श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # ३०६
☆ नवी सत्ता नवे रस्ते… ☆ श्री अशोक श्रीपाद भांबुरे ☆
☆
मनाच्या कोंडवाड्यातच अचानक भेटले घोडे
मिरवणुक काढुया म्हणता सुखाने नाचले घोडे
*
वरातीच्याच खर्चाची जराशी काळजी होती
स्वतःचा खर्च केला अन् खुशीने झिंगले घोडे
*
गुलालाची इथे उधळण अरे सूर्या कुणी केली
तुझ्या आधीच पृथ्वीवर तुझे बघ पोचले घोडे
*
रथाचे चाक वेगाने फिराया लागले आता
नवी सत्ता नवे रस्ते भराभर दौडले घोडे
*
तुकोबा ज्ञानराजाची निघाली पालखी आहे
सनातन पालखी सोबत किती बघ दंगले घोडे
*
जुगारी धनिक लोकांनी उडवली धूळ टापांची
बुकीने लाटले पैसे बिचारे धावले घोडे
☆
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
