श्री शेखर किसनराव पालखे
☆ साप्ताहिक स्तम्भ – शेखर साहित्य # 14 ☆
☆ अव्यक्त!!! ☆
आतमधून, अगदी आतमधून
उचंबळून आल्याशिवाय….
भावनांच्या लाटेवर उंचच उंच
स्वार झाल्याशिवाय …
शब्दांचा कोंडमारा मनात
असह्य होत असला तरीही
उतरत नाही एखादी कविता
कागदावर अलगद हळुवारपणे
मी वाट पाहतोय तिच्या जन्माची
सहन होईनाशा झाल्यात आताशा
या कळा…. किती काळ????
मी अव्यक्त राहतोय अजूनही..
तिच्यासाठी नाही निदान माझ्यासाठी तरी प्रसवावं तिनं स्वतःला लवकरच
म्हणजे मी होईन रिकामा
एखाद्या नव्या कवितेच्या वेणांसाठी…
© शेखर किसनराव पालखे
सतारा
06/04/20
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
