Category: कवितेचा उत्सव 2

श्री शरद कुलकर्णी

 कवितेचा उत्सव 

☆ तरी पाऊस सोसले… ☆ श्री शरद कुलकर्णी ☆

☆

नाही बोलावले चंद्रा,

नाही नक्षत्रे खुडली .

माझी स्वप्नील वैखरी ,

डोही माैनाच्या दडली.

नाही घेतली मी फुले,

माझी ओंजळ रिकामी.

व्यक्त होण्या अव्यक्ताला,

भाषा ठरली निकामी .

नाही पापणी भिजली,

नाही ओलावले काठ.

नाही गुंतलो नात्यात,

गणगोताकडे, फिरवली पाठ.

नाही विचारला जाब,

फक्त स्वताला कोसले.

नाही चिंबचिंब झालो,

तरी पाऊस सोसले.

 ☆

© श्री शरद  कुलकर्णी

मिरज

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री राजकुमार दत्तात्रय कवठेकर

 कवितेचा उत्सव 

☆ तू… ☆ श्री राजकुमार कवठेकर ☆

☆

तू रे सुखा जरासा दिलदार मित्र हो ना

केंव्हातरी गुलाबी तू प्रेम -पत्र हो ना

*

नुस्त्याच कल्पनेने पाहू तुला कसे रे

दृष्टांत..रंग..रूपे थोडा सचित्र हो ना

*

वैराण माळ पायी.. माथ्यावरी उन्हाळे

तू मोडके तरीही डोईस छत्र हो ना

*

आयुष्य हाच आहे रे यक्ष-प्रश्न माझा

तो सोडवावया तू सोपेच सूत्र हो ना

*

प्रत्येक वेळ आहे येथे रणांगणीची

रे जीवना मवाळा, तू ही सशस्त्र हो ना

*

होवून सूज्ञ, दुःखी-कष्टीच व्हायचा तू

विक्षिप्त अन् जरासा ढोंगी.. विचित्र हो ना

*

ही भांडणे..लढाया..आकांत..सांत्वने ही

आता निवांततेचे अंतीम-सत्र हो ना

*

आजन्म आटलेला.. आजन्म साठलेला

माझे खळाळणारे विस्तिर्ण पात्र हो ना

*

काही न भव्य आता काही न दिव्य आता

स्फूर्ती मिळेल ज्याने ते तू चरित्र हो ना

*

भेटोत ही शकूनी, होवोत लाख शत्रू

माझा सखा ‘सुदामा’ तू एकमात्र हो ना

*

अंधार बारमाही वाट्यास जीवनाच्या

कोजागिरी प्रमाणे तू एक रात्र हो न

☆

© श्री राजकुमार दत्तात्रय कवठेकर

कवी / गझलकार

संपर्क : ओंकार अपार्टमेंट, डी बिल्डिंग, शनिवार पेठ, आशा  टाकिज जवळ, मिरज मो ९४२११०५८१३

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री अमोल अनंत केळकर

  चित्रकाव्य  

ही वाट ‘वाट’ लावे… श्री अमोल अनंत केळकर ☆

(दिवाळी सुट्टी संपवून सुट्टीच्या शेवटच्या रविवारी आपल्या गावाकडून, कामाच्या ठिकाणच्या गावाकडे येतानाचा अनुभव …… गाव सोडून जायची हुरहुर आता मागे पडून,  ट्रॅफिक जाम ची भीती ही सध्या वरचढ ठरतीय)

(शांता शेळके यांची माफी 🙏मागून )

*

ही वाट ‘वाट’ लावे, पुण्याबाहेरच्या गावा

माझ्या मनातला का, तेथे रस्ता नसावा?

ही वाट ‘वाट’ लावे,

**
जिथे तिथे घुसाया, वाहन आसुलेले

नाक्यावरती टोलच्या, मडगाड ठोकलेले.

इथे मोठ्या खड्ड्यांनी, टायर फुस्स व्हावा

*

माझ्या मनातला का, तेथे रस्ता नसावा?

ही वाट ‘वाट’ लावे,

**

घे वाहन कडेला, थांबून ढाब्यापाशी

लागून भूक भारी मग खा वडा पावाशी

एकदाच  ‘जी – पे’  चा, पासवर्ड विसरावा

*

माझ्या मनातला का, तेथे रस्ता नसावा?

ही वाट ‘वाट’ लावे,

**

स्वप्नामधील गावा, पुण्यातून न जावे

स्वप्नामधील रस्त्याला, स्पिड ब्रेक न यावे

स्वप्नातल्या सुखाचा ,’टुकार’ वेध घ्यावा

*
माझ्या मनातला का, तेथे रस्ता नसावा?

ही वाट ‘वाट’ लावे,

**

© श्री अमोल केळकर

बेलापूर, नवी मुंबई, मो ९८१९८३०७७९

poetrymazi.blogspot.in, kelkaramol.blogspot.com, a.kelkar9@gmail.com

श्री विष्णू सोळंके

 कवितेचा उत्सव 

☆ भाषा मराठी… ☆ श्री विष्णू सोळंके ☆

☆

संस्कार, संस्कृती जपते भाषा मराठी

माणसा माणसाला जोडते भाषा मराठी… १

*

चक्रधर, म्हाईंभट सातवाहन आधारवड

संतसाहित्य, ज्ञानेश्वरी जपते भाषा मराठी… २

*

मढैकर, केशवसुत, फुले आणि कुसुमाग्रज

अमृतातेही पैजा जिंकते भाषा मराठी… ३

*

तीन हजार वर्षे जुना तीचा इतिहास

आता अभिजात ठरते भाषा मराठी… ४

*

संस्कृत प्राकृत मागधी पैशाची स्वरूप

शाहिरी पोवाड्यात रंगते भाषा मराठी… ५

*

तुका ज्ञानेश्वर नामदेव जनाबाई मळा

पंढरीत वारीमध्ये नाचते भाषा मराठी… ६

*

माझी माय मराठी माथी अभंग टिळा

संवाद संस्कृती जपते भाषा मराठी… ७

☆

© श्री विष्णू सोळंके

काव्य संध्या, मुदलियारनगर अमरावती ४४४६०६ – मो ७०२०३००८२४

श्रीशैल चौगुले

 कवितेचा उत्सव 

☆ तुकया खरा… ☆ श्रीशैल चौगुले ☆

☆

तुकयाची भाषा विनाशीत दोषा

ज्ञानीयास रोषा गगनापरी.

*

अज्ञानाचे मुळ अभंडाचा अहं

शरिराचा स्वयं थोतांडराजा.

*

संताचीये बोध आत्मभक्ती शोध

परमात्मा वेध विठ्ठलध्यान.

*

अचाटाची गाथा मार्तंडाशी लाथा

घालीतसे गीता तुकातत्वांनी.

*

उपमाही सत्य सुर्य-चंद्र नित्य

दर्शनास पथ्य संतवचने.

 ☆

© श्रीशैल चौगुले

श्री आशिष  बिवलकर

  चित्रकाव्य  

वणवण बळीराजाची… श्री आशिष  बिवलकर ☆

☆

बरसू लागलेत काळे ढग,

बरसू लागलेत डोळ्यातून अश्रू |

जणू दोघांत लागलीय स्पर्धा,

बळीराजा म्हणे कुठं दुःख विसरू |

*

उभी पीकं झोपली शेतात,

दाण्यादाण्याला फुटला अंकुर |

फुटलं नशीबच सारं आता,

निसर्गा एवढा कसा झालास क्रूर |

*

हताश झालाय रे बळीराजा,

अस्मानी सुलताना आता घे आवर |

पीक नाही आलं हाताशी,

भकास झालाय शेतीतला वावर | 

*

ऐन सणावाराला ऐन दिवाळीत,

बळीराजाचं तोंड झालंय कडू |

हुंदक्यात जगण्याची भैरवी गातो,

शेतकऱ्यांना कोसळू लागलंय रडू |

*

फाटकच लुगडं कारभारणीला,

फाटकीच लाज झाकाया लंगोटी |

लेकरंबाळं उघडी फिरती गावात,

पिकाविना शेतीच झाली वांझोटी |

*

मायबाप सरकार झालं बहिरं,

बळीराजाचा आक्रोश ऐकूच येईना |

बळीराजाची जगायची वणवण,

दाही दिशा काही केल्या संपेना |

©️ वास्तवरंग

☆

(चित्र सौजन्य – श्री आशिष बिवलकर) 

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ ठाव… ☆ प्रा तुकाराम दादा पाटील ☆

☆

खोडले मी तुझे नाव नाही

मांडला वेगळा खेळ नाही

*

पालखी वाहतो विठ्ठलाची

ठेवला अंतरी भाव नाही

*

प्रेमिकेला इथे भेटला तो

प्रेमवेडा कुणी राव नाही

*

प्राणमाझा कसा यार घेता

टाकला नेमका घाव नाही

*

भावनांची जरा ओल शोधा

घेतलेला कुणी ठाव नाही

*

माणसांना लळा लावला मी

भेठला चांगला साव नाही

*

जिंदगीचा असा खेळ झाला

वेगळा मज दिला वाव नाही

*

शो़धतो मी किती काळ झाला

ओळखीचे कुठे गाव नाही

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈