☆ कवितेचा उत्सव : झरझर पाऊस धार ☆ सुश्री नीलांबरी शिर्के ☆
गच्च नभातुन झरते मुरते
झरझर पाऊस धार
हिरवा हा निसर्ग वाटे
ओल्या मातीचा हुंकार
धरतीचा हुंकार भासतो
स्रुजनाचा ओंकार
चराचराच्या कल्याणाचा
वसुंधरेला भार
© सुश्री नीलांबरी शिर्के
≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
श्री अशोक श्रीपाद भांबुरे
(वरिष्ठ मराठी साहित्यकार श्री अशोक श्रीपाद भांबुरे जी का अपना एक काव्य संसार है । आप मराठी एवं हिन्दी दोनों भाषाओं की विभिन्न साहित्यिक विधाओं के सशक्त हस्ताक्षर हैं। आज साप्ताहिक स्तम्भ –अशोक भांबुरे जी यांची कविता अभिव्यक्ती शृंखला की अगली कड़ी में प्रस्तुत है एक समसामयिक एवं भावप्रवण कविता “जोखडाचे भय”।)
☆ साप्ताहिक स्तम्भ – अशोक भांबुरे जी यांची कविता अभिव्यक्ती # 60 ☆
☆ जोखडाचे भय ☆
पाणी डोळ्यांत घेऊन, पाणी शोधाया निघाले
नदी नाले शोधताना, होते रक्तही आटले
कंठी घागरीच्या दोर, जाते पाण्यासाठी खोल
गेली ठेचाळत खाली, नाही लाभलेली ओल
तुळशीच्या रोपालाही, नाही एक वेळ पाणी
पाने सुकाया लागली, त्यांस वाली नसे कोणी
अशी भेगाळली भुई, वाटे बघुनिया भीती
गाई-गुरांना न चारा, कशी जपायची नाती
चारा पोटात जाईना, गाय दूधही देईना
दुष्काळाच्या शृंखलेला, काही मार्ग सापडेना
योजनांच्या घबाडाचे, वाटेकरी हे लबाड
फळे खातात स्वतः हे, गरिबाला देती फोड
होई निसर्गाचा कोप, नाही राजाकडे न्याय
माणसाच्या मानेला या आज जोखडाचे भय
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
☆ कवितेचा उत्सव : वेदना! ☆ श्री मुबारक उमराणी ☆
किती सोसाव्या वेदना सुक्या रानी
छन्नी हातोड्याचे घाव या जीवनी
पावसाचा वादा खोटा पिक जळे
भेगाळल्या रानी पाणी मागे मळे
ढग आले तसे दूरदूर गेले
आस पावसाची मन दुःख झेले
मीही सोसे पिकासंगे आक्रोश
असा जीवनभोग सारा तो रोष
कधी मी लांबच्या ढगाशी भांडतो
दुःख माझे ते रानोमाळ सांडतो
वेडा होतो वेदना पिक पाहतांना
दुःख जळते सारे ते साहतांना
© श्री मुबारक उमराणी
राजर्षि शाहू कॉलोनी, शामरावनगर, सांगली
मो.९७६६०८१०९७
≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
☆ कवितेचा उत्सव : गझल – श्री चंद्रकांत कदम ☆
नव्हतीस सांग माझ्या तू आसपास केंव्हा?
सरला म्हणून नाही माझा सुवास केंव्हा!
हृदयात मीच तुझिया माहीत हे मला पण
दुनियेस सांगण्याचा घेशील त्रास केंव्हा?
प्रत्येक भेटणारा भुलतो तुलाच आहे
माझ्याच एकट्याची होशील खास केंव्हा?
गोडी तुझ्यातली तर आकर्षिते जगाला
ओठांवरी तुझ्या पण माझी मिठास केंव्हा?
जुळणार नाळ केंव्हा प्रत्येक काळजाशी?
माझीच भोवताली केवळ मिजास केंव्हा?
मी बोचतो जरीही तुजला खड्याप्रमाणे
चघळून टाक मजला समजून घास केंव्हा!
अंदाज पावसाचा सांगेल वेधशाळा
पण लागला कुणाला माझा कयास केंव्हा?
हमखास भेटशी तू गझलेतुनी म्हणूनच
इतक्यात होत नाही मीही उदास केंव्हा!
बघतो तिथे मला तू दिसतेस भोवताली
होतात का तुलाही माझेच भास केंव्हा?
आयुष्य मी कधीचे केले तुझ्याच नावे
घेशील सांग तूही माझाच ध्यास केंव्हा?
कुठवर परस्परांना निरखायचे दुरूनी?
होईल एक नक्की अपुला निवास केंव्हा?
तू बंद काळजाला केले कितीकवेळा
पण थांबलाच नाही माझा प्रयास केंव्हा!
काळा तुझीच खेळी असणार नेमकी ही
होतो सुपीक केंव्हा झालो भकास केंव्हा!
आजन्म श्रावणाची मी वाट पाहिली पण
केला कुणीच नाही माझा तपास केंव्हा!
गेलो बुडून दोघे प्रेमात एवढे की
कळले कुणास नाही सरला प्रवास केंव्हा!
© श्री चंद्रकांत कदम (सन्मित्र)
नांदेड़
मो. – 9921788961
कवी राज शास्त्री
(कवी राज शास्त्री जी (महंत कवी मुकुंदराज शास्त्री जी) मराठी साहित्य की आलेख/निबंध एवं कविता विधा के सशक्त हस्ताक्षर हैं। मराठी साहित्य, संस्कृत शास्त्री एवं वास्तुशास्त्र में विधिवत शिक्षण प्राप्त करने के उपरांत आप महानुभाव पंथ से विधिवत सन्यास ग्रहण कर आध्यात्मिक एवं समाज सेवा में समर्पित हैं। विगत दिनों आपका मराठी काव्य संग्रह “हे शब्द अंतरीचे” प्रकाशित हुआ है। ई-अभिव्यक्ति इसी शीर्षक से आपकी रचनाओं का साप्ताहिक स्तम्भ आज से प्रारम्भ कर रहा है। आज प्रस्तुत है आपकी एक भावप्रवण कविता “ अभंग …”)
☆ साप्ताहिक स्तम्भ – हे शब्द अंतरीचे # 11 ☆
☆ अभंग… ☆
केशव माधव,
अनंत अगाध,
झालो मी सावध, परमेशा…०१
महाराष्ट्र माझा,
संतांची ही भूमी
माझी कर्मभूमी, हीच झाली…०२
देव अवतार,
इथेच जाहले
संतांनी पूजिले, ईश्वर ते…०३
सात्विक आचार,
सुंदर विचार
महाराष्ट्र घर, माझे झाले…०४
संत ज्ञानेश्वर,
संत तुकाराम
जीवन निष्काम, संतांचे हे…०५
शौर्याची पताका,
इथे फडकली
तोफ कडाडली, गडावर…०६
शिवबा जन्मला,
शिवबा घडला
माता जिजाऊला, आनंद तो…०७
मराठी स्वराज्य,
शिवबा स्थापिले
मोगल पडले, धारातीर्थी…०८
ऐसा माझा राजा,
छत्रपती झाला
निर्भेळ तो केला, कारभार…०९
दगडांच्या देशा,
प्रणाम करतो
अखंड स्मरतो, बलिदान…१०
कुणी आक्रमण,
तुझ्यावर केले
हल्ले किती झाले, पृथ्वीवर…११
चिरायू हा होवो,
कण कण तुझा
नमस्कार माझा, स्वीकारावा…१२
कवी राज म्हणे,
निसर्ग सौंदर्य
आणि हे औदार्य, कैसे वर्णू…१३
© कवी म.मुकुंदराज शास्त्री उपाख्य कवी राज शास्त्री.
श्री पंचकृष्ण आश्रम चिंचभुवन,
वर्धा रोड नागपूर,(440005)
मोबाईल ~9405403117, ~8390345500
श्री सुहास रघुनाथ पंडित
संक्षिप्त परिचय
सेवानिवृत्त बॅंक कर्मचारी. कथा, ललित, प्रासंगिक लेखन, पुस्तक परिचय. कविता विशेष आवडीचा विषय.सा.सकाळ, जत्रा, दिवाळी अंक यात लेख, कथा, कविता प्रकाशित. लोकमान्य वाचनालय, मालाड, व संस्कार भारती ठाणे यांचे काव्य पुरस्कार. साहित्य कलायात्री प्रकाशन, पुणे यांचा काव्ययात्री पुरस्कार. ‘शब्द माझ्या सोबतीला’ हा पहिला कविता संग्रह 2017 मध्ये प्रकाशित झाला आहे. त्याला तीन पुरस्कार मिळाले आहेत. ते असे.:
1 अग्रणी साहित्य पुरस्कार, देशिंग, जि. सांगली
2 दक्षिण महाराष्ट्र साहित्य सभा, कोल्हापूर यांचा प्रथम प्रकाशन पुरस्कार
3 महाराष्ट्र साहित्य परिषद, पलूस, जि. सांगली व ग्रामीण साहित्य परिषद, पलूस यांचा काव्यरत्न पुरस्कार.
अखिल भारतीय तसेच अनेक लहान मोठ्या साहित्य संमेलनात काव्यवाचन, परिसंवादात सहभाग.
मो – 9421225491
ईमेल – soorpandit@gmail.com
☆ कवितेचा उत्सव : इंद्रधनुस – श्री सुहास रघुनाथ पंडित ☆
इंद्राचे धनु म्हणून तुजला मान लाभला जरी
रंग रुपाचे वैभव तुजला क्षणभरअसते परी.
काळ्या माझ्या रंगावरती जाऊ नको तू असा
रंगांची मी उधळण करिते विचार तू पावसा.
फळे,फुले अन् पानोपानी खुलून येती रंग
रूप पाहूनी माझे तूही गगनी होशील दंग.
खजील होऊन लपशी का तू मेघांच्या मागे
वैभव माझे चिरंजीव हे वर्षा ॠतूच्या संगे.
धरणीमाता म्हणती मजला एक तुला सांगते
क्षणभर मोहीत करणे म्हणजे जगणे नसते.
© श्री सुहास रघुनाथ पंडित, सम्पादक ई-अभिव्यक्ति (मराठी)
सांगली (महाराष्ट्र)
मो – 9421225491
☆ कवितेचा उत्सव : माझी कविता .. – श्री प्रकाश लावंड ☆
हिरवाई लेवून येते वनराई होऊन येते
कृतार्थ माझी कविता उतराई होऊन येते
अंतऱ्यात लपेटून येते अस्ताई होऊन येते
आईच्या ओठांवरती अंगाई होऊन येते
उधाणल्या दर्यावरती नौका होऊन येते
लाटांची उंची घेऊन गहराई होऊन येते
शेत शिवार फुलवित पिकांतून डोलत येते
पोटाची भूक शमविण्या काळीआई होऊन येते
घायाळ हरिणी होऊन भयभीत धपापत येते
गरुडझेप घेऊन कधी उंचाई तोलून येते
अंधारात झडपली जाते छिन्न होऊन पडते
न्यायाच्या प्रतिक्षेत अटळ दिरंगाई होऊन पडते
© श्री प्रकाश लावंड
करमाळा जि.सोलापूर.
मोबा 9021497977
☆ कवितेचा उत्सव : नवोदित कवी – सुश्री मानसी चिटणीस ☆
स्वप्ने रंगवत
लिहित जायचा काहीबाही
नकारघंटा जरी मिळाली
मिरवायचा कवितेची द्वाही…
एका दिवशी कुणी अचानक
फोन करुनिया सांगे त्याला
म्हणे तुम्हाला अमका तमका
पुरस्कार तो जाहिर झाला..
कवी नाचला आनंदाने
दोन चार मग लिहिली कवने
फोनवरील तो कोणी त्राता
मखलाशीने बोलत होता…
नसेच काही दुजी अपेक्षा
केवळ रक्कम द्या इतकी
पुरस्कार ही तुम्हास देऊ
देणगी द्या मागू जितकी
साटलोटं सौदेबाजी
सत्काराची फुलं ताजी
कवी नवोदित पाही स्वप्ने
कवितेशी हो कसले घेणे
कसा कवीअन् कसली कविता
केवळ द्यावे अन् घ्यावे
बाजारातल्या एजंटांनी
नवेच बकरे शोधत -हावे …
© सुश्री मानसी चिटणीस
श्री शेखर किसनराव पालखे
( मराठी साहित्यकार श्री शेखर किसनराव पालखे जी लगातार स्वान्तः सुखाय सकारात्मक साहित्य की रचना कर रहे हैं । आपकी रचनाएँ ह्रदय की गहराइयों से लेखनी के माध्यम से कागज़ पर उतरती प्रतीत होती हैं। हमारे प्रबुद्ध पाठकों का उन्हें प्रतिसाद अवश्य मिलेगा इस अपेक्षा के साथ हम आपकी रचनाओं को हमारे प्रबुद्ध पाठकों तक आपके साप्ताहिक स्तम्भ – शेखर साहित्य शीर्षक से प्रत्येक शुक्रवार पहुँचाने का प्रयास करेंगे । आज प्रस्तुत है आपकी भावप्रवण कविता “अस्तित्वभान!!!”)
☆ साप्ताहिक स्तम्भ – शेखर साहित्य # 2 ☆
☆ कविता – अस्तित्वभान!!! ☆
प्रत्येक गजबजलेल्या घराघरांत
नांदते आहे एक रिकामंपण
समुद्राची गंभीर गाज
ऐकू येते आहे घरापर्यंत
माणसांच्या गर्दीतसुद्धा
माणूसपण हरवत चालले आहे
संवादातील लय बिघडून
जिवंतपण संपते आहे
अंधाराला येते आहे का
प्रकाशाची गती?…
कुंठित होऊ घातली आहे
मानवजातीची मती…
अजून किती दिवस मी -माझं -मला?…
हा तुझा गाव नाही
याचं भान येऊदे तुला…
घरातील पाहुण्यासारखा
चार दिवस छान रहा
शुद्ध मनानं सर्व सोपवून
मोक्षासाठी तयार व्हा .
© शेखर किसनराव पालखे
पुणे
15-04-20
सौ. गौरी सुभाष गाडेकर
संक्षिप्त परिचय
सौ. गौरी सुभाष गाडेकर (पूर्वाश्रमीची कु. उषागौरी मधुसूदन नाडकर्णी )
शिक्षा : बी एस सी, एल एल बी (जनरल ), पी जी डिप्लोमा इन ट्रान्सलेशन.
व्यवसाय :‘बँक ऑफ इंडिया ‘त अधिकारी. आता स्वेच्छानिवृत्त.
‘लँग्वेजेस ‘, ‘बियॉंड इंग्लिश कम्युनिकेशन्स’, ‘रचना इमेजेस ‘ इ. कंपन्यांकरता अनुवादक.
लेखन :अनेक मासिकं/दिवाळी अंकांतून कविता /कथा प्रकाशित. ‘नातं ‘, ‘आउटसाइडर, सहज वगैरे ‘, ‘तिसरं पुस्तक ‘हे कथासंग्रह व ‘वादळातील दीपस्तंभ ‘ व ‘मृत्यूवर मात’ ही अनुवादित पुस्तकं प्रकाशित.
पुरस्कार : ‘दिवा प्रतिष्ठान ‘तर्फे 2012-2013चा सर्वोत्कृष्ट लेखिका पुरस्कार. ‘अक्षरधन ‘, ‘प्रबोधन ‘, ‘कवितांगण ‘वगैरेंतर्फे आयोजित काव्यस्पर्धांत बक्षिसं. ‘कथाश्री ‘, ‘सा. सकाळ ‘, ‘ललना ‘वगैरे अंकांतर्फे आयोजित कथा स्पर्धांत बक्षिसं.
☆ कवितेचा उत्सव : कंटिन्युइटी – सौ. गौरी सुभाष गाडेकर☆
दहा बाय दहाच्या घराच्या
एकुलत्या एका खिडकीच्या गजांना
घट्ट पकडून
आकाशाचा टिचभर तुकडा
पाहता पाहता
स्वप्न बघतेय
आकाश कवेत घेण्याचं
जाणते मी
हे अचाट स्वप्न
मनात न मावणारं
जाणते मी
हे अफाट स्वप्न
आवाक्यात न पेलणारं
तरी आस सुटत नाही
या भव्यदिव्य स्वप्नाची
जिवात जीव असेपर्यंत
शेवटचा श्वास घेताना
असेल मन
समाधानाने संपृक्त
की निदान
पाहिले तरी होते एक भव्यदिव्य स्वप्न
कदाचित
त्यानंतर
गर्भवासात
तेच स्वप्न वसत असेल
नवनिर्मित होत असलेल्या
इवल्याश्या डोळ्यांत
आणि
गर्भवासातील
नऊ महिन्यांच्या
तपोबलावर
साकार होईलच ते
पुढच्या जन्मी
नक्कीच.
© सौ. गौरी सुभाष गाडेकर
