श्री तुकाराम दादा पाटील
कवितेचा उत्सव
☆ मेंदी… ☆ प्रा तुकाराम दादा पाटील ☆
☆
“ .. “ कवी : तुकाराम पाटील
मेंदी
हातावरची तुझ्या साजणी अजून आहे मेंदी ओली
मुरेल तितकी गडद होउनी खुलून येते छानच लाली
तुझे भेटणे ठरले तेव्हा निरोप होता तुला मिळाला
तूच मनाने अवघडलेल्या वाट पाहिली झाडा खाली
झाली ओळख पहिली तेव्हा मनात होती धडकी भरली
दोघांमधले मिटवून अंतर अशीच झाली होती बोली
होकाराने जुळले नाते फुलून गेलो आनंदाने
दोघांनाही तेव्हा कळले बोलायाचे हसून गाली
उगी कशाला भांडायाचे रुसवे फुगवे पाळायाचे
संसाराच्या प्रगतीसाठी होतच असते बोलाचाली
दोघांनीही चुका शोधल्या तिथेच झाली सारी गलती
समेटघडला क्रोध निवळला रात निवळली सुंदर झाली
जगणे म्हणजे कसरत असते जीवन भर ती करत जायची
जपत जायची सर्व माणसे वावरणारी सभोवताली
नकोस चिंता करत बसू तू खुशाल गावू जीवन गाणे
संसाराची खांद्यावरती पेलायाची असते डोली
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
