Marathi Kavita
श्रीशैल चौगुले
कवितेचा उत्सव
☆ स्मृती सावली… ☆ श्रीशैल चौगुले ☆
☆
मनातल्या ईच्छांना स्पर्श वेदनेचा
वियोगात स्मृतींना शाप साधनेचा.
*
भाव होऊनी एकजूट स्पंदनात
गतजन्मीच्या त्याच खुणा स्फुंदणेचा.
*
सांगत मी जावे पुन्हा, साक्ष प्रांगणेचा
सुंदर जीवन की संसार झिंगणेचा.
*
सावली घेऊनी आयुष्य क्षितीज पार
रंग भिन्न हेतूत चित्र पांगणेचा.
☆
© श्रीशैल चौगुले
मो. ९६७३०१२०९०.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
श्री आशिष बिवलकर
चित्रकाव्य
माझी मायबोली… श्री आशिष बिवलकर ☆
☆
(१)
मराठी प्रसवे | माझी मायबोली |
ज्ञानियांची वाली | राजभाषा ||१||
*
मराठी धरते | ज्ञानाची सावली |
भाषांची माऊली | जगी श्रेष्ठ ||२||
*
मराठी दाखवी | जगाची खिडकी |
सर्वांची लाडकी | मातृभाषा ||३||
*
मराठी गिरवी | हाती बाराखडी |
मुळाक्षर कडी | ज्ञानासाठी ||४||
*
मराठी शिकवी | संतांचे वचन |
ज्ञानाचे लोचन | अध्यात्माने ||५||
*
मराठी पाजते | मुखी बाळकडू |
पराक्रम घडू | कर्तूत्वाने ||६||
*
मराठी फोडते | मदांध ते तख्त |
क्षात्रधर्म व्यक्त | सामार्थ्यांने ||७||
*
(२)
जन्माला आल्यावर,
बोबडे बोल आले ओठी |
श्वासाश्वासात जगतो,
माझी भाषा माय मराठी |
*
अमृताहुनही गोड,
जीची महती वर्णावी जगजेठी |
ज्ञानाचा महासागर,
सामावते माझी माय मराठी |
*
शब्दातून व्यक्त होण्यासाठी,
जन्मोजन्मी जिव्हेशी जोडल्या गाठी |
कशाचीही तमा न बाळगता,
व्यक्त होताना बोलतो मराठी |
*
संतांनी आयुष्य खर्चले,
समाजाच्या उध्दारासाठी |
साध्या सोप्या शब्दात,
लिहल्या ओवी मराठी |
*
नाठाळांच्या माथी हाणायाला,
वापरतो शब्दरुपी काठी |
संताप व्यक्त करतांना,
शिव्यांची लाखोली वाहतो मराठी |
*
कविता लिहिण्याचा छंद जडला,
मी असेल नसेल.. त्याच स्मरतील पाठी |
माझ्या शब्दांवर प्रेम करणारे,
काव्य रसिक असतील मराठी |
©️ वास्तवरंग
☆
(चित्र सौजन्य – श्री आशिष बिवलकर)
© श्री आशिष बिवलकर
28/01/26
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री प्रमोद वामन वर्तक
कवितेचा उत्सव
🙏जि व ल ग ! 🙏☆ श्री प्रमोद वामन वर्तक ☆
☆
आता थांबवीन म्हणतो
जरा शब्दांशी खेळणे,
त्यांनी तरी किती नाचावे
सदा माझ्या मनाप्रमाणे!
*
कशी कोण जाणे याची
लागली शब्दांना कुणकुण,
रागावून सोडले त्यांनी
माझ्या डोक्यातील ठाणं!
*
गेले असेच दोन दिवस
सरल्या दोन रात्री,
‘ते‘ परतणे शक्य नाही
मज याची झाली खात्री!
*
पण आज पडली अवचित
थाप डोक्याच्या दारावर,
उघडून पाहता दिसले
माझेच मला जुने मैतर!
*
गळा भेट होता आमची
दोघे मनोमनी सुखावलो,
नाही सोडणार साथ कधी
एकमेका वचन देते झालो!
एकमेका वचन देते झालो!
☆
© प्रमोद वामन वर्तक
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610
मो – 9892561086 ई-मेल – pradnyavartak3@gmail.com
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री नीलांबरी शिर्के
चित्रकाव्य
वात्सल्याचा गाव सुश्री नीलांबरी शिर्के ☆
☆
(१)
घरी परतता संध्याकाळी
कोणी तरूणी लेकुरवाळी
मना पिलाची ओढ लागते
तटतटते अंगी काचोळी!!
*
पिलू भुकेले नजरेपुढती
पाय आपसूक वेगाने पडती
पिलू पाहता वक्षामधूनी
अमृत धारा बरसत जाती!!
*
कवयित्री : नीलांबरी शिर्के
(२)
गायीच्या न् आईच्या नेत्री
वात्सल्याचा वसतो गाव
बुडी मारूनी तिथे खोलवर
घ्यावा म्हणते त्याचा ठाव!!
*
नाक दाबुनी डोळे मिटले
आणि तळाशी गेले थेट
सदाचार अन संस्कृतीचे
ममताभरले काळीज बेट!!
*
त्या गावातुन फिरता जाणवे
निरामय विचारसहवास
पावन हळवी लहर भरवी
आपुलकीने विचार घास!!
*
तृप्तपणे माघारी फिरताना
मातृत्व वात्सल्य मिळे वसा
वसा घेऊन परतताना
भरला जाई काळीज कसा!!
☆
© सुश्री नीलांबरी शिर्के
मो 8149144177
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कविराज विजय यशवंत सातपुते
कवितेचा उत्सव # २८३ – विजय साहित्य
☆ दोषी…! ☆
(मात्रा वृत्त – २५ मात्रा)
☆
माझ्याआधी, मलाच गेले, वाचून कोणी
उपदेशाचे, डोस पाजले, हासून कोणी. १
*
चेष्टा, टिंगल, आणी टवाळी, झाली कविता
आदर देता, सादर झाले, आतून कोणी.२
*
घनिष्ठ झालो, बघता बघता, या मनी नांदलो
काळजास त्या, दिली उभारी, राहून कोणी. ३
*
हळवेली पण, मधाळ बोली, संजीवन ते
श्वास फुलांचे, अत्तर गेले, माखून कोणी.४
*
नको तेवढे, वाटत गेलो, धन शब्दांचे
अक्षर काळे, भास्कर झाले, लाजून कोणी.५
*
जपली नाती, वेळ देऊनी हिशेब नाही
नाते गेले, मनासारखे, वागून कोणी.६
*
मतभेदाचे, आले वारे, कडकड नाही
घरात गेले, वहात तेव्हा, पाहून कोणी.७
*
हाकेसरशी, दमात एका, आधार झालो
विश्वासाला, हलाल केले, मागून कोणी.८
*
घर शेणाचे, घर मेणाचे, जमले नाते
अनुभवांचे, दार घेतले, लावून कोणी.९
*
हात लिहिते, थांबले कधीचे कळले नाही
विडा निरोपी, हातावरचा, चाखून कोणी.१०
*
लळा लावूनी, गळा कापला, कविराजाचा
स्वभाव ठरला, दोषीच तेव्हा, टाळून कोणी.११
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ.ज्योत्स्ना तानवडे
कवितेचा उत्सव
☆ फटका ☆ सौ.ज्योत्स्ना तानवडे ☆
!! श्री!!
(उपक्रम – हरिभगिनी वृत्त – फटका)
(मात्रा ८|८|८|६)
☆
मना जाण रे मनोबोध तू समर्थ शिकवण जाणावी
मना चांगले वाग नेटके विवेक संगत राखावी ||
*
नको हाव रे धनद्रव्याची गरजेपुरते जोडावे
समाधान हे मनात असते व्यर्थ धावणे सोडावे ||
*
अती क्रोध अन अती मस्करी हानीकारक बघ ठरते
नियम बंधने तोडता मना संसाराचे सुख सरते ||
*
व्यसने घातक रोग शरीरा त्यांची संगत धरू नको
देह संपदा मूल्यवान ती हेळसांड तू करू नको ||
*
झाले गेले विसरुन सारे जिवलगांसवे बंध हवे
आयुष्याचे रूप देखणे बनत जातसे नवे नवे ||
*
मृदू बोलणे नित्य असावे कथन करावे प्रेमाने
माणसातल्या देवत्वाला वंदन करणे विनयाने ||
*
मायपित्यांची सेवा करणे कर्तव्याला चुकू नको
पाठीराखा देव होतसे नामस्मरणा टाळु नको ||
☆
© सौ.ज्योत्स्ना तानवडे
वारजे, पुणे.५८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्रीमती उज्ज्वला केळकर
कवितेचा उत्सव
☆ आयुष्य: एक प्रवास… ☆ श्रीमती उज्ज्वला केळकर ☆
☆
आयुष्य: एक प्रवास
करायचा बिनधास्त
वाटचाल करायची कुठून?
राजरस्त्यावरून की पायवाटेवरून?
नियती ठरवेल तिथून
त्या प्रवासात
काय असेल पायाखाली
हिरवळीची मऊ मखमल
की काट्या-कुटयांचे बन
हिरवळ असेल, तर
डोळे निवतील, पाय सुखावतील
पण लागलेच वाटेत काटे-कुटे तर,
करायची नाही कुरकुर.
मग पायच करावे टणक, दणकट
की कटयांनीच कुरकुर करावी.
मान खाली घालावी.
देवाजीने, हात, पाय, डोळे, मन
करावे समर्थ
मग येईना का आम्हा
रात्रंदिन युद्धाचा प्रसंग
☆
© सौ. उज्ज्वला केळकर
संपर्क – निलगिरी, सी-५ , बिल्डिंग नं २९, ०-३ सेक्टर – ५, सी. बी. डी. – नवी मुंबई , पिन – ४००६१४ महाराष्ट्र
मो. 836 925 2454, email-id – kelkar1234@gmail.com
≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
सौ. रेणुका धनंजय मार्डीकर
चित्रकाव्य
गरसोळीची श्वेतपाकळी… सौ.रेणुका धनंजय मार्डीकर ☆
(वृत्त : पादाकुलक, मात्रा : 8+8=16)
☆
तुझा नाजूक नखरा राजा
जणू मोरणी चमचम नाकी
उमलली सान ती सूर्यफुले
बटव्यात तुझ्या पुंजी बाकी
*
तुझ्या गुणाला तोडच नाही
बंदुकीचेच फूल शोभले
कंबरमोडी तव् नामाने
किती फायदे तुझे लाभले
*
एकदांडीत दगडी पाला
दिसे वेलीस वेढली पाने
असेे कुठेही रानोमाळी
कशी बहरली सजली राने
*
नाही केली कुठे लागवड
नाही जपले तुझ्या फुलाला
माळरानात वाढवले रे
भगवंताने तुझ्या रुपाला
*
कुटकुटी तुला गुडघेमोळी
गरसोळीची श्वेत पाकळी
पिवळा गोंडा शोभून दिसे
किती नाजूक तुझी रे कळी
*
तुझ्या फुलाला गुंफत गेले
त्याचे गजरे सुंदर झाले
शब्द अलवार त्यात गोवता
काव्यसाजात समोर आले
☆
© सौ.रेणुका धनंजय मार्डीकर
औसा.
मोबा. नं. ८८५५९१७९१८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
सुश्री वर्षा बालगोपाल
चित्रकाव्य
आनंदी जीवन… सुश्री वर्षा बालगोपाल ☆
☆
कुठे जन्मलो यास महत्व न देणे
आशावाद हृदयी धारून येणे
कुठेही कसेही फुलारून जाणे
हेच जाणसी तू आनंदी जगणे ||
*
आनंदी जगणे देई दुसऱ्या आनंद
अवचित हृदयी येतसे मकरंद
जरी पंकात त्या विलसे अरविंद
विष्णू लक्ष्मी येती रूपे मिलिंद||
*
रूपे मिलिंदाचा होई गुंजारव
भ्रमणातून लाभे दूजा जागी ठाव
विस्तार किर्तीचा लाभे त्यास गाव
जिद्दीने जगे त्यास मिळे आदर्शाचा वाव||
☆
© सुश्री वर्षा बालगोपाल
मो 9923400506
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सूचना/Information
(साहित्यिक एवं सांस्कृतिक समाचार)
सौ. ज्योती कुलकर्णी
💐 अ भि नं द न 💐
सिद्ध लेखिका समुहातर्फे आयोजित राज्यस्तरीय गझल लेखन स्पर्धेत आपल्या समुहातील ज्येष्ठ कवयित्री सौ. ज्योती कुळकर्णी यांना प्रथम क्रमांक मिळाला आहे.
ई-अभिव्यक्ती मराठी तर्फे सौ. कुळकर्णी यांचे मनःपूर्वक अभिनंदन आणि शुभेच्छा 💐💐
पुरस्कार प्राप्त कविता ‘असे केले कधी नाही‘ आज प्रकाशित होत आहे. 🪻
संपादक मंडळ
ई अभिव्यक्ती मराठी
☆ ☆ ☆ ☆ ☆
कवितेचा उत्सव
☆ “असे केले कधी नाही” ☆ सौ. ज्योती कुलकर्णी ☆
(सिद्ध लेखिका समुहातर्फे आयोजित राज्यस्तरीय गझल लेखन स्पर्धेत – प्रथम पारितोषिक प्राप्त)
☆
कुणी मज नाव ठेवावे असे केले कधी नाही
जरी मी नाव काढावे असे केले कधी नाही
*
कसे देवास मी मागू? निरोगी ठेवले त्याने
नियंत्याने कमी द्यावे असे केले कधी नाही
*
जरी मी हारले असले तरी वृत्ती खिलाडू ना!
रडीचे डाव खेळावे असे केले कधी नाही
*
दिल्या जखमा मलाही तर जगाने बोचऱ्या काही
जगाने बोल लावावे असे केले कधी नाही
*
कुठे मी आपल्या केली भलाई वागण्याची का?
कुणी वाईट वागावे असे केले कधी नाही
☆
© सौ. ज्योती कुलकर्णी
अकोला.
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
