सुश्री नीता कुलकर्णी
☆ नवरात्र… आज अष्टमी… ☆ सुश्री नीता चंद्रकांत कुलकर्णी ☆
नवरात्रीच्या पहिल्या दिवशी सप्त धान्य पेरलं होतं.
आज ते उगवून वर आलेलं आहे हिरवीगार लुसलुशीत पात आपल्या नजरे समोर आहे.
काही पेरलं की ते उगवून वर येतच…..
फक्त काय पेरायचं याच भान आपण ठेवायला हवं .
एक साधं बीज पेरलं की त्यातून कणीस बाहेर येतं.
सृजनाचा हा सोहळा आपल्या डोळ्यासमोरच होतो.
आज त्या महागौरीसमोर बसा.
हातात टाळ घ्या आणि तिची आरती करा…
तिच्या स्तुती ची गाणी म्हणा.
आत आहे ते बाहेर येऊ द्या…
न लाजता छान मोठ्या आवाजात म्हणा.
मला आतून म्हणावसं वाटतं आहे मी म्हणणार असं म्हणा आणि अनुभव घ्या.
आर्ततेनी म्हटली जाते ती आरती
रामदास स्वामींनी संकटी पावावे निर्वाणी रक्षावे….
अशी गणरायाला विनंती केली आहे.
निर्वाणी… …
या शब्दाशी क्षणभर थांबा …
त्यातला खोल गर्भित अर्थ ध्यानात येईल.
दुःख,क्लेशातून भावपाशातून आम्हाला सोडव …….
ही आशा आपण अंबेकडूनच करू शकतो.
माय भवानी तुझे लेकरू…
लेकरू …
शब्द उच्चारला की त्यात सगळं आलं…
ईतक लहान व्हयच…
आईच्या कुशीतच शीरायच…
लल्लाटी भंडार
दूर लोटून दे अंधार….
कुठला अंधार?
अज्ञानाचा…
हे समजलं की पुढचं सोपं होईल.
जनार्दन महाराज सांगतातच बोधाची परडी हातात घेऊन ज्ञानाचा पोत पाजळायचा आहे.
देवीच्या सर्वांग सुंदर रूपाची वर्णन करणारी पदं म्हणा.
नसू दे तुमचा सूर सुस्वर ….
तिला तुमचा आतला आवाज ऐकायचा आहे …
तो निर्मळ आणि शुद्धच असतो….
आज त्या जगतजननीकडे जोगवा मागा
आनंदाचा……..
तो असला की बाकी सगळं आपोआप होत.
मग आज घरी तुमचा तुम्हीच गोंधळ गाऊन आईसाहेबांचा उदो उदो करा
मग म्हणा आता ….
अंबाबाईचा उदो उदो
रेणुका देवीचा उदो उदो
आदी मायेचा उदो उदो
तुळजाभवानी आईचा उदो उदो
महालक्ष्मी चा उदो उदो
सप्तशृंगी चा उदो उदो
हळू आवाजात कशाला म्हणताय?
जय जय कार चांगला जोरातच होऊ दे की…
आपल्या भवानी मातेच नवरात्र आहे. …..
© सुश्री नीता चंद्रकांत कुलकर्णी
मो 9763631255
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
