Category: कवितेचा उत्सव 2

सुश्री त्रिशला शहा

कवितेचा उत्सव 

☆ चला जाऊया पिकनिकला… ☆ सुश्री त्रिशला शहा ☆

सुट्टीच्या दिवसात पिकनिकला कुठे जायचं ते ठरवा.

(चाल- चल उड जा रे पंछी)

चला जाऊ पिकनिकला,पाहुया भारत देश हा न्यारा……..

 

कोकणचे ते रुप मनोहर, सागराच्या लाटा

आंबा,फणस,काजूंचा मेवा,शहाळ्याचा गोडवा

निसर्गाचा मस्त नजारा,पाहून घेऊ चला ना

        चला जाऊ….

 

मस्त फुलांच्या सुंदर  बागा, अनुपम्य काश्मीरला

सफरचंद,अक्रोडचा  साठा,दाल सरोवरी फेरा

बर्फाच्या राशीत खेळता,आनंद अनुभवू खरा

      चला जाऊ……

 

राजस्थानची बातचं न्यारी,महल,पँलेसची दाटी

वाळूमधुनी फिरण्यासाठी,उंटाची सफारी

माऊंट अबू अन् शहर गुलाबी, डोळे भरुनी पाहाण्या

     चला जाऊ……

 

सुंदर बीच अन् माडांची  शोभा,समुद्राची गाज

चर्च,मंदिर सुरेख तिथे,निसर्गाची लयलूट

गोव्याची ही सुपीक भूमी,पाहून येऊ चला ना

    चला जाऊ…….

 

हिमालयात बर्फांच्या राशी,दरी-खोऱ्यांची चढाई

मानसरोवरी भक्तीचा महिमा,’हर’ दर्शन कैलासी

बद्री,केदार मंदिर सुंदर,गंगेचा उगम पहाण्या

    चला जाऊ……

© सुश्री त्रिशला शहा

मिरज 

 ≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ कृष्णचित्त… ☆ श्रीशैल चौगुले ☆

एक मनाचे बिंब

नाचे गोकुळात

कृष्ण लिलेचे भाव

साचती डोळ्यात.

 

तुडूंब जळांशयात

डुंबता विहार

गोपगडी ते सारे

काल्याचे शिवार.

 

त्या यमुना तीराशी

रंगे डाव खरा

जीवन या अर्थाचा

कळे गम्य फेरा.

 

राक्षस नि मानव

प्रकृती- प्रवृत्ती

ज्ञानाचीच ऊकल

मन कृष्ण चित्ती.

 © श्रीशैल चौगुले

९६७३०१२०९०

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री रवींद्र सोनावणी

 कवितेचा उत्सव 

☆ प्रेमरंग … ☆ श्री रवींद्र सोनावणी ☆ 

 जागेपणी प्रिये तू, डोळ्यापुढे असावी

मिटताच लोचने मी, स्वप्नातही दिसावी. || धृ ||

 

झुकवून नेत्र खाली, रोखून ते पहाणे,

जणू पाहिलेच नाही, असले तुझे बहाणे,

पदरास  पीळ भरता, नेहमीच तु दिसावी      ||१||

 

तू रेखीता कपोली, ती चंद्रकोर लाल,

मुखचंद्र लाजुनी ग, होईल लाली लाल,

जास्वंदी सम लाली, गाली सदा दिसावी  ||२||

 

आषाढ मोकळा तू, झटकू नकोस वेडे,

हरवून भान जाते, वेल्हाळ प्रेम वेढे

गजऱ्यांस माळताना, खिडकीत तू दिसावी ||३||

 

जा तू खूशाल आता, झुकवून नेत्र खाली,

काळीज फेकले मी, वाटेत भोवताली,

तुडवीत काळजाला, जाता सदा दिसावी ||४||

 

ते दक्ष लक्ष जेव्हा, डोळ्यात रंगते ना!

पाहू नको, कि पाहू? माझे मला कळेना,

प्रीती तुझी न माझी, अद्वैत आज व्हावी ||५||

 

© श्री रवींद्र सोनावणी

निवास :  G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५

मो. क्र.८८५०४६२९९३

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

 कवितेचा उत्सव 

☆ टिचकी… ☆ अरूण ☆

सकाळ भरभर निघून जाते,

उन्हं सरसर वाढत जातात,

कुठवर आलाय मेसेजचा पक्षी

मनाचे पंख फडफडवीत राहतो,

काळीजडंखही होत राहतो,

जोपर्यंत तुझं अलवार अस्तित्व

उतरत नाही मोबाईलच्या स्क्रीनवर,

मन तरुची पाने सळसळत राहतात,

घड्याळाचे काटे पुढे सरकत राहतात,

अन् प्रतिक्षेच्या सागरलाटा धडकत राहतात पुनःपुन्हा

मोबाईलच्या काचेवर टिचकी मारत…! 😊

साभार – श्री अरुण 

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ.मंजुषा आफळे

 कवितेचा उत्सव 

☆ अभंग… ☆ सौ. मंजुषा आफळे ☆

नित्य ते भजन | हरीचे स्मरण||

श्रद्धा जागरण | संतवाणी ||

 

देई समाधान | अंतरात ज्योत||

समईची वात | तेवताना||

 

आनंदे वंदन | ठेविले मस्तक||

आवडे स्वस्तीक | दारातले ||

 

मन चिंब ओले | स्वर बरसती ||

गाऊया आरती | भक्तिभावे ||

 

गंध दरवळ | शांत गाभार्‍यात ||

भेट एकांतात | विश्वनाथा ||

 

पाठीशी उभा जो | विठ्ठल सावळा ||

जीव होई गोळा | पाहताना ||

 

एकादशी दिनी | शब्दांची गुंफण ||

आले मी शरण भगवंता || 

 

© सौ.मंजुषा सुधीर आफळे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

 कवितेचा उत्सव 

☆ नदीचे गाणे… ☆ वि.म.कुलकर्णी (विनायक महादेव कुलकर्णी) ☆

वि.म.कुलकर्णी. (स्मृतीदिन) – (ऑक्टोबर ७, इ.स. १९१७ – मे १३, २०१०)

नदीचे गाणे

दरीदरीतुन,वनावनातुन

झुळझुळ मी वाहत येते,

मी मंजुळ गाणे गाते,

मी पुढेच धावत जाते.

 

वसली गावे तीरावरती,

त्यांना भेटून जाते पुढती,

लतावृक्ष किती काठावरती,

भूमितूनी जे मला भेटती.

 

फुलवेली मज सुमने देती,

कुठे लव्हाळी खेळत बसती,

कुठे आम्रतरू माझ्यावरती,

शीतल अपुली छाया धरती.

 

पाणी पिऊनी पक्षी जाती,

घट भरूनी कोणी जल नेती,

गुरे -वासरे जवळी येती,

मुले खेळती लाटांवरती.

 

मी कोणाची–मी सर्वांची

बांधुनिही मज नेणा-यांची!

जेथे जाईन- तेथे फुलवीन,

बाग मनोहर आनंदाची.

 – वि.म.कुलकर्णी (विनायक महादेव कुलकर्णी)

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री सुमन किराणे

 कवितेचा उत्सव 

☆ पिलं गेली दूर दूर… ☆ सुश्री सुमन किराणे ☆

पिलं इवली इवली

घरट्यात झाडावर

आणि घरट्याचा सारा

भार  दोन  फांद्यावर

        पर्ण नक्षीच्या पदरी

        मिळे जीवाना उबारा

        झुलवितो झुल्यामध्ये

        ममतेचा मंद वारा

पाजवूनी गोड रस

भार वाहिला मायेनं

कुशी हिरव्या फांद्यांच्या

जीव वाढती जोमानं

        पंख फुटता सुंदर

        फांद्या लागती हसाया

        पिला वाढविण्यासाठी

        किती झिजविली काया

येता बळ पंखामध्ये

सारी निघाली उडून

आणि बिचारं घरटं

कसं झालं सुनं सुनं

        फांद्या वाकल्यात आता

        एक मेकांचा आधार

        शोधे बारीक नजर

        पिलं गेली दूर-दूर

 

© सुश्री सुमन किराणे

पत्ता – मु.पो. हेर्ले, ता. हातकणंगले, जि. कोल्हापुर.