Category: कवितेचा उत्सव 2

श्री शरद कुलकर्णी

 कवितेचा उत्सव 

☆ परतीची वाट… ☆ श्री शरद कुलकर्णी ☆

☆

डोहाचे काळे पाणी,

पायाला स्पर्शून गेले.

छळवादी कृष्णछायेने,

मन औदुंबरच झाले.

हैदोस आर्त पाखरांचा,

रडवून तरुंना गेला.

अवचित जसा की मजला,

पानगळीचा अर्थ समजला.

काळजाला पाडीत पीळ,

शीळ घालत वारा गेला.

दाटूनी अचानक मेघ,

पाऊस सुखमय आला.

दुथडी नदी ही वहाते,

दुःखांचे घेउन पाणी.

हाकेच्या अनुषंगाने,

येईन मी अनवाणी.

ओलावून पाऊस गेला,

ऐलपैलाचे आपले काठ.

शोधीन एकट्याने मी,

परतीची हरवली वाट.

☆

© श्री शरद  कुलकर्णी

मिरज

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

डाॅ. विष्णू वासमकर

 कवितेचा उत्सव  

☆ केशवाच्या सुता पुसा तुम्ही ☆ डाॅ. विष्णू वासमकर☆ 

☆

कवितेचा तीर | विस्तारेल कोण

ऐसा नही जाण | भूमीवरी

भूमीवरी साऱ्या | कवी फार झाले

दुरापास्त झाले | रसिक ते

रसिकांनी साऱ्या | कवीला छळावे

कवीला तळावे | तेलामध्ये

तेलामध्ये कवी | तडफडतील

बडबडतील | काही बाही

काहीबाही काही | कविता करिती

करून दाविती | लोकांमध्ये

लोकांना वाटले | कवी हे माजले

माजले कसले | पुंड झाले

अशा ह्या कवींना | काय समजावे

समजुनी घ्यावे | कवितेला

कविता नव्हे ही | एक पोरखेळ

जमुनीया तोल | यावा लागे

यावे लागे बोल | निखळ अस्सल

प्रतिभेचे बोल | असती हे

अस्सल प्रतिभा | आणि व्युत्पत्ती

अभ्यासे निष्पत्ती | काव्यकला

आकाशीची वीज | असते कविता

केशवाच्या सुता | पुसा तुम्ही

☆

© डाॅ. विष्णू वासमकर

सांगली

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री किशोरी उपाध्ये

स्व-परिचय 

मी किशोरी उपाध्ये.

झेन्सार टेक्नॉलॉजीज येथे १७ वर्षं नोकरीचा अनुभव.
संगीत विशारद.
आता पूर्ण वेळ लिखाणासाठी देते असून,
कविता, लेख, कथा आणि कादंबऱ्या लिहिते.
अनेक कथा आणि कविता पारितोषिक प्राप्त असून अनेक दर्जेदार अंकांतून छापून आलेल्या आहेत. 🙏🏻
गायन, तसेच जपानी भाषा शिकवते.

 कवितेचा उत्सव 

☆ गाणे असे मीच व्हावे… ☆ श्री हरिश्चंद्र कोठावदे ☆

☆

जे मला वाटते गुणगुणावे।

गाणे असे मीच व्हावे।।धृ।।

शब्द व्हावे निळे अंतरीचे धुके।

ओठी येऊनही राहिले जे मुके।

सूर आळवुनिया त्यांस गावे।।

गाणे असे मीच व्हावे।।१।।

*

वाहते सृष्टिबिंबास धरुनी उरि।

जाऊनी श्यामला त्या नदीच्या तीरी।

गंध वाऱ्यातले पिऊन घ्यावे।।

गाणे असे मीच व्हावे।।२।।

*

डोंगरांचे ऋतू भूमिचे सोहळे।

सूर साऱ्यांतुनी भेटती सावळे।

चांदणे होऊनिया झुलावे।।

गाणे असे मीच व्हावे।।३।।

☆

©  सुश्री किशोरी उपाध्ये

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री प्रभा सोनवणे

कवितेच्या प्रदेशात # २८७

☆ प्रेम… ☆ सुश्री प्रभा सोनवणे ☆

☆

प्रेम म्हणजे काय?

कुठे कळते, जे तुझ्या माझ्यात,

जाणवलेच नाही कधी,

अगदी उंबरठ्यावरचं माप ओलांडून,

मन हेच गुणगुणले,

“आले तुझिया घरी….

कराया तुझीच रे चाकरी”

किती बाळबोध मन,

लग्न हेच आयुष्याचं

इतिकर्तव्य,

हेच मनावर बिंबलेलं—-

पण कुठं माशी शिंकली,

समजलंच नाही!

आणि सुरू झाला,

समांतर रेषांवरचा प्रवास!

 पण आज “संध्याछाया”

भिववित असताना,

तुझ्या आवाजात,

तिच ‘जरब’ ,

मालकी हक्काची…

आणि आजही माझ्या मनात,

उसळणारी बंडखोरी,

यालाच प्रेम म्हणत असावेत बहुतेक,

कौटुंबिक भाषेत!

☆

© प्रभा सोनवणे

संपर्क – “सोनवणे हाऊस”, ३४८ सोमवार

पेठ, पंधरा ऑगस्ट चौक, विश्वेश्वर बँकेसमोर, पुणे 411011

मोबाईल-९२७०७२९५०३,  email- sonawane.prabha@gmail.com

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री हरिश्चंद्र कोठावदे

 कवितेचा उत्सव 

☆ मागणे… ☆ श्री हरिश्चंद्र कोठावदे ☆

☆

अंतर्यामी सदैव माझ्या

 तुझा मूळचा झरा झुळझुळो

 स्फटिकजळी ह्या तुझी निळाई

 प्रतिबिंबासह नित्य खळखळो

* 

 कधीतरी मी कोणासाठी

 तुझ्या नभासम दाटुन यावे

 सुकू लागल्या तृणपात्यांवर

 दवबिंदूंचे ओघळ व्हावे

 *

 तुझ्या धुक्यातुन दिसत रहावे

 विरुप बोचरे सत्यहि सुंदर

 एक बोडका डोंगरसुद्धा

 पर्वतराणा व्हावा क्षणभर

 *

 तेजतत्त्व ते तुझे शुभंकर

 पणतीमध्ये माझ्या यावे

 कानमंत्र तू दे तिजला रे

 स्वतः जळावे जग उजळावे

 *

 असे झाडपण लाभो जन्मा

 सर्व ऋतू अंगावर घ्यावे

 उंच नभांगणी जाता जाता

 मातीमध्ये खोल रुजावे

 *

 सर्जन सिंचन संहाराचे

 चक्र फिरे तव चराचरातुन

 ठेव अबाधित जीवननिष्ठा

 स्थितीगतीतुन कळिकाळातुन

 *

 तुझी भव्यता तुझी दिव्यता

 नित नेमाने मला पुजू दे

 तुझीच नियती होता वैरी

 हाती मजला वज्र घेउ दे!

 ☆

© श्री हरिश्चंद्र कोठावदे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ आत्म दिशा… ☆ श्रीशैल चौगुले ☆

☆

कधी तो स्वयं जाणताना

आधार ती प्रतिमा होते

तरी, अपरिचीत स्वतःशी

आत्मऋणी गरिमा होते.

 

रंग-बेरंगी कर्म छाया

सौंदर्य अंतसीमा होते

भव विरक्ती भाव छटा

बंध मनाचे कामा येते.

 

निर्माल्य लोचनी भविष्य

विचार मुद्रा रेषा होते

देह परिचय संपता

केवळ आत्म दिशा होते.

 ☆

© श्रीशैल चौगुले

सुश्री मंजुषा सुनीत मुळे

 कवितेचा उत्सव 

☆ “आतुर…” ☆  सुश्री मंजुषा सुनीत मुळे  ☆

☆

धुंद मंद गंध हा

रातराणी बहरली

प्रीत मन्मनीची गं

अशीच आज मोहरली ।।

*

तव स्मृती या मनी जाग्या

भान माझे हरपते

रोमरोमी फुलवती गं

स्वप्न जणू साकारते ।।

*

माझी कधी होशील राणी

वाट सतत मी पाहतो

रातराणीच्या परी गं

रात्र रात्र मी जागतो …

रात्र रात्र मी जागतो ।।

☆

©  सुश्री मंजुषा सुनीत मुळे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री विश्वास दाते

अल्प परिचय 

• प्लांट हेड किंवा बिझनेस हेड म्हणून बऱ्यापैकी वरिष्ठ पदांवर अनेक वर्षांच्या कारकिर्दीसह भारत आणि परदेशातील उद्योगात पस्तीस वर्षे काम केल्यानंतर, 2005 मध्ये ते फिलिप्समधून चीनमध्ये निवृत्त झाले.
• सेवानिवृत्तीनंतर, १५ वर्षे, प्रगती लीडरशिप इन्स्टिट्यूट, पुणे, यांच्याशी संलग्न झाले. ४१ विविध व्यवसायांना, व्यवसाय सल्लागार, गुणवत्ता आणि व्यवस्थापन विकासामध्ये प्रशिक्षण आणि समुपदेशन सुविधा देणारा म्हणून मदत केली.
• त्यांचे इंग्रजीतील पुस्तक ‘Hi There! – माझ्या कॉर्पोरेट प्रवासातील कथा आणि विचार’ आता बाजारात असून कॉर्पोरेट् आणि शैक्षणिक संस्थांद्वारे, एक ‘लर्निंग गिफ्ट आर्टिकल’ म्हणून वापरले  जात आहे.
• वेगवेगळ्या व्यवस्थापन संकल्पनांवर आधारित त्यांचे दुसरे कथांचे मराठी पुस्तक ‘नमस्कार, ऐकलत का?’ प्रकाशित झाले आहे. हे पुस्तक विशेषतः लघु आणि मध्यम (SME) उद्योजक / व्यवस्थापकांसाठी आणि नोकरीच्या बाजारपेठेत प्रवेश करणाऱ्या अंतिम वर्षाच्या विद्यार्थ्यांसाठी लिहिलेले आहे.
• ‘Friendly Stories’ हे काल्पनिक गोष्टींचे आणि ‘काजव्याचे कवित्व’ हे कविता आणि लेख असलेले, अशी दोन पुस्तके प्रकाशित झाली आहेत.
• ‘Learning Management through Q&A’ आणि ‘संकोच’ ही दोन पुस्तके प्रकाशनासाठी तयार आहेत.
• लेखक अभियांत्रिकीचा पदवीधर असून व्यवसाय व्यवस्थापनात पदविका घेतली आहे.
• वयाच्या ७९ व्या वर्षी, विश्‍वास, पुणे येथे, त्याच्या पत्नी, दोन विवाहित मुले आणि चार नातवंडांसह समाधानी जीवन जगत आहे.

 कवितेचा उत्सव 

☆ आणखी काय हवे जीवाला? ☆ श्री विश्वास दाते ☆

☆

झुकू लागले वय ऐंशीला

तरीही वाटे तरुण आजला

आणखी काय हवे जीवाला?

* 

थंड झुळूक देते शिरशीरी

कितीतरी जरी काळ लोटला

आणखी काय हवे जीवाला?

 *

हरदिनी सुचती नव्या कल्पना

मनी सदा आनंदाचा मळा

आणखी काय हवे जीवाला?

 *

स्वप्नामधील सखी लाभली

मनसोक्त सहप्रवास झाला

आणखी काय हवे जीवाला?

 *

चार जिने चढतोय सहजी

भरपूर चालता येतेय मजला

आणखी काय हवे जीवाला?

 *

पाऊस येता सुगंध आला

पटकन जातो त्यात भिजायला

आणखी काय हवे जीवाला?

*

चिक्की दाणे चावू शकतोय

तयार असतो हॉटेलात जायला

आणखी काय हवे जीवाला?

 *

मनासारखे काहीही खातोय

अजुनी आहे चव की भज्याला

आणखी काय हवे जीवाला?

* 

मित्रांसंगे मारतोय गप्पा

मुले नातवे येती भेटायला

आणखी काय हवे जीवाला?

 *

तासंतास वाचन करतोय

सिनेमे पाहायचा आहे लळा

आणखी काय हवे जीवाला?

 *

मनात आले चालवतो स्कूटर

कार चालवायचा नाही कंटाळा

आणखी काय हवे जीवाला?

 *

एक दोन जरी व्याधी असती

चिंता नाही त्यांची मजला

आणखी काय हवे जीवाला?

 *

व्याज पुरेसे येई हाताला

कर भरतांना शांती मनाला

आणखी काय हवे जीवाला?

 *

जुन्या आठवणी येती सारख्या

भविष्याची तरी चिंता न मला

आणखी काय हवे जीवाला?

 *

कुतूहलाला जरी घालतो आवर

जग बघायचय अजुनी मला

आणखी काय हवे जीवाला?

 *

स्वप्नामध्ये फिरून येतोय

पडल्या पडल्या लागतोय डोळा

आणखी काय हवे जीवाला?

 *

झुकू लागले वय ऐंशीला

तरीही वाटे तरुण आजला

आणखी काय हवे जीवाला?

 ☆

© श्री विश्वास दाते 

संपर्क –  चिन्मय अपार्टमेंट, 54, मयूर कॉलनी, कोथरूड, पुणे 411038 मो +९१ ९८५००३५३६२, vishwasdatye@gmail.com

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री अनिल वामोरकर

 कवितेचा उत्सव 

☆ दोष कुणाचा?… ☆ श्री अनिल वामोरकर ☆

☆

केर मनातला

राहून गेला तसाच

मनाला मी म्हणालो

कर काही….

*

मन म्हणाले मला

दुष्ट तर ते डोळे आहेत

भुलवितात, चाळवितात

नेहमीच मला….

*

ते दोघेच नाही

तर हे नाकही कमी नाही

हुंगून मज सैरभैर करते

मी काय करू…

*

कानही तसेच आहे

नको ते ऐकोनी

मम डोक्यात साठवी कुविचार सतत….

*

हाताने स्पर्षावे

पायाने तिकडेच धावावे

संपूर्ण अवयवचि मज

हरवित आहे…

*

जिव्हा केवळ

गुरुमंत्राचा जाप करोन

मम स्थिर करू इच्छिते

तीच माझी त्राता…

☆

© श्री अनिल वामोरकर

अमरावती

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈