Marathi Kavita
सुश्री नीलांबरी शिर्के
कवितेचा उत्सव
☆ भूक… ☆ सुश्री नीलांबरी शिर्के ☆
☆
लोकशाहीचे हीत साधत
त्याला मिळाले त्याच्या पुरते
पण तयांची भूकच मोठी
मागत दुज्या ताटातले ते
देणारा कसे देईल!
त्याच्या पुढचे ताट ओढूनी
जातपात आईमाय काढूनी
मिळेल कैसे झुंडशाहीनी!
☆
© सुश्री नीलांबरी शिर्के
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
प्रा. सौ. सुमती पवार
कवितेचा उत्सव
☆ घुंगराची गाडी आली… ☆ प्रा. सौ. सुमती पवार ☆
☆
गाडी घुंगराची आली माझ्या माहेराची
गाडी घुंगराची आली माझ्या माहेराची..
माया किती माझ्यावर भाऊरायाची…
*
किनखापी पडदा हो गाडीला मलमलीचा
चढायला ठेवला मला मखमली गालीचा
काटा नको टोचायला काळजी बहिणीची
गाडी घुंगराची…
*
सर्जा गर्जा धावतात चाल ती दुडकी
हळूच मी बघते हो उघडून खिडकी
ज्वारी बाजरीचं शेते हिरव्या पदराची..
गाडी घुंगराची…
*
हेरमळा वाजे चाक कुई कुई कुई
भाचे म्हणतील आता आली माझी फुई
घाई घाई घेऊन मी काकवी मळ्याची..
चाखतील पोळीसवे जात लेकरांची…
*
अलाबला घेईल ती वहिनी माझी गोड
रसरसली आहे जणू आंब्याची ती फोड
सरबराई कराया धावते वन्सची
जागा जणू घेतलीया तिनं हो आईची.
घुंगराची गाडी आली माझ्या माहेराची…
*
पाहताच भावाला मी हासते खळाखळा
उभ्या उभ्या पिकतो हो हास्याचा तो मळा
सर नाही माहेराला दुज्या त्या गावाची..
घुंगराची गाडी आली…
☆
© प्रा.सौ.सुमती पवार
नाशिक
मो. ९७६३६०५६४२; ईमेल – svpawar6249@gmail.com
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ. रेणुका धनंजय मार्डीकर
चित्रकाव्य
बोल ना गं अबोली… सौ.रेणुका धनंजय मार्डीकर ☆
☆
बोल ना ग अबोली माझ्याशी जरा
नाजूक साजूक तुझा नखरा
*
नवरीसाठी तुझा खास गजरा
माहेरचा मान तुला आहेच खरा
*
चार रंगाची चांदणी खुळी
मऊ मुलायम तुझी पाकळी
*
गुलाबी हिरवी अबोली पिवळी
वाऱ्यावर डुलते सोनसळी
*
नाव तुला शोभते फटाक्याचे फुल
कदंबे विणताना मना पडे भूल
*
कागड्याची फुले मोगऱ्याच्या संगे
दुरंगी विणताना अबोली रंगे
*
परसात तुझे ताटवे फुलती
वैद्याचे गुण अंगी केवढी महती
*
बालपण हसले तारुण्य रुजले
तुझ्या संगती जीवन सजले
*
शब्द आज माझे झाले दिवाणे
अबोलीसाठी हे काव्य नजराणे
*
कविता सजली पानात रुजली
कुंतल सजवून ती कुजबुजली
*
© सौ.रेणुका धनंजय मार्डीकर
औसा.
मोबा. नं. ८८५५९१७९१८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
सुश्री वर्षा बालगोपाल
चित्रकाव्य
पूर्वज… सुश्री वर्षा बालगोपाल ☆
☆
गणेश विसर्जन झाले
पूर्वज सगळ्यांचे भेटीला आले
*
पंधरा दिवस पूर्वजांच्या नावाने
पिंड घालणे, चांगले चुंगले खाणे
कावळ्यांना महत्व देणे
वर्षभर का मग दुर्लक्षिलेले
पूर्वज सगळ्यांचे भेटीला आले
*
पूर्वज होते तेव्हा केली का हो सेवा
उलट पदोपदी प्रार्थना लवकर सोडव रे देवा
कावळ्यांना तरी कधी देता का मेवा
नकोत त्यांना भाव नुसते दाखवलेले
पूर्वज सगळ्यांचे भेटीला आले
*
आता तरी ऐका म्हणणे त्यांचे
हेच पंधरा दिवस पुन्हा सान्निध्याचे
माना की हे दिवस पण पुण्याईचे आशीर्वादाचे
अशुभ का समजता या पंधरवड्यातले
पूर्वज सगळ्यांचे भेटीला आले ||
☆
© सुश्री वर्षा बालगोपाल
मो 9923400506
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री सुहास रघुनाथ पंडित
कवितेचा उत्सव
☆ जागतांना या कळ्यांना... ☆ श्री सुहास रघुनाथ पंडित ☆
☆
जागताना या कळ्यांना दु:ख कधी ना वाटते
खेद नाही, आयुष्य यांना अल्पसे जरी लाभते
फुल होता रुप आणि रंग सारे उधळिती
गंध लाभे जीवनाला जरी पाकळ्या कोमेजती
बोध घ्यावा, तत्त्व ऐसे जीवनाचे सांगती
कर्म मोठे! व्यर्थ सारे सांगणे,
मी पहा जगलो किती
मी पहा जगलो किती.
☆
© श्री सुहास रघुनाथ पंडित
सांगली (महाराष्ट्र)
मो – 9421225491
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # ३००
☆ जोखड… ☆ श्री अशोक श्रीपाद भांबुरे ☆
☆
मानेवरती कायम येथे जोखड आहे
जगण्यासाठी तरी चालली धडपड आहे
*
सारे प्राणी गुलाम आणिक अल्ला मालिक
जनास प्यारा कुरबानीचा बोकड आहे
*
माय समजुनी काल पोसली गाय गोजिरी
कसाबास ती देऊ झाली भाकड आहे
*
कष्टकरी मी वतनदार तो ऐट मिरवितो
डोळ्यांवरती श्रीमंतीची झापड आहे
*
विहिणीसाठी केवळ मी तो तुपात तळला
तरी म्हणाली किती वाकडा पापड आहे
*
पिंडीवरती जल चढवावे भाव मनीचे
खांद्यावरती श्रम श्रद्धेची कावड आहे
*
रोकड म्हणजे जीवन आहे त्याच्यासाठी
माणुसकी सोडून वागतो हेकड आहे
☆
अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्रीशैल चौगुले
कवितेचा उत्सव
☆ सुलक्षणे… ☆ श्रीशैल चौगुले ☆
☆
ऊन्हाळे-पावसाळे व्यर्थ सारे
स्वतःचे लौकिकात सार्थ खरे.
आदर न ठेवावा कुणाचा कधी
श्रीमंतासारखे जगावे बरे.
*
माघार न घ्यावी प्रतिष्ठा धर्म
हरवावे प्रत्येका शक्ती शौर्ये.
करावा संघ गट जगताना
खेचावीत दुजांचे बल धैर्ये.
*
हिच निती सत्य यशस्वी मंत्र
सृजनाचा वेडा क्षणात हारे.
जातीचा बघावा माणूस नित्य
जातीच्याच माणसा हार-तुरे.
*
माणूसकी काय न देई सर्व
ताठ मानेने जगावे ही सूत्रे.
किंमत का द्यावी कुणा उगाची
निंदा करता जिंके सत्तांतरे.
☆
© श्रीशैल चौगुले
मो. ९६७३०१२०९०.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
श्री आशिष बिवलकर
चित्रकाव्य
आत्मचिंतन… श्री आशिष बिवलकर ☆
☆
राहिला केर काढायचा,
काळजाला किती कोपरे |
शोधत त्यात स्वतःला,
आपल्या घरात आपणच उपरे |
*
शुचिर्भूतता दाखवता दाखवता,
आतून छळते ती मलीनता |
दाखवायचे आणि खायचे,
यातच मानते ती धन्यता |
*
तिमिर सारता सारता,
दिव्याखाली लपतो अंधार |
चमचमत्या पदराला,
सलते टोचणारी किनार |
*
चढवित एक एक मुखवटे,
खरा चेहरा हरवून जातो |
एकांताच्या दर्पणात पाहता,
आपणच विन्मुख होतो |
*
परमार्थ साधता साधता,
न कळत चिकटतो स्वार्थ |
धर्मरक्षणाच्या रणांगणावर,
सगेसोयरे यात अडकतो पार्थ |
*
अंतरात्म्यातला श्रीकृष्ण,
पदोपदी गीताच सांगत असतो |
कर्तव्याच्या पुण्यपथावर,
मोहपाशात आपणच फसतो |
©️ वास्तवरंग
☆
(चित्र सौजन्य – श्री आशिष बिवलकर)
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
डॉ. सोनिया कस्तुरे
चित्रकाव्य
– “मौन…” – ☆ डॉ.सोनिया कस्तुरे ☆
☆
सोबत असे तरी, स्वप्नी येतेस तू
स्वप्नातही मौन का धरतेस तू?
*
असेल तुला बोलायचे मनातले
अबोला कधी कुठे सोडतेस तू?
*
अमाप व्यग्रता तुला कर्तव्यातले
गंध फुलांचा कसे एकवटतेस तू?
*
जबाबदारीची अगणित फुले काटे
उन्हाळे सक्षमतेने कसे पेलतेस तू?
*
अमाप रंग तुजपाशी फुलपाखरांचे
किती काटेरी झूल पांघरतेस तू !
*
विषय अनेक स्पर्श वाटती तोकडे
किती सांगोपांग जगणे रचतेस तू !
*
तृप्त जरी वाटे,ओठांवरील हसणे
विपत्तीत नभाशी, मैत्री करतेस तू
☆
© डॉ.सोनिया कस्तुरे
विश्रामबाग, जि. सांगली
भ्रमणध्वनी:- 9326818354
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री तुकाराम दादा पाटील
कवितेचा उत्सव
☆ वसा… ☆ प्रा तुकाराम दादा पाटील ☆
☆
सोंग सजवणे जमले नाही
मन तेथे ही झटले नाही
*
वसा घेतला जनसेवेचा
तेच व्यसन मग सुटले नाही
*
हवे तेवढ्या धावपळीने
मन केंव्हाही शिणले नाही
*
लक्षठरवले अजिंक्य व्हावे
मनाप्रमाणे घडले नाही
*
अवघड जगणे केले सोपे
म्हणून कोठे अडले नाही
*
भाळा वरती भाग्य कोरले
पण ते केंव्हा दिसले नाही
*
रान पाखरू भिरभिरणारे
थव्यात कुठल्या घुसले नाही
*
रामायण तर वाचून झाले
राम पचवणे जुळले नाही
*
स्वाभिमान तो प्राण वाटतो
पण मीपण ही सरले नाही
*
जगलो जगणे परावलंबी
स्वतंत्र घरटे विनले नाही
*
कळले नश्वर जगणे आहे
मग मरणाने छळले नाही
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
