मराठी साहित्य – साप्ताहिक स्तम्भ ☆ कवितेच्या प्रदेशात # 103 ☆ प्रार्थना ☆ सुश्री प्रभा सोनवणे

सुश्री प्रभा सोनवणे

☆ गझल ☆

चंद्र परका चांदणेही पाहवेना

आजची कोजागरी का पेलवेना 

सोनचाफा आवडीचा फार माझ्या

मात्र आता गंध त्याचा साहवेना

वेढते वैराग्य की वय बोलते हे

वाट आहे तीच आता चालवेना

फोन माझा, चार वेळा टाळला तू

या मनाला काय सांगू सांगवेना

खूप झाला त्या  तिथेही  बोलबाला

मूक अश्रू ढाळलेले ऐकवेना

पूर्वजांचे मानले आभार मी ही

कंठ दाटे या क्षणाला बोलवेना

कावळा आलाय दारी घास खाण्या

आप्त आहे पण मला हे मानवेना

© प्रभा सोनवणे