कविराज विजय यशवंत सातपुते
कवितेचा उत्सव # २८२ – विजय साहित्य
☆ अमर जाहले छत्रपती…! ☆
☆
मर्द मराठी काळजात या
अमर जाहले छत्रपती.
माय जिजाऊ पोटी जन्मले
स्वराज्य रक्षक…हे नृपती ..(१)
*
गनिमी कावा शस्त्र घेऊनी
दिले अभय ते रयतेला.
शौर्य, शक्तीचे मूर्त रूप हे
मावळ माती. .. दिमतीला.. (२)
*
प्रचंड गडी त्या स्वराज तोरण
इतिहासातील सुवर्ण चांदी .
माता, भगिनी, जाण ठेवली
रायगडी त्या. . . स्वराज्य नांदी.. (३)
*
गडकोटांची हीच निशाणी
पराक्रमाची गाते गाथा
गड राखिले , गडी अर्पिले
दिगंत कीर्ती. . . झुकतो माथा… (४)
*
औरंग्याला जेरीस आणूनी
पाणी पाजले यवनाला
असा शिवाजी होणे नाही
काळ सांगतो . . . काळाला …(५)
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
मुग्धी देखण्या गुच्छात… 
