Category: कवितेचा उत्सव 2

श्री उदय गोपीनाथ पोवळे

 कवितेचा उत्सव 

☆ पाऊस ☆ श्री उदय गोपीनाथ पोवळे ☆ 

पाऊस टाळ मृदूंग

वाटे विठ्ठल माउली

माळकरी ते दंग

भासे देवाची सावली

 

पाऊस बडवी ढोल

पाऊस तडतड ताशा

कधी जोशात बोल

भासे मांडला तमाशा

 

पाऊस नाचे लावणीय

पाऊस दिसे लक्षणीय

रंभा उर्वशी नर्तकी

भासे अप्सरा स्वर्गीय

 

पाऊस पहाटे भूपाळी

निशेला जोड भैरवीची

पाऊस मेघ मल्हार

भासे बैठक सुरावटीची

 

पाऊस बासरी कान्हाची

कधी मोहक अवखळ 

पाऊस एकतारी मीरेची

भासे ओंकार निखळ

 

पाऊस प्रतीक मैत्रीचे

धरती गगन भेटीचे

पाऊस वाजवी सनई

भासे मिलन अद्वैताचे

 

© श्री उदय गोपीनाथ पोवळे

मो. नं. ९८९२९५७००५. 

ठाणे

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सुश्री अरूणा मुल्हेरकर

 कवितेचा उत्सव 

☆ मृगजळ ☆ सुश्री अरूणा मुल्हेरकर ☆ 

दिसे दूर तो एक जलाशय

रूप मनोहर तसेच निर्मळ

भुलोनी जाऊ नको मानवा

ते तर आहे केवळ मृगजळ

 

संसार ही तर माया

धावू नकोस मृगजळापाठी

मोह तो तर क्षणिक सुखाचा

नलगे काही तुझ्याच हाती

 

झेलुनिया वादळ वारे

ताठ उभे तरूवर सारे

सुखदुःखात समभाव ठेवुनी

तू पण मनुजा उभा रहा रे

 

ईश्वरनिर्मित अवघी सृष्टी

आनंद असे जीवनाचा

जीवन परि हे आहे नश्वर

नको ध्यास मृगजळाचा

 

सत्य असे तो परमात्मा

असत्य बाकी सारे

धाव घेऊनी ईश्वरचरणी

मुखी रामनाम घ्या रे.

 

©  सुश्री अरूणा मुल्हेरकर

डेट्राॅईट (मिशिगन) यू.एस्.ए.

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

डॉ मेधा फणसळकर

कवितेचा उत्सव  

☆ तरी प्रश्न वेडा ☆ डॉ मेधा फणसळकर ☆ 

इथे सावलीला, सुखाच्या किनारी

तरीही जरासे,उभे ऊन दारी|

 

असे केवड्याला, सुगंधी कहाणी 

कशी वेढते रे, मिठी ही विषारी|

 

उगवत्या सकाळी, झळाळी नव्याची

धुक्याने स्वतःची, पसरली पथारी|

 

गुलाबी फुलांचे, गुलाबी इशारे

परी हाय काटा, रुते का जिव्हारी?

 

मनाच्या तळाशी, निराकार सारे

तरी प्रश्न वेडा, पुन्हा तो विखारी|

 

© डॉ. मेधा फणसळकर

मो 9423019961

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सौ.ज्योत्स्ना तानवडे

 कवितेचा उत्सव 

☆   !!  प्रार्थना  !!  ☆ सौ.ज्योत्स्ना तानवडे ☆ 

भक्त जनांचा कैवारी तू

नमितो गजवदना

दुःख सरू दे गर्व हरू दे

स्वीकारी “प्रार्थना”

गणेशा, स्वीकारी प्रार्थना ||

 

सकल जनांचा तू अधिनायक

सकल कलांचा तू वरदायक

रिद्धी सिद्धीचा तू भवतारक

                 देवा दे दर्शना

गणेशा, स्वीकारी प्रार्थना ||

 

जन अपराधा उदरी घेसी

कृपाप्रसादे प्रसन्न होसी

मनात तुझिया अपार प्रीति

            देई तव दर्शना

गणेशा, स्वीकारी प्रार्थना ||

 

© सौ.ज्योत्स्ना तानवडे

वारजे, पुणे.५८

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सुश्री मंजुषा सुनीत मुळे

 कवितेचा उत्सव 

☆ गणेश विसर्जन ☆ सुश्री मंजुषा सुनीत मुळे ☆

नाद रंग अन उत्साहाचा , उत्सव चाले चोहीकडे

             परि या जल्लोषात हरवली, उत्सवमूर्ती कुणीकडे ——-

 

दहा दिवस त्या मांडवात ,बांधून घातले त्यालागी

             आज त्यास किती बरे वाटले, घरी जाण्याची घाई उगी —–

 

रात्रीपासून मोटारीवर बसवून त्याला ठेवियले

               सहनशील हा गजानन परि, आसन ना त्याचे ढळले —–

 

सकाळपासून जल्लोषाला पूर पहा हो किती आला

                वाजतगाजत जमले सगळे, उधाण आले उत्साहाला —–

 

मोटारीवर मुकाट बसुनी, गणपती सारे पहात होता

                 जाणवले त्यालाही होते, तो त्या गर्दीत चुकला होता —–

 

लेझीम-ढोल नि टिपरीचा तो तालही गर्दीमध्ये हरवला

                 धांगडधिंगा किती चालला, विसरलेच त्या गजाननाला —-

 

छंदच नित त्या ,सकल जनांना चकवीत असतो नशीब रूपे

                  म्हणे, “ आज मी स्वतःच चकलो, चकविती ही माझीच रूपे “—–

 

विचार करता करता थकुनी, गजाननाचा लागे डोळा

                   दचके जेव्हा जागे होता दिसे तळपता सुवर्ण गोळा ——

 

जाण्याचा की दिन पालटला, कसल्या भक्तांशी ही गाठ

                    जातो जातो म्हणतो तरिही सोडती ना ते त्याची वाट ——

 

“पुढच्या वर्षी नक्की येईन “ म्हणे “ एक परि शर्त असे

                    लैलामजनूची गाणी नको, मज सनई-चौघडा पुरे असे ——

 

बीभत्स वर्तन कुठे नसावे, मंगल वातावरण हवे

                     माझ्या नावे सर्वार्थाने जनजाग्रण व्हायाची हवे “—–

 

—- गजाननाचेही मन हाले, या भक्तांचा निरोप घेता

                   जलमार्गे जाताजाता त्या पाण्यावर हलती लाटा —–

 

—–” काल स्वतःतच आम्ही गुंगलो, जणू  त्याचाही विसर की पडला

                       आज तयाला निरोप देता, मनमांडवही रिताच झाला “ ——-

 

© सुश्री मंजुषा सुनीत मुळे

९८२२८४६७६२.

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

 कवितेचा उत्सव 

पुनरागमनायच  श्री प्रमोद जोशी 

कशा पताका धागा सोडून आल्या खाली!

त्याना कळले …….आनंदाचा गेला वाली!

 

फुटे हुंदका पाट रिकामा…..पाहुन मखरा!

उदबत्त्याना सहन होईना….गंधित नखरा!

 

जाण्यासाठी यावे हा का….नियम तुला रे?

निर्माल्यास्तव उमलुन यावे नियम फुला रे!

 

रांगोळीचे विस्कटणे हा…….भाव मनाचा!

परतीच्या गाडीत कोंबणे……भार तनाचा!

 

मूर्ती नव्हती कधी मानली……कुटुंबीय तू!

अश्रद्धेच्या श्रद्धा होता………..वंदनीय तू!

 

श्रीफळ आता एकाकी बघ……पाटावरती!

विसर्जनाने येई अवकळा…….काठावरती!

 

विरहाची ही नाही कविता…..अस्फुट टाहो!

निरोप कुठला?स्वागत घेण्या लौकर या हो!

 

पुन्हा रोजचे जगणे आणि…….खोटे हसणे!

मिटून डोळे बघतो पुन्हा…….मखरी बसणे!

 

साथ सोडुनी दुर्वा आल्या…….पाण्यावरती!

शोक तरंगे अता सुखाच्या……गाण्यावरती!

 

© श्री प्रमोद जोशी

देवगड.

9423513604

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सौ. उज्वला सुहास सहस्रबुद्धे

 कवितेचा उत्सव 

☆ प्रार्थना गणेशास… ☆ सौ. उज्वला सुहास सहस्रबुद्धे☆

गजानना, तू वक्रदंता ,

   सज्ज झालो तुझ्या स्वागता!

सोंड हलवीत येई तू आता ,

  रूप तुझे सुखवी अनंता !

 

सुपा एवढे कान तुझे ते

  गंडस्थळ हे तुला शोभते !

तीक्ष्ण नजर तुझी रोखून बघते,

  स्वारी तुझी ही डौलातच येते!

 

देतो आम्हास चांगली बुद्धी ,

  तूच असशी तो संकटनाशी !

साकडे घालतो तुलाच आम्ही,

 नांदो,

स्वास्थ्य, आरोग्य, संपदा तिन्ही!

 

येतोस जरी काही दिवसापुरता,

 साथ दे आम्हा अखंड आता !

सोडवी संकटापासून या जगता,

 विनऊ आम्ही  तुला प्रार्थिता!

 

© सौ. उज्वला सहस्रबुद्धे

वारजे, पुणे (महाराष्ट्र)

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈