Category: कवितेचा उत्सव 2

सुश्री संगीता कुलकर्णी

 कवितेचा उत्सव 

☆ जादू तुझ्या नजरेतील… ☆ सुश्री संगीता कुलकर्णी ☆ 

जादू तुझ्या नजरेतील

मनास स्पर्शूनी गेली 

वीण प्रेमाची

अधिक दृढ होऊन गेली..

नकळत नजरेस भरले

खळी तुझ्या गालावरील

अन् मन क्षितिजाच्या पल्याड

जाऊन पोहोचली..

होता तुझा सजलेला

सुंदरसा मुखडा

आस्मांनी बहरलेला

श्रावणसरीचा इंद्रधनू तसा..

रुप तुझे ते बहरले

चढली लाली निळ्याशार सागराला

अस्ताची किरणे फेकीत

सूर्याने निरोप घेतला..

 उगवतीचा चंद्र

 स्वप्नांची चाहूल देतो

अन् पुन्हा स्पर्शूनी जाते 

मनास जादू तुझ्या नजरेतील.. !!

©  सुश्री संगीता कुलकर्णी 

लेखिका /कवयित्री

ठाणे

9870451020

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. पल्लवी ऋषिकेश कुलकर्णी

 कवितेचा उत्सव 

☆ आयुष्य… ☆ सौ. पल्लवी ऋषिकेश कुलकर्णी ☆

अभंग ( ६ ६ ६ ४ )

सप्तरंगी न्हावे । आनंदी नांदावे ।

सौख्याने सांधावे । आयुष्याला ।

तिळ तिळ घ्यावे । मण मण द्यावे ।

सत्पात्री करावे । दान अंतरी ।

दुःख विसरावे । सुख मिरवावे ।

 मन सावरावे । आनंदाने।

सूर आनंदाचे । सुरात छेडावे ।

सूर सापडावे ।  आपलेसे ।

सडा शिंपडावा । माती मुरवावा ।

मनाला ओलावा । मातृत्वाचा ।

एकरूप व्हावे | कर्तव्य करावे ।

अभंग रहावे । संसारात ।

फुले आयुष्याची | फुलावी मनाने |

 माळावी सुखाने |  सुगंधीत ।

देवाचीये दारी । मन लीन व्हावे ।

नाम मुखी यावे । पांडुरंगा ।

© सौ. पल्लवी ऋषिकेश कुलकर्णी 

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री नीलांबरी शिर्के

☆

कोवळे शैशव, पेलीत चाले

डोक्यावर जडभार

पुस्तक खेळण्याच्या जागी

 देई दगडाला आधार

☆

डोळ्यांमधील निरागसता

काळजास जाऊन भिडते

बीनभिंतीची शाळा निष्ठूर

ही कसली परिक्षा  घेते

☆

परिक्षा कसली शैशवसारे

भाराखाली दबुन गेले

 सुखस्वप्नाचे प्रश्न बोलके

ओझ्याखाली थिजून गेले

☆

चित्र साभार – सुश्री नीलांबरी शिर्के 

©  सुश्री नीलांबरी शिर्के

श्रीशैल चौगुले

 कवितेचा उत्सव 

☆ पळसफुल… ☆ श्रीशैल चौगुले ☆

पालवीविना फुलतो

कसा पळसफुल

ऋतुतला हा बहर

ऊन्हातली ही भुल.

कोकीळ कंठ मधूर

ऊसंती जीवा धीर

स्वरात  प्रेम व्यथा

हृदयी स्मृती संकुल.

जरा वार्याचा स्पर्श

डोळे दिपवी नभ

झळा अस्वस्थ देहा

वाटा जुन्या विपुल.

लागे डुलकी क्षणा

मनात भेटी गाठी

जीवन सरले जे

जणू पळसफुल.

 © श्रीशैल चौगुले

९६७३०१२०९०

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

 कवितेचा उत्सव 

☆ साक्षीस चंद्र… ☆ कै अशोकजी परांजपे ☆

साक्षीस चंद्र आणि हळुवार स्पर्श होते

त्या भोगल्या क्षणांना नव्हतेच काही नाते

डोळ्यात बिंब होते नुसते भिजून गेले

नि:श्वास ते कळ्यांचे कोषांत लाजलेले

होता फुलून आला अंगावरी शहारा

गात्रांत मात्र राजा कसलेच भान नव्हते!

प्रतिसाद मूक होता ओठांत थांबलेला

तो शब्द रे सुखाचा ह्रदयात कोंदलेला

गालावरी खुळी रे कळ एक साचलेली

दुःखात की सुखी रे ,काहीच ज्ञात नव्हते !

– कै अशोकजी परांजपे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ.मंजुषा सुधीर आफळे

 कवितेचा उत्सव 

☆ भक्तीगीत. चैत्रा गौरीचे… ☆ सौ.मंजुषा सुधीर आफळे ☆

ये गं, ये गं, चैत्रागौरी,

ये, … ये गं,ये गं चैत्रागौरी

दारी घालिते चैत्रांगण

स्वागताला कोकिल कुजन

सोनियाचा झुला गं देवघरी

नैवेद्याला ठेवते आंबे,डाळी

ये गं, ये गं चैत्रागौरी

भक्तिभावे गं खेळ मांडीला

अत्तराचा सडा शिंपला

चराचरी वसंत सोहळा

प्रेमे वाहते मनमोगरा

ये गं, ये गं चैत्रागौरी

तुजसाठी, हळदी कुंकूराशी

ओवाळीते मी पंचप्राणांसी

ओटी भरण तुझ्या रूपांची

घरी-दारी नांदो सुख शांती

ये गं, ये गं चैत्रा गौरी

ये.. ये गं, ये गं चैत्रागौरी

© सौ.मंजुषा सुधीर आफळे

४/४/२०२२

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

डॉ मेधा फणसळकर

 कवितेचा उत्सव  

☆ शब्दांच्या गावात… ☆ डॉ मेधा फणसळकर ☆ 

कधी वाटे मजला की

आपण शब्द बनावे

या ओठातून त्या ओठी

अलगद गिरकत जावे 

कधी शिरावे निलआभाळी

पाऊसगाणे छेडित जावे

उडूनी जावे विहंगदेशी

कोकिळकंठी मधुर स्वरावे

हळूच उतरूनी नदीकिनारी

लाटांवरी झुलताना गावे

प्रकाशवाटा जिथ सांजवती

कातरसूर मारवा बनावे

अलवार शिरावे कवीच्या चित्ती

कविता होऊन बरसून जावे

असे होऊनी शब्दरुपापरी

शब्दांच्या गावात फिरावे

अर्थ निराळा शब्द शब्द जरी

गुपित मनीचे कविता व्हावे

जात पंथ ना धर्म तरीही

शब्दांचे या गीत बनावे

© डॉ. मेधा फणसळकर

मो 9423019961

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री अरूणा मुल्हेरकर

 कवितेचा उत्सव 

☆ वासंतिक मास… ☆ सुश्री अरूणा मुल्हेरकर ☆ 

(अष्टाक्षरी)

वासंतिक मास आला

सृष्टी संपन्न जाहली

प्रतिपदा शुभ दिन

गुढ्या तोरणे सजली॥१॥

गुढी पाडवा म्हणती

सीता राम आले घरा

अंगणात रंगावली

होतो आनंद साजरा ॥२॥

मांगल्याची गुढी उभी

बांधुनिया वस्त्र जरी

साखरेची शोभे माळ

लांब अशा काठीवरी ॥३॥

वाद्ये मंगल वाजती

वर्षारंभ मराठ्यांचा

सुमुहूर्त शुभकार्या

घास श्रीखंड पुरीचा ॥४॥

नव वर्षाची प्रतिज्ञा

करू आपण सर्वांनी

नको राग नको द्वेष

प्रेमे राहू उल्हासानी ॥५॥

©  सुश्री अरूणा मुल्हेरकर

डेट्राॅईट (मिशिगन) यू.एस्.ए.

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈