संगीता कुलकर्णी
चित्रकाव्य
– मी नृत्यांगना… – संगीता कुलकर्णी ☆
☆
घुंगरांच्या नादात माझे आभाळ झंकारते
पावलांच्या तालावर चांदणेही थिरकते
लयीच्या लाटांवर स्वप्नांची नौका वाहते
माझ्या प्रत्येक मुद्रेत एक कहाणी गाते
*
मी नृत्यांगना देहातली दीपशिखा
अंधाराच्या वाटेवर उजळते अंतरीची रेखा
नयनी दडलेले शब्द ओठांवर न येती
हातांच्या मुद्रांतून मनोगते उमलती
*
रंगमंच माझा.. कधी रण.. कधी देव्हारा
टाळ्यांच्या गजराआड संघर्षांचा पसारा
कपाळावर घामाचे मोती ओठांवर हसू
हरलेल्या क्षणांनाही शिकवते मी नवे ऋतू
*
ठेचकाळले पाऊल तरी ताल सोडत नाही
तुटलेल्या स्वप्नांना पुन्हा गुंफल्यावाचून राहात नाही
प्रकाशझोतात माझी सावलीही नाचते
माझ्यातली स्त्री स्वतःलाच नव्याने वाचते
*
घुंगरू माझे केवळ अलंकार नाहीत
ते माझ्या जिद्दीचे श्वास माझे संस्कार आहेत
मी नाचते तेव्हा काळही क्षणभर थांबतो
मी नृत्यांगना माझ्यातला आत्मा ताल धरतो..!
☆
© संगीता कुलकर्णी
लेखिका /कवयित्री
ठाणे
9870451020
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
