Marathi Kavita
श्रीशैल चौगुले
कवितेचा उत्सव
☆ ईश्वरी ऋण... ☆ श्रीशैल चौगुले ☆
☆
आम्ही ईश्वराचे ऋणी
जन्मा व्हावे सद्गुणी
सत्संगी भाव ध्यानी
नित्य जप मनो-मनी.
*
भिन्न नाम रुपे एक
कर्म सत्वे भुत प्राणी
ऐसे पुण्य ना त्रैलोकी
भुलोकी भक्त सृजनी.
☆
© श्रीशैल चौगुले
मो. ९६७३०१२०९०.
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री आशिष बिवलकर
चित्रकाव्य
कालाय तस्मै नमः श्री आशिष बिवलकर ☆
☆
आधुनिक झाली सावित्री,
परंपरेची तिला जाण आहे |
सती सावित्री वटपौर्णिमा,
पतिव्रतेचं भाळी वाण आहे |
*
मॉडर्न झाली म्हणून काय,
तिचा पण उपवास आहे |
तिचा जोडीदारपण तिला,
जन्मोजन्मी खास आहे |
*
यंदा टी शर्ट शॉर्ट जीन्स घातली तिने,
त्यांचं बघून ती ही नेसेल साडीचोळी |
संस्कारांकडे वळतेय नवीन पिढी,
साजरी करा हो दसरा दिवाळी होळी |
*
कालाय तस्मै नमः म्हणत,
आधुनिकता स्वीकारायला हवी |
जास्त त्यात वाहत न जाता,
आपली परंपरा जपाया हवी |
*
भरलेलं कपाळ हातात चुडा,
स्त्रीच्या सौभाग्याचं लेणं आहे |
उमजेल तिलाही भविष्यात,
पेहरावाशी सुद्धा देणंघेणं आहे |
©️ वास्तवरंग
☆
(चित्र सौजन्य – श्री आशिष बिवलकर)
© श्री आशिष बिवलकर
बदलापूर
मो 9518942105
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री प्रमोद वामन वर्तक
चित्रकाव्य 
तयारी आगमनाची श्री प्रमोद वामन वर्तक ☆
☆
कर या कलाकारांचे
रंगविती गणेशाला
जो रंगभरी चराचरी
धरून अदृश्य कुंचला
*
कळस सदृश्य मुकुट
केला धारण शिरावर
गंध नाजूक नजाकतीने
शोभे भव्य भाळावर
*
बलदंड बाहू तयांचे
त्यात वाकी शोभे छान
सुपासारख्या कानाखाली
गोल गरगरीत मान
*
शुभ्र सुळ्यांच्या मधुनी
वेलांटी मारे गोड सोंड
धूत वस्त्रामधून ओसंडे
गोल गरगरीत दोंद
*
वाट पाहती भक्तजन
प्राण आणून डोळ्यात
होता आगमन विघ्नेशाचे
मोद पसरेल घरात
मोद पसरेल घरात
☆
© प्रमोद वामन वर्तक
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610
मो – 9892561086 ई-मेल – pradnyavartak3@gmail.com
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री तुकाराम दादा पाटील
कवितेचा उत्सव
☆ सूर ही बदलू… ☆ प्रा तुकाराम दादा पाटील ☆
(वृत्त — भुवन सुंदर, १४ किंवा १५ मात्रा, (उ +प) (४, ५, +८))
☆
लाजणे सोडून देवू
आणखी राबून खावू
सूर ही बदलू जरासे
गीत पण साथीत गावू
ओढता मागे कशाला
मिसळुनी गर्दीत जावू
थांबने जमणार नाही
भाकरी कमवून दावू
बेगडी झाला जमाना,
ढकलुनी बाजूस लावू
आत्मरंगी रंगताना
निवडल्या रंगात न्हावू
पोरकी झालीत पोरे
तेवढी पदरात घेवू
रांधणे झालेच आहे
पंगती मांडून जेवू
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सूचना/Information
(साहित्यिक एवं सांस्कृतिक समाचार)
सुश्री ज्योत्स्ना तानवडे
🎇 अ भि नं द न 🎇
शुभंकरोती साहित्य परिवारातर्फे आयोजित करण्यात आलेल्या वृत्त बद्ध काव्य स्पर्धेत आपल्या समुहातील ज्येष्ठ साहित्यिका सौ. ज्योत्स्ना तानवडे यांना त्यांच्या गंगा माहेराची या काव्यरचनेसाठी उत्तेजनार्थ पुरस्कार प्राप्त झाला आहे.
सौ. तानवडे यांचे ई-अभिव्यक्ती परिवारातर्फे मन:पूर्वक अभिनंदन आणि पुढील वाटचालीसाठी शुभेच्छा 💐
आज त्यांची पुरस्कार प्राप्त कविता प्रकाशित करत आहोत.
संपादक मंडळ
ई अभिव्यक्ती मराठी
☆ ☆ ☆ ☆ ☆
शुभंकरोति साहित्य परिवार आयोजित भव्य वृत्तबद्ध काव्य स्पर्धा ‘उत्तेजनार्थ सन्मान प्राप्त‘
कवितेचा उत्सव
☆ “गंगा माहेराची” ☆ सौ.ज्योत्स्ना तानवडे ☆
(वृत्त – लवंगलता (८|८|८|४))
☆
मनी घालती पिंगा अवचित फेऱ्या आठवणींच्या
फेर धरोनी नाचत थयथय गाऱ्या भिंगोऱ्याच्या ||
*
शेतामधले कौलारू घर सदैव गजबजलेले
तीन पिढ्यांचे बंध रेशमी प्रेमळ गुरफटलेले ||
*
दारापुढती गोधन दावण खूण वैभवी झुलते
ढवळ्या पवळ्या खिलार जोडी घुंगुरमाळा घुमते ||
*
सख्खे मावस आत्ते मामे चुलत नातलग सारे
एकोप्याच्या मेळाव्याला भेटण्यास येणारे ||
*
सरस्वतीचे मंदिर मोठे जीवन घडवत जाई
संस्कारांची दिली शिदोरी वाटे दुसरी आई ||
*
मंदिरातल्या आरतीमधे मन रेंगाळत राही
आशीर्वादे आयुष्याला कळस यशाचा पाही ||
*
गावाकडल्या मातीमध्ये नाळ जोडली आहे
माहेराच्या घरामधुनिया प्रेमळगंगा वाहे ||
☆
© सौ.ज्योत्स्ना तानवडे
वारजे, पुणे.५८
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
नीलांबरी शिर्के
चित्रकाव्य
☆ लागली माऊलीची ओढ!! ☆ नीलांबरी शिर्के ☆
☆
हाती केशरी पताका
तिचा सनातनी रंग
पाय चालताती वाट
मुखी विठूचे अभंग!!
*
माथी चंदनाचा टिळा
त्यात शोभतसे बुक्का
म्हणा विठ्ठल विठ्ठल
मग पाय पुढे टाका!!
*
गळा तुळशीची माळ
दोन्ही हातामध्ये टाळ
वाट ओसरण्यापायी
खेळू फुगडीचा खेळ!!
*
संथ वाहे चंद्रभागा
वाळवंटी भक्त दंग
करा स्नान अन सारे
वाट पाहे पांडुरंग!!
*
नामदेवाची पायरी
कान्होपात्रेचे ते झाड
भेट घेता संत स्थाना
लागे माऊलीची ओढ!!
*
माथा पावलाशी जाता
स्पर्शे पुंडलिक विट
देह पुण्यवंत होई
सार्थकता काठोकाठ!!
☆
© सुश्री नीलांबरी शिर्के
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित /मंजुषा मुळे/गौरी गाडेकर≈
श्री प्रमोद वामन वर्तक
चित्रकाव्य
जं ग ल रा ज? श्री प्रमोद वामन वर्तक ☆
☆
परवा धडक दिली बिबटयाने
मुंबईच्या वेशीवर भायंदरला,
काल आला सोनेरी कोल्हा
पाणी प्यायला कल्याणला!
*
सगळ्या मुंबापुरीची होणार
थोड्याच दिवसात राणीबाग,
हावऱ्या मुंबईकरा आता तूच
एका पिंजऱ्यात रहायला लाग!
*
केलास “त्यांच्या” अधिवासाचा
स्वार्थापोटी खूप सत्यानाश,
आता तुझ्या हद्दीत येऊन
घेऊ लागले बघ तुझाच घास!
*
अक्कल गहाण ठेवून तुझी
तू बांधलेस जंगलात मनोरे,
वेळ अजूनही गेली नाही
आता तरी बंद डोळे उघड रे!
आता तरी बंद डोळे उघड रे!
☆
© प्रमोद वामन वर्तक
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610
मो – 9892561086 ई-मेल – pradnyavartak3@gmail.com
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कविराज विजय यशवंत सातपुते
कवितेचा उत्सव # ३०२ – विजय साहित्य
☆ कालिदास दिन…! ☆ कविराज विजय यशवंत सातपुते ☆
☆
कवी कालिदास दिन
आषाढाची प्रतिपदा
काव्य शृंगार तिलक
प्रासादिक ही संपदा. १
*
जोडोनीया दोन्ही कर
समर्पित शब्द फुले
स्वीकारावी शब्दार्चना
लाभू देत विश्व खुले. २
*
कुलगुरु कालिदास
काव्य शास्त्र अनुभूती
शब्द संपदा संस्कृत
अभिजात कलाकृती. ३
*
महाकवी कालिदास
काव्य कला अविष्कार
निसर्गाचे सहा ऋतू
ऋतू संहार साकार.४
*
अलौकिक प्रेमकथा
मालविका अग्निमित्र
खंडकाव्य मेघदूत
सालंकृत शब्द चित्र. ५
*
शिव आणि पार्वतीची
कथा कुमार संभव
अभिज्ञान शाकुंतल
प्रेमनाट्य शब्दोच्चय.६
*
राजा पुरूरवा आणि
नृत्यांगना उर्वशीचे
अभिजात कथानक
निजरूप प्रतिभेचे. ७
*
मेघा बनवोनी दूत
यक्षराज आराधना
कालिदासे वर्णियेली
प्रेमसाक्षी संकल्पना. ८
*
अग्रगण्य अभिव्यक्ती
कालिदास साहित्याची
शब्दोशब्दी सामावली
शब्द शक्ती सृजनाची. ९
*
चित्रकार, शिल्पकार
यांचे वंदनीय स्थान
साहित्यिक शिरोमणी
कालिदास दैवी ज्ञान.१०
*
अशी प्रेरणा चेतना
व्यासंगात रूजलेली
कालिदासी साहित्यात
काव्यसृष्टी फुललेली. ११
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
अर्चना गादीकर निकारंगे
कवितेचा उत्सव
☆ हुंकार… ☆ अर्चना गादीकर निकारंगे ☆
☆
जमिनीच्पा अंकावर पडलेले ते पावसाच्या धारांनी उगवले होते हुंकार रुपात,
त्याज्य म्हणून पडलेले हिरवागार रंग लेवून आले होते झोकात.
*
एक मात्र तेव्हाचे ते आणि आत्ताचे फरक होता जमीन अस्मानाचा,
सत्य होते त्याज्य म्हणून दवडलेले स्रोत होता नवनिर्मितीचा.
*
असा हा धरतीचा हुंकार पावसाळ्याच्या दिवसांतून जागोजागी दिसतो,
एका सुंदर सृजनाचा तो कारक ठरतो.
☆
© अर्चना गादीकर निकारंगे
मो. न. ९८२०३५०४०८
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
संगीता कुलकर्णी
चित्रकाव्य
– स्वप्नात रंगले मी… – संगीता कुलकर्णी ☆
☆
स्वप्नात रंगले मी
तुझ्यात हरवले मी
डोळ्यांत तुझंच चित्र
मनात तुझीच ओढ
तुझ्या प्रेमाच्या रंगात रंगले मी
*
तुझ्या आठवांच्या रंगांनी
मनाच्या कोपऱ्यात सजल्या
नकळत प्रेमाच्या गंधांनी
पानाच्या कॅनव्हासवर
प्रेमाच्या ओळी रेखाटल्या
*
तुझ्या नावाच्या नाजूक रंगांनी
शब्दही हरवून बसले
तू शब्दांत नव्हतास तू
भावांत दडलेला होतास
माझ्या प्रत्येक श्वासात
अलगद मिसळलेला होतास
*
तू नसतानाही सोबत
शब्दही गाऊ लागले
मौनही बोलू लागले
तुझ्या आठवांच्या ओंजळीत
भाव सारे विसावले
*
तू नसतानाही सोबत
तुझ अस्तित्व जाणवत होतं
मनाच्या खोल कप्प्यातून
तुझ्यातच हरवत होतं
*
मीच माझ्या अंतरंगात
एक अनोखं गाणं झालं
ज्यात हरवणंही सुंदर वाटतं
आणि सापडणंही थांबतं
☆
© संगीता कुलकर्णी
लेखिका /कवयित्री
ठाणे
9870451020
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
