Category: कवितेचा उत्सव 2

श्रीमति उर्मिला उद्धवराव इंगळे

आई तुळजाभवानी मातेच्या विविध रुपात बांधण्यात येणाऱ्या पूजेच्या वर्णनात  आजच्या चारोळ्या गुंफल्या आहेत

– साधक उर्मिला इंगळे

☆ केल्याने होतं आहे रे ☆

श्रीचामुण्डेश्वरी चरणावली -4

वध दैत्यांचा करुनी

माता तुळजाभवानी

देवतांची करे मुक्ती

कृष्णकांती ही कल्याणी!!

 

केली मुरली अर्पण

भयभीत सर्व देव

भवानीच्या मुरलीने

स्वर्गप्राप्ती अनुभव!!

 

मुरलीची महापूजा

आवर्जून बांधतात

अलंकार महापूजा

नवरात्री उत्सवात !!

 

छत्रपती शिवाजींना

तलवार भेट दिली

धर्म रक्षणाच्या साठी

माय भवानी धावली!!

 

विष्णूदेव विसावले

शेषशैय्येच्या वरती

घेत होती अंबामाता

नेत्र कमळी विश्रांती!!

 

विष्णूदेवांची ती शैय्या

अंबा मातेला अर्पण

शेषशायी अलंकारे

तिचे होतसे पूजन !!

 

अष्टादश भुजा देवी

दैत्य महिष मारीला

सर्व देवतांचे तेज

पराक्रम घडविला !!

 

महालक्ष्मी शोभे रुप

वध महिषा सुराचा

घेतलासे अवतार

आदिशक्ती या रुपाचा !!

 

छत्रपती शिवरायाला

आशीर्वाद द्यावयाला

आली तुळजाभवानी

किल्ले प्रतापगडाला !!

               क्रमश:   …..

©️®️ साधक- उर्मिला इंगळे

श्री अशोक श्रीपाद भांबुरे

 

स्वतःशीच मी बोलत असता, तीही असते माझ्या सोबत

तिला टाळणे शक्यच नाही, हेच मनाला असतो सांगत

 

तिच्या स्मृतीला चौकट नाही, भिंती नाही, नाही खोली

सुक्ष्म मनाच्या गाभाऱ्यातुन, येउन माझी भूमि व्यापली

मनी उतरते व्यापुन घेते, उगाच नाही खोटे बोलत

तिला टाळणे शक्यच नाही, हेच मनाला असतो सांगत…

 

सारीपाट हा तिच्या स्मृतिचा, कसा आवरू खेळ प्रीतिचा

बंदिवान या चौकटीत मी, खेळ चालला अटीतटीचा

खेळामधली कवडी झालो, नाही दुसरा रस्ता शोधत

तिला टाळणे शक्यच नाही, हेच मनाला असतो सांगत…

 

क्षणा क्षणाला तिचीच सोबत, सुख शांतीही असते कायम

मंत्राची या जादू मोठी, ठायी ठायी दिसतो सोहम संसाराची अवीट गोडी, जीवन लाभो असेच अविरत

तिला टाळणे शक्यच नाही, हेच मनाला असतो सांगत…

 

© अशोक श्रीपाद भांबुरे

धनकवडी, पुणे ४११ ०४३.

ashokbhambure123@gmail.com

मो. ८१८००४२५०६, ९८२२८८२०२८

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈

 ☆ कवितेचा उत्सव ☆ समाधान ☆ श्री अविनाश सगरे ☆ 

 

सोड पिच्छा भौतिक सुखाचा

करतोय राज्य तो आसक्तीचा

 

नमले रे भलेंबुरेंही नियतीपुढे

काय होईल तुझ्याने वाकडे?

 

अमर असल्याचा भास तुला

ना कळेरे कधी जीव उडाला

 

पुरव कितीही भोग देहमनाचे

नाही समाधान या वाळवंटाचे

 

साठा खोट्याचा विपुल केला

झरां खर्याचा आटतच गेला

 

नाही संवाद कधी अंतःकरणा

पूजा करत राहिला बाह्यमना

 

नाही गात कोण सत्यपोवाडे

कुणांरे वेळ बघण्या तुझे मढे

 

© श्री अविनाश सगरे.

मु.पो.जयसिंगपूर.

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

श्रीमति उर्मिला उद्धवराव इंगळे

नवदुर्गांच्या औषधी रुपांचे वर्णन आजच्या चारोळ्यांमध्ये आहे.

या चारोळ्या अष्टाक्षरी छंदात गुंफलेल्या असून ” रुणुझुणुत्या पाखरा ” या सिनेगीताच्या चालीवर म्हणायला खूप छान वाटतं.

– साधक उर्मिला इंगळे

☆ केल्याने होतं आहे रे ☆

श्रीचामुण्डेश्वरी चरणावली -3

 

दुर्गा देवीच्या नऊ रुपांपैकी आज रुप सात ते नऊ .

उर्वरित आई तुळजाभवानीची विविध रुप वर्णनाच्या चारोळ्या.

 

रुप दुर्गेचे सातवे

विजयदा कालरात्री

नागदवण औषधी

प्राप्त विजय सर्वत्री !!

 

मन मस्तिष्क विकार

औषध विष नाशिनी

कष्ट दूर करणारी

सुंदर सुख दायिनी !!

 

रुप दुर्गेचे आठवे

नाम तिचे महागौरी

असे औषधी तुळस

पूजिताती घरोघरी!!

 

रक्तशोधक तुळशी

काळी दवना पांढरी

कुढेरक षटपत्र

हृदरोग नाश करी !!

 

रुप दुर्गेचे नववे

बलबुद्धी विवर्धिनी

हिला शतावरी किंवा

म्हणती हो नारायणी

 

बलवर्धिनी हृदय

रक्त वात पित्त शोध

महौषधी वीर्यासाठी

औषधाचा गुणबोध !!

 

दुर्गादेवी नऊ रुपे

अंतरंग भक्तीमय

करु औषधी सेवन

होऊ सारे निरामय !!

 

येगं येगं अंबाबाई

आई तुळजाभवानी

तुझे वर्णन करण्या

आहे अपुरीच वाणी!!

 

देवी ललिता सुंदर

नाकी नथ मोतियाची

भास्कराने दिला रथ

दिव्य रत्ने सव्यसाची !!

 

माते तुझ्या मंदिराला

शोभे कळस सोन्याचा

तुझ्या डोईवरती गं

‌शोभे मुकुट सोन्याचा !!

 

तुझ्या मुकुटात हिरे

पायी सोन्याचे पैंजण

झळकते प्रभावळ

पैंजणांची रुणझुण !!

 

अष्टभुजा देवी माता

मूर्ती उंच दोन फूट

मूर्ती मागे प्रभावळ

डोईवरती मुकूट !

 

हाती ढाल तलवार

बाण धनुष्य कमळ

अशी आयुधे हातात

मूर्ती सुरेख तेजाळ !!

 

शेंडी महिषासुराची

डाव्याहाती पकडली

हाती उजव्या त्रिशूळ

देवी वेगाने धावली !!

 

!!श्रीजगदंबार्पणमस्तु!

 

                क्रमश: …..

©️®️ साधक- उर्मिला इंगळे

 ☆ कवितेचा उत्सव ☆ ही अशी माणसं ☆ श्री प्रकाश लावंड ☆ 

इथं माझी माणसं

तिथं तुझी माणसं

थुंकी झेलण्या तत्पर

सारी खुजी माणसं

 

ही कुलंगी माणसं

ही लफंगी माणसं

पार्टी बदलणारी

ही दुरंगी माणसं

 

ही बेसुरी माणसं

ही बकासुरी माणसं

दानवांना लाजविती

ही असुरी माणसं

 

ही पलटती माणसं

ही उलटती माणसं

खोटं हसून खरं

ही दडपती माणसं

 

चिणून टाकावीत

ही खिदळती माणसं

कोंडून घालावीत

ही उधळती माणसं

 

© श्री प्रकाश लावंड

करमाळा जि.सोलापूर.

मोबा 9021497977

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

श्रीमति उर्मिला उद्धवराव इंगळे

नवदुर्गांच्या औषधी रुपांचे वर्णन आजच्या चारोळ्यांमध्ये आहे.

या चारोळ्या अष्टाक्षरी छंदात गुंफलेल्या असून ” रुणुझुणुत्या पाखरा ” या सिनेगीताच्या चालीवर म्हणायला खूप छान वाटतं.

– साधक उर्मिला इंगळे

☆ केल्याने होतं आहे रे ☆

श्रीचामुण्डेश्वरी चरणावली -2

मार्कण्डेय पुराणात

सांगितले आहे असे

दु:ख दैन्य ग्रहपीडा

देवी दूर करीतसे !!

 

नवरात्री पर्वकाल

उपोषण फलदायी

आदिशक्ती आदिमाया

आशीर्वाद नित्य देई !!

 

उपासना नवरात्री

आदिमाया देवीशक्ती

महालक्ष्मी महाकाली

बुद्धी दात्री सरस्वती !!

 

नवरात्री तिन्ही देवी

युक्त अशी नऊ रुपे

औषधांच्या स्वरुपात

जगदंबा सत्वरुपे !!

 

मार्कण्डेय चिकित्सेने

नऊ गुणांनी युक्त ती

ब्रह्मदेवही तिजला

दुर्गा कवच म्हणती !!

 

नऊ दुर्गांची रुपे ही

युक्त आहेत औषधी

उपयोग करुनिया

होती हरण त्याव्याधी !!

 

शैलपुत्री ती पहिली

रुप दुर्गेचे पहिले

हिमावती हिरडा ही

मुख्य औषधी वर्णिले !!

 

हरितिका म्हणजेच

भय दूर करणारी

हितकारक पथया

धष्टपुष्ट करणारी !!

 

अहो कायस्था शरीरीं

काया सुदृढ करिते

आणि अमृता औषधी

संजीवन आचरीते !!

 

हेमवती ती सुंदर

हिमालयावर असे

चित्त प्रसन्नकारक

जणू केतकीच दिसे !!

 

यशदायी ती श्रेयसी

शिवा ही कल्याणकारी

हीच औषधी हिरडा

शैलपुत्री सर्वा तारी !!

 

क्रमश:….

©️®️ साधक- उर्मिला इंगळे

 ☆ कवितेचा उत्सव ? शोध मनातल्या मनाचा ? श्री राजेंद्र परांजपे ☆ 

 

अरे आहेस कुठे? कधीचा मी शोधतोय तुला!

माझ्यातल्या मला मी साद घालतो पुन्हा पुन्हा !

 

इतकी वर्ष झाली, कधीच निवांत भेटला नाहीस !

गप्पा मारू म्हंटल तर जरा जवळ बसत नाहीस !

 

तसं लांबूनच बघतो म्हणा, कधीकधी मी तुला !

वाटतोस जरा ओळखीचा पण खात्री नाही मला !

 

राहतोस तू माझ्याच मनात, कुठल्यातरी कोपऱ्यात !

पण कसं शोधू सांग, तुला मी इतक्या ह्या पसाऱ्यात?

 

तरीही हुडकून काढतोच कधीतरी तुला मी हिय्या करून !

आणि हिंडवतो तुला, माझ्याच कवितांच्या मखरांमधून !

 

पण मला माहित आहे तुझा अस्थिर, चंचल स्वभाव !

हळूच सटकतोस तिथून, आणि उंडारतोस गावोगाव !

 

बरेच दिवस तुला विचारीन म्हणतो, पण धीर होत नाही !

किती पेला संपला, किती आहे भरलेला, सांगशील काही ?

 

तुला तरी काय माहित म्हणा, तू तर माझ्यातच भरलेला !

कसा वेडा मी, विचारतोय माझ्याच मनातल्या मनाला !

 

© श्री राजेंद्र परांजपे

१३ मार्च २०२०

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈

सौ. अस्मिता इनामदार

 ☆ कवितेचा उत्सव ☆ लावणी ☆ सौ.अस्मिता इनामदार ☆ 

 

जरतारीच्या साडीचा हा पदर हाती धरा

जिवलगा मला संगतीनं घेऊन फिरा ||

 

नवी नव्हाळी अंगी ल्याली

काया माझी मुसमुसलेली

जीव कसाहा आसुसला हो

नाही मनाला थारा..

जिवलगा मला संगतीनं घेऊन फिरा….

 

पिरतीची ही रीतच न्यारी

विरहाची ती सुरी दुधारी

जीव ओढतो तुम्हासाठी हो

लवकर या ना घरा…

जिवलगा मला संगतीनं घेऊन फिरा…

 

तुम्हासाठी मी सजले धजले

वाट पाहूनी डोळे थकले

किती दिसांनी तुम्ही आला हो

जाऊ नका माघारा…

जिवलगा मला संगतीनं घेऊन फिरा….

 

© सौ अस्मिता इनामदार

पत्ता – युनिटी हाईटस, फ्लॅट नं १०२, हळदभवन जवळ,  वखारभाग, सांगली – ४१६ ४१६

मोबा. – 9764773842

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈

स्व. इंदिरा संत (इंदिरा दीक्षित)

 ☆  कवितेचा उत्सव ☆ दिवनाली ☆ स्व. इंदिरा संत ☆ 

(या कवितेचे काव्यानंद मध्ये रसग्रहण सौ.अमृता देशपांडे)

सदोदित अवतीभवती तुझे असणे दरवळावे

म्हणून तुझ्याकडे एकच फूल मागितले

तर – माझ्या अंगणातील हिरवेगार वृक्ष

तिन्ही त्रिकाळी सतत बहरत राहिले ll

 

कानात अखंड गुंजत रहावा म्हणून मी

तुझा फक्त एक शब्द हवा म्हटले

तर – तू समुद्राच्या गाजत्या लाटांचे

फेनिल तुषारवेल माझ्या कानांवर गुंफलेस ll

 

तुझ्या स्पर्शाच्या अबीर- प्रसादासाठी मी

तुझ्यापुढे मनोभावे मान उंचावून धरली

आणि तुझ्या मध्यमेची कोमल लाली

माझ्या कपाळावर ज्योतीशी

उमटली ll

 

या तुझ्या सा-या अपरूपात मी

संध्या रंगासारखी उजळून गेले,

तेवती दिवनाली झाले ll

 

स्व. (इंदिरा दीक्षित) इंदिरा संत

(चित्र साभार मराठी विश्वकोश https://vishwakosh.marathi.gov.in)

(या कवितेचे रसग्रहण काव्यानंद मध्ये दिले आहे.)

सौ अमृता देशपांडे

पर्वरी- गोवा

9822176170

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈