मराठी साहित्य – कवितेचा उत्सव ☆ सखे… ☆ सुश्री वृंदा (चित्रा) करमरकर ☆

सुश्री वृंदा (चित्रा) करमरकर

 कवितेचा उत्सव 

☆ सखे… 🧚 ☆ सुश्री वृंदा (चित्रा) करमरकर ☆

मन रानात-वनात

मन श्रावण थेंबात

मन  प्रतिबिंब माझे

तुझ्या डोळ्यांच्या ऐन्यात

मन सावळ्या मेघात

मन आकाशी ताऱ्यात

मन निवांत हे संथ

तुझ्या मनाच्या डोहात

मन पावसाची धारा

मन खट्याळसा वारा

मन गुंफले गं माझे

त्या ओलेत्या रुपात

मन  आठवांचे तळे

मन गंधाळले मळे

माझे हळवे गं गीत

तुझ्या केशर ओठात

मन भिजते दंवात

मन प्राजक्त गंधात

मन पाणीदार मोती

तुझ्या मनी कोंदणात

मन माझे गं ओढाळ

मन चांदणं मोहोळ

मन घुटमळे सखे

तुझ्या चाहूल वाटेत

© वृंदा (चित्रा) करमरकर

सांगली

मो. 9405555728

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈