Category: कवितेचा उत्सव 2

श्री अनिल वामोरकर

कवितेचा उत्सव

☆ पाऊस… ☆ श्री अनिल वामोरकर ☆

☆

बुडावा गर्व

जावोत वाहून

मतभेद आणि इर्षा

या पावसाळ्यात…

भिजू दे

तन मन

सद्गुरुंच्या कृपेत

या पावसाळ्यात…

रागाचा पर्वत

ठिसूळ होवून

नष्ट होवू दे

या पावसाळ्यात…

रिमझिम रिमझिम

बरसू दे सदगुरु कृपा

जे बीज भक्तीचे पेरले, वटवृक्ष होवू दे

या पावसाळ्यात…

साधनेचा येवू दे

महापूर असा की

राग द्वेष आणि रिपूं

नामशेष होवू दे

या पावसाळ्यात..

☆

© श्री अनिल वामोरकर

अमरावती

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री अशोक श्रीपाद भांबुरे

अशोक भांबुरे जी यांची कविता अभिव्यक्ती # ३३३

☆ माळी हुशार झाला… ☆ श्री अशोक श्रीपाद भांबुरे ☆

☆

चाहूल लागल्यावर तो तर पसार झाला

दारात लेक होती माळी हुशार झाला

*

दारावरून माझ्या गेली वरात होती

ह्या काळजात माझ्या गलका चिकार झाला

*

मीही खुशीत होतो नोटा खिशात होत्या

मी घाम गाळला अन् पहिला पगार झाला

*

पैसा खिशात होता गेलो नको तिथे मी

माझे नशीब खोटे भलता विकार झाला

*

गम्मत म्हणून सुद्धा खेळू नकाच पत्ते

झालोय मी भिकारी मोठा जुगार झाला

*

विसरून दुःख जाण्या मदिरा बरी म्हणालो

झाला उशीर थोडा अन् बंद बार झाला

*

ते गुंड लोक होते त्या सावलीत रमला

एका चुकीमुळे बघ तो हद्दपार झाला

☆

 © अशोक श्रीपाद भांबुरे

श्रीशैल चौगुले

 कवितेचा उत्सव 

☆ भावसमुद्र... ☆ श्रीशैल चौगुले ☆

☆

ओठाच्या किनारी विरघळून गेले सोबती

डोळ्याच्या नभातले ओघळलेले मोती.

* 

मनाच्या घनांत आठवणींचे वादळ

कधी वचनांच्या विजांचे भय भोवती.

 *

सजवून जीवनास विश्वासाचा ऋतू

धोकाच झाला हृदयसृष्टीचे हयाती.

 *

अखेर शब्दांची समजूत एक सत्य

काव्यानी निभावले वैफल्याच्या त्या राती.

 *

लाटा क्षणांच्या पार करती सल कुठे

काठावरचे स्वर सुखावे व्यथा गाती.

 ☆

© श्रीशैल चौगुले

श्री आशिष  बिवलकर

  चित्रकाव्य  

इंद्रायणी  श्री आशिष  बिवलकर ☆

☆

देवाची आळंदी | श्रेष्ठ माऊलींची |

श्रद्धा वैष्णवांची | भक्तीभावे ||१||

*

संत ज्ञानेश्वर | घेतली समाधी |

कृती नाही साधी | तत्कालीन ||२||

*

समाधी स्थानाचे | झाले तीर्थ क्षेत्र |

नगर पवित्र | वैष्णवांचे ||३||

*

सरिता निर्मळ | होती इंद्रायणी |

अमृताचे पाणी | गोडी ऐसी ||४||

*

आजच्या मितीस | समाधी कुशीत |

सरिता दूषित | दिन दुःखी ||५||

*

उदासीन सारी | शासन व्यवस्था |

टेंडरची आस्था | इंद्रायणी ||६||

*

भोळा वारकरी | देखे इंद्रायणी |

वाली नाही कोणी | स्वच्छतेचा ||७||

©️ वास्तवरंग

☆

(चित्र सौजन्य – श्री आशिष बिवलकर) 

© श्री आशिष  बिवलकर

बदलापूर

मो 9518942105

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

वर्षा बालगोपाल

  चित्रकाव्य  

ब्रेकअप…   वर्षा बालगोपाल ☆

☆

तरू हाच संकेताचा साक्षीचा

दोघांच्या प्रीत भेटीचा, मोक्याचा

तरू एकमेकांच्या आधाराने

दिल्या घेतल्या आणा भाकांचा॥

*

फुले रोमांच दो अंगावरती

स्पर्श सारेच बोलके होऊनी

फुले करती गंध पखरण

दोघांची असीम प्रिती बघुनी॥

*

वचन दिले वचन घेतले 

एकत्र यायचे फक्त बहाणे

वचन कोणाचेही नसे सत्य

बोलाच्याच कढी भाता प्रमाणे॥

*

पण केलेले कसे विसरले?

दोघांचे प्रेम बहरले होते

पण नियतीच्या मनी वेगळे

जुळणार नव्हते त्यांचे नाते॥

*

फूट फुटलेले प्रेमांकूर का

अवचित असे जळून गेले

फूट पडली दोन जीवांमधे

एकमेकांनाही नकोसे झाले॥

*

ब्रेक लावला नाही भावनांना

वहावत गेले ते दोघेजण

ब्रेक अप झाले त्यांच्या नात्याचे

आता वेगळ्या वाटा, दिशापण॥

☆

© सुश्री वर्षा बालगोपाल

मो 9923400506

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ पेरीन मी कविता… ☆ प्रा तुकाराम दादा पाटील ☆

☆

पाऊस बरसताना धरती फुलून जाता

निवडून बीज असली पेरीन मी कविता

*

मातीतला जिव्हाळा भाऊक रुप घेता

घेवून तीच संधी पेरीन मी कविता

*

ओली धरा मलाही देईल स्नेह ममता

तेव्हा जरूर तेथे पेरीन मी कविता

*

पाहून रान हसरे मी मोहरून जाता

सोडून सर्व खंता पेरीन मी कविता

*

थांबू उगी कशाला हाती असून सत्ता

रानात मालकीच्या पेरीन मी कविता

*

आयुष्य चंदनाचे गंधीत रान होता

आनंद द्यावयाला परीनं मी कविता

*

जपण्यास संस्कृतीला होवूनिया प्रवक्ता

गर्दीत माणसांच्या. पेरीन मी कविता

*

सा़ंंगीन आग्रहाने पाळावयास समता

प्रस्थापिता पुढे ही पेरीन मी कविता

 ☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

कावेरी सुतार

 कवितेचा उत्सव 

|| पैशांची भिंत || ☆ कावेरी  सुतार ☆

☆

सख्ख्या भावाच्या डोळ्यात आज,

एक वेगळाच राग दिसला,

ज्या अंगणात एकत्र खेळलो,

तिथेच आज जमिनीचा भाग दिसला.

*

काय करणार त्या मातीच्या तुकड्याचं,

ज्याने रक्ताची नातीच गोठवली?

पैशांच्या या हव्यासापोटी,

माणसानं स्वतःचीच माणसं गमावली.

*

वडिलांनी कमावलेलं घर ते,

जिथे कधी सुखाचा संसार होता,

आज कोर्टाच्या पायऱ्यांवर,

त्याच घराचा व्यापार होता.

*

बहिणीच्या माहेरची ती हक्काची सावली,

एका सहीसाठी आज परकी झाली,

संपत्ती तर मिळाली भरपूर सगळ्यांना,

पण घरातली खरी ‘लक्ष्मी’ मात्र निघून गेली.

*

पैशाने बँक बॅलन्स वाढेलही कदाचित,

पण सुखाची ती उब कुठून आणणार?

जेव्हा पश्चात्ताप होईल सगळ्यांचा,

तेव्हा ती जुनी माणसं परत कशी मिळणार?

☆

© कावेरी सुतार

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

नीलांबरी शिर्के