Tag: #मराठी-कविता

सौ. रेणुका धनंजय मार्डीकर

  चित्रकाव्य  

चाफ्या रे चाफ्या… सौ.रेणुका धनंजय मार्डीकर ☆

☆

चाफ्या रे चाफ्या 

तुला रंग किती, गंध तरी किती

मन माझे मोहवी तुझ्या संगती…

… १

*

चाफ्याची फुले आली ती फुलुनी

सुगंध दरवळ आसमंतातुनी,

प्रथमदर्शनी तुज अंगणी पाहुनी

बालपण माझे आले फुलारुनी…

… २

चाफ्या रे चाफ्या तुला रंग तरी किती…

*

सोनचाफ्या तुझे सुंदर आयुष्य

बाटलीत बंद तुला ठेवू वर्ष-वर्ष

विठूच्या चरणाशी करता तू स्पर्श

पाहुनी ते रूप गंध दाटे मनी हर्ष…

… ३

चाफ्या रे चाफ्या तुला रंग तरी किती..

*

हिरव्या चाफ्या तुझा सुगंधची फार

पानामध्ये फूल दिसे हिरवेगार,

सुगंध दरवळ परिसर व्यापी

ओंजळीत भरावा हा अत्तर बहार…

… ४

चाफ्या रे चाफ्या तुला रंग तरी किती…

*

पानांमध्ये फुले पहा आली अगणिक

लाल चाफ्या तुझा लाल लाल रंग

हिरव्या कोंदणात भासे जणू माणिक

सुवासाने मन तुझ्या होई माझे दंग

… ५

चाफ्या रे चाफ्या तुला रंग तरी किती…

*

नागचाफ्या तुला नसे की रे गंध

परी फुलारुन दिसे तू देखणा

श्वेतरंग तुझा देतो रे आनंद,

पान तुझे भासे जणू सापाचा रे फणा

… ६

चाफ्या रे चाफ्या तुला रंग तरी किती…

*

कवठी चाफा, देव चाफा, गुलाबी चाफा

सारवल्या अंगणी फुले घेऊ वेचुनी

अनेक रंग रूपे गंधाळी चाफा,

चाफ्याच्या संगती मन गेले गुंतुनी…

… ७

चाफ्या रे चाफ्या तुला रंग तरी किती..

*

चाफा चाफा फुले आला रे फुलून

प्रथम दर्शनी मोहरून गेले मन

ईश्वराची लीला अगाध पाहून

ओंजळीत चाफा गंधाळला क्षण…

… ८

चाफ्या रे चाफ्या तुला रंग तरी किती…

☆

© सौ.रेणुका धनंजय मार्डीकर

औसा.

मोबा. नं.  ८८५५९१७९१८

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

सौ. ज्योती कुलकर्णी

  चित्रकाव्य  

 सीमा… ☆ सुश्री ज्योती कुलकर्णी ☆

☆

जमीन आणिक पाण्यानेही

हद्द ठरवली अस्तित्वाची

सीमारेषा आखत गेले

म्हणून गोडी बघ जगण्याची 

*

निसर्गातले सगळे सगळे

समजत जगले जबाबदारी

पाळुनी खरे तर मर्यादा

खुशाल जगणे हयात सारी

*
आकाशाला नाही सीमा

पण बरोबरी करू नका हो

शीव सोडुनी गेला सागर

प्रलय केवढा घडेल ना हो

*

भूकंपाने असेच घडते

जीवन सारे भंग पावते

दया सोडुनी क्रूर वागणे

मानवतेला लांछन ठरते

*

दिले आखुनी देवाने जे

नियम अम्हाला सर्वांनाही

हस्तक्षेप जर केला नाही

जीवन अपुले घडेल शाही

☆

कवयित्री : सुश्री ज्योती कुलकर्णी

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ असा हेमंत… ☆ श्रीशैल चौगुले ☆

☆

मोती ढळतात तेंव्हा

माती अश्रुनी भिजते

पान-पान पापण्यांनी

किती धरती सजते.

*

हळूच थंडी हिवाळा

कोट्यात पाखरु शांत

सकाळ कशी हसरी

देहा हुडहुडी प्रांत.

*

चौफेर हरिते चिंब

धुक्यात सूर्य झाकून

अजून पहाट भासे

माथ्यावर तेज बिंब.

*

आकडून पुन्हा ताजे

ओलेती पाकळी फूल

स्वप्नांचे स्वर्ग भुवरी

हेमंत मानवा भुल.

*

क्वचित कोकिळी साद

ओहोळे पैंजणी गाणे

निरभ्र शुभ्र नभात

पंख वा-यास दिवाणे.

*

हटकून आठवणी

पुन्हा बिलगून जीवा

मिठीत घ्यावे तारुण्य

विझण्या आधी सांजवा.

 ☆

© श्रीशैल चौगुले

श्री आशिष  बिवलकर

  चित्रकाव्य  

कर्तव्याच्या पदपथावर !!  श्री आशिष  बिवलकर ☆

☆

अंधारल्या वाटेवर,

कंदील हाती धरतो |

अनोळखी वाटेवर,

तिमिर सहज सारतो |

*

भय नसतेच मुळी,

अनोळखी वाटांचे |

नौका होऊन झेलतो,

हेलकावे लाटांचे |

*

कंटक आले वाटेत,

घायाळ कसे करतील?

स्पर्श पावलांचा होताच,

टोचणे तेच विसरतील |

*
कर्तव्याच्या पदपथावर,

फुलती मोहाच्या फुलबागा |

रोखून धरतो पावलांना,

हृदयी सत्य-सचोटीचा धागा |

*

कलयुगात ठरे पुण्य दुर्दैवी,

अन् पाप असते भाग्यशाली |

माहित जरी असले सारे,

करतो तत्वांची रखवाली |

*
कोणी कितीही प्रयत्न केले तरी,

जपल्या तत्वांची साथ सुटत नाही | 

यामुळेच आरशात चेहरा पहातांना,

स्वतःची लाज कधीच वाटत नाही |

©️ वास्तवरंग

☆

(चित्र सौजन्य – श्री आशिष बिवलकर) 

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ शेतकरी… ☆ प्रा तुकाराम दादा पाटील ☆

☆

तुमच्या ओठी घास भरवण्या बसला शेतकरी

कर्जापायी मरणादारी गेला शेतकरी

*

सगळ्यांसाठी अविरत झिजला होता नेटाने

उचला त्याच्या देहाला  या मेला शेतकरी

*

नाही केली किंमत त्याची खोट्या नेत्यांनी

दिवसा ढवळ्या सडकेवरती आला शेतकरी

*

मागत होता साधे पाणी रोज पिकासाठी

पण घामाने निथळततेव्हा भिजला शैतकरी

*

कौतुक नाही केले कोणी त्यांच्या कष्टाचे

फुकट्या होता लेखी तुमच्या ठरला शेतकरी

*

नाही जपले केली माती त्याच्या जन्माची

लोभी झाला सत्तेसाठी लुटला शेतकरी

*

सरले आता सगळे गेले केली बरबादी

भुलथापांना भुलला वेडा फसला शेतकरी

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री सुजित कदम

 कवितेचा उत्सव 

☆ ओल…! ☆ श्री सुजीत कदम  ☆

(छंद : अष्टाक्षरी…)

☆

प्रेम गुलाबाचे फूल

तुझ्या गाली फुललेले

एका  एका पाकळीत

आठवांनी नाहलेले…!

*

प्रेम कवितेचे घर

सुख दुःखाचे माहेर

कधी आसू,  कधी हासू

देई ओठांनी  आहेर…!

*

प्रेम सागराची गाज

त्याला किनारी  आसरा

नको नदी  आसवांची

हवा चेहरा हासरा…!

*

प्रेम गुलाबाचा काटा 

काढी काट्यानेच काटा

तुझ्या डोळ्यात फुलल्या

जीवनाच्या ओल्या वाटा…!

*

दव बिंदू पुरे एक

घेतो टिपूनीया प्रेम

ओल काळजाची माझ्या

माझ्या शब्दात सप्रेम…!

☆ 

© श्री सुजित कदम

पुणे

मो. 7276282626

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

मेहबूब जमादार 

 कवितेचा उत्सव 

☆ सातबारा… ☆  मेहबूब जमादार ☆

☆

आज मातीने माझ्या का बरं फारकत घ्यावी

 फाटक्या आभाळानं का तिची साथ सोडावी

*

मागच्या काळी नेमक्या वेळी पाऊस यायचा

 राबणारा शेतकरी हिरव्या रानाकडे पहायचा

*

आभाळानं दिल्यामुळे सारं रानच फुलून जायचं

सळसळणाऱ्या वाऱ्याने शिवार मस्त डोलायचं

*

गेला बदलून काळ, फुटल रानात आभाळ

 पिकासंग माती ही नेऊन गेला रौद्र काळ

*

आला महापुर रुतुनी गेला मज काळजात सारा

 शेतकऱ्यांचा कसा कोरा होईल बरं? सातबारा

☆

© मेहबूब जमादार

मु. कासमवाडी,पोस्ट -पेठ, ता. वाळवा, जि. सांगली

मो .9970900243

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री नीलांबरी शिर्के

  चित्रकाव्य  

आनंदाने जगणं…  सुश्री नीलांबरी शिर्के ☆

☆

आपण दोघं आपलं एक

मुलगा असो किंवा लेक

मनापासून संस्कार करू

बाहेरची दुनिया खोटी.. फेक!

*

जगणं आपलं निसर्गातलं 

रात्रीला केवळ घरटं आपलं

दाणे किडे हुडकण्यासाठी

रोजच पाहीजे बाहेर पडलं!

*
कोण कधी झडप घालेल

कोण कुठं जाळ पसरेल

विहरताना आभाळाखाली

सावधपणे पाहिजे राहिलं!

*
माणसापरी आपल्या जगी

कोणी कायम झटत नाही

पंख फुटता आयता कुणी

चोचीला चारा देत नाही!

*

कर बळकट पंख आपले

सावध विहरणं चालू ठेव

पक्षासारखं सुंदर जगणं 

मुक्त परिसरात संचारणं 

आनंदाने जग लक्षात ठेव!

*

आई बापाचे बोल बाळा

कायम लक्षात ठेऊन जग

जगणं आपलं भाग्य आहे

उघड्या डोळ्याने सारं बघ!

☆

© सुश्री नीलांबरी शिर्के

मो 8149144177

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

प्रा. भरत खैरकर

 कवितेचा उत्सव 

☆ मरणलळा… ☆ प्रा. भरत खैरकर ☆

☆

 साहल्या कितीक जीवनाच्या झळा

आता लागलेला मरणाचा लळा!

*

सौख्याचा सुवास कापुराचा धूर

तेवढ्यासाठीच माझा धपापला उर

परी न गवसला ममतेचा दरवळा!

*

वनव्याची आग आत न् बाहेर

झुंजलो एकला देत वाशांना आधार

छताने घराच्या दगा दिला मला!

*

आतल्या गाठींना दाबूनी पोटाशी

मुक्त वागलो मी आल्या संकटाशी

रुतलो दुःखात साहुनी उन्हाळा!

☆ 

© प्रा. भरत खैरकर

संपर्क – बी १/७, काकडे पार्क, तानाजी नगर, चिंचवड, पुणे ३३. मो.  ९८८१६१५३२९

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈