कुशीत नांदते देते हुंकार वैभव

बाई तुझ्या गं पाण्यानं आम्हा लाभते उभारी //३//

*

तुझी गाताना थोरवी तुला म्हणतो माऊली

भाव ठेवून अंतरी तुझी पुजाही मांडली

तुझे पिऊन अमृत आम्ही जगतो शिवारी //४//

*

तुझ्या काठी असणारे तुला देवता मानती

तुला माहेरवाशीण म्हणूनिया पुजताती

तुझ्या ओटीभरणाला साडी-चोळी जरतारी //५//

*

अशी नको रोडावूस उन्हातान्हात तापून

हरघडी टाक बाई तुझे पाऊल जपून

माझ्या मनाचे पाखरू झुरे पाणवठ्यावरी //६//

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ राधिका भांडारकर

 कवितेचा उत्सव 

☆ “पुन्हा एकदा..(लवंगलता)” ☆ सौ राधिका भांडारकर ☆

☆

कुठे हरवला तेव्हाचा तो प्रितीचा रंग सारा

आयुष्याला सोसत नाही रुक्ष कोरडा वारा

*

संवाद नसे शब्द माधुर्य  हरवले कसे कोठे

तेव्हा वाटे मौनात बरे.. नसते वादळ मोठे

*

ढग काळे ते दाटले नभी मिटोनि गेले तारे

जलधारांनो तुम्ही आपुले  आनंदगीत गारे

*

 असा कसा तो गंध गोडवा विरोनि गेला आता

 परत एकदा जुळवू आपण बेसुरातला  भाता

*

 वाटा ओल्या होत्या तेव्हा नरम किनारी वाळू

 त्या वाळुतले सदन आपुले वचनांना मग पाळू

*

 मावळतीला भास्कर जातो अज्ञानाच्या देशी

 निरोप त्याला दोघे देऊ प्रेमस्मृतींच्या वेशी

*

 नको दुरावा या वळणाशी  त्या नात्यांच्या गाठी

 जपूया तशा जशाच होत्या बेधुंद मनासाठी

☆

© सौ. राधिका भांडारकर

ई ८०५ रोहन तरंग, वाकड पुणे ४११०५७

मो. ९४२१५२३६६९

radhikabhandarkar@yahoo.com

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈