इंद्रधनुष्य
☆ तुमच्या तुमच्या परीनं जगा ….. ☆ संग्राहक – सौ. स्मिता पंडित ☆
खूप मोठं आहे हो आयुष्य ,
छान निवांत जगा , कशाची घाई आहे ..?
तुमच्या तुमच्या परीनं जगा ,
तुम्हाला जमेल तसं जगा ,
उगीच बाकीचे पळतायेत
म्हणून तुम्ही पळत सुटू नका ,
त्यांना गर्दी असेल ,जाऊ द्या त्यांना ,
तुम्ही तुमची क्षमता ओळखून जगा ,
समाधान मिळवत जगा ,
वाटेत मिळेल ते सुख गोळा करत जगा ,
अचानक पुढ्यात येणाऱ्या
दुःखांचा धैर्याने सामना करत जगा ,
शेवटी आज न उद्या
तुम्हीपण तिथेच पोहोचणार आहात ,
आयुष्याचा उपभोग घेत जगा ,
सुखाने हुरळून जाऊ नका ,
दु:खाने खचून जाऊ नका ,
दुःख आहे म्हणून तर सुख आहे ,
दुःख असल्याशिवाय सुखी होता येत नाही ,
दु:ख नको म्हणून सुखाच्या
शोधात धडपड करून शिखर
गाठणाऱ्यांच्या अपेक्षा तरी
कुठे पूर्ण होतात..?
तिथून मागे वळून पाहतांना
उमजतं त्यांना
खरं सुख खालीच होतं
दुःखाच्या अवती भोवती खेळत असलेलं..!
सुखदुःखांना सोबत घेऊन
आयुष्याचा आस्वाद घेत जगा हो–
आयुष्य खरच खूप सुंदर आहे ,
पॅकबंद खिडक्यांना उंची पडदे
लावलेली नॉन स्टॉप ए सी ट्रेन
तुम्हाला अपेक्षित स्थळी लवकर
पोहोचंवेलही. पण त्यात ती मजा नाही
जी सर्वसामान्यांच्या नॉन एसी ट्रेन मधे
मोकळ्या खुल्या खिडक्यातून खेळत्या हवेत
बाहेरची मौज बघत ,
येणाऱ्या स्टेशन्स वर ,नवीन प्रवाश्यांची नजरभेट घेत ,
डब्यात मुक्त संचार करणाऱ्या
विक्रेत्यांच्या चहा भेळेत आहे ..!
लहानसहान गोष्टीतला आनंद घेत जगा ,
फार पैसा लागत नाही ,
सावकाश जगा. कशाची घाई आहे..?
जास्त पैसा = जास्त सुख
हे समीकरण नाहीये हो बरोबर..!
संग्राहक : स्मिता पंडित
≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
