कविराज विजय यशवंत सातपुते
कवितेचा उत्सव # २९६ – विजय साहित्य
☆ देवपुजा…! ☆ कविराज विजय यशवंत सातपुते ☆
☆
पुजार्चन करताना
करू सोळा उपचार
आवाहन देवतांना
घडे दर्शन त्रिवार….! १
*
देऊ आसन मंत्राने
लाभण्याला सुखासन
पाद्यपुजा करूनीया
यशप्राप्ती संकलन…! २
*
अर्घ्य सुगंधी जलाने
लाभे मना समाधान
आचमन गंगाजल
होई आनंद विधान…! ३
*
स्नान घालता देवास
मिळे जिवनात सुख
पंचामृत देता देवा
स्नेह माधुर्य सन्मुख…! ४
*
अभिषेक देवतांना
स्थैर्य शांततेचा लाभ
वस्त्र अर्पिता प्रेमाने
लाज राखी पद्मनाभ…! ५
*
यज्ञोपविताचा मान
मोक्षप्राप्ती लाभतसे
गंध लावता देवाला
ज्ञानप्राप्ती गेही वसे…! ६
*
फुले अर्पिताच मिळे
सर्व सुख समाधान
कुंकू हळद पिंजर
लाभे सौभाग्याचे दान..! ७
*
अलंकार देता देवा
मनी श्रीमंतीचा वास
धूप प्रक्षालन करी
कीर्ती ऐश्वर्य प्रवास…! ८
*
दीपदान सौख्य मोठे
ज्ञान वैराग्य लाभते
प्रासादिक नैवेद्याने
अन्नपुर्णा सुखावते…! ९
*
आरतीच्या गजरात
प्रसन्नता नांदे धामी
प्रदक्षिणा घालताना
लाभ स्वामित्वाचा नामी…! १०
*
श्रीफलाने पुजार्चना
दावी सौख्याचे शिखर
दुर्वा तुलसी बेलाने
कृपा हस्त शिरावर…! ११
*
मंत्र पुष्पांजली देई
सुख समृद्धीचे देणे
अक्षतांनी परिपुर्ण
सोळा उपचार लेणे…! १२
*
नमस्कार स्विकारावा
विनयाने विनवणी
सह कुटुंब प्रार्थना
नको दुर्भाग्य मन्मनी…! १३
*
यथाशक्ती यथामती
करू पुजा मनोभावे
नाना लाभ फलदायी
अशा देव पुजनाने….! १४
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
