Category: कवितेचा उत्सव 2

श्री प्रमोद वामन वर्तक  

  चित्रकाव्य  

समाधान   श्री प्रमोद वामन वर्तक ☆

☆

कोवळी किरणे उन्हाची

पडती पिल्लांच्या अंगावरी,

अंग जणू शेकत बसली 

“दोस्ती मधल्या” कट्ट्यावरी!

*

मधेच थांबवून शेपटीसवे

त्यांचे खेळण्याचे चाळे,

पाहती टकामका मजकडे 

मोठे करून घारे डोळे!

*

बहुदा गेली असेल आई 

भक्ष शोधण्या दारोदारी,

वाट पहात तिची बसली 

खेटून एकमेकां शेजारी!

*

पोज मज दिली छानशी 

विषय मिळाला कवितेला,

लिहिता त्यावर चार ओळी 

झाले समाधान मनाला!

झाले समाधान मनाला!

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – pradnyavartak3@gmail.com

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ अभंग… ☆ प्रा तुकाराम दादा पाटील ☆

☆

मुखी नाम घेता घेता

खुले अंतरंग

सखा तेव्हा भेटे मज

माझा पांडुरंग

 *

गाठीभेटी होता होता

घडले संत संग

चंद्रभागे वाळवंटी

भक्तिचाच रंग

 *

टाळविणा झंकारते

वाजतो मृदंग

विठ्ठलच नाचतोय

विठ्ठलाच्या संग

 *

स्वर्ग सुख धरेवरी

होत जाते गुंग

कैवल्याच्या मागणीचा

रंगतो अभंग

 *

द्वैतभाव हरपला

झालो एकसंध

विठ्ठल जागृती

विठ्ठल उमंग

* 

धन्य तुकोबांची गाथा

ज्ञानियांची ज्ञानेश्वरी

नामदेवांचे किर्तन

वारकरी झाले गुंग

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री प्रमोद वामन वर्तक  

 कवितेचा उत्सव 

😅सा ब ण !🤣🙏 श्री प्रमोद वामन वर्तक ☆

(वेगळ्याच विषयावर कविता करण्याचा प्रयत्न !🙏)

☆

मी आकर्षक वेष्टनात

कायम बंदिस्त असतो,

ते होता मजवरून दूर

मी परिमळ पसरवितो !

 *

मला कोणी तयार करती

वापरून आयुर्वेदाचे शास्त्र,

पण खप वाढवण्या माझा

उत्तम जाहिरात हेच अस्त्र !

 *

जाहिरात करती माझी

चित्रपट तारे अन् तारका,

पण स्वतः वापरती कां

मनी मज शंका बरं का !

 *

सुगंध कृत्रिम नानाविध

असती माझीया अंगाला,

निवडा तुम्ही कोणताही

जो वाटे तुम्हा चांगला !

 *

मळ काढण्या शरीराचा

करती माझा प्रसार प्रचार,

दूर करण्या तुम्ही मनाचा

करा कायम सुविचार !

करा कायम सुविचार !

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – pradnyavartak3@gmail.com

≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री नीलांबरी शिर्के

  चित्रकाव्य  

भूमीवरती चित्र आगळे !!   सुश्री नीलांबरी शिर्के ☆

☆

ऊन कोवळे फिक्कट पिवळे

झाडांमधूनी हळू ओघळे !

ओघळलेल्या कवडशातुनी

भूमीवरती चित्र आगळे!!

*

कॅनव्हास जणू

झाली धरती

कुंचला घेई

निसर्ग हाती !!

*

उमटत जाई

अशा आकृती

गुंग होतसे

मानवी मती !!

*

शाश्वत चित्रण

येथे नसती

क्षणक्षण बदले

इथे आकृती !!

☆

© सुश्री नीलांबरी शिर्के

मो 8149144177

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. उज्वला सुहास सहस्रबुद्धे

 कवितेचा उत्सव 

☆ चैत्र पालवी… ☆ सुश्री उज्वला सुहास सहस्रबुद्धे ☆

☆

 चैत्र पालवी खुलून आली,

वठलेल्या त्या झाडावरती!

ग्रीष्म झळांनी सुकून गेल्या,

करड्या पिवळ्या फांद्यांवरती!.

*

आकाशातून रवी ओकतो,

सहस्त्र किरणांनी ती आग!

प्रतीक्षेत त्या येईल कधी,

सृष्टीतील सृजनाला जाग !..

*

नभात दिसती चुकार ढग हे,

शामल शुभ्र न् विखुरलेले!

अंतर ते क्षणी भरून येईल,

जलथेंबांनी ओथंबलेले !..

*

एक दिवस अन् नक्कीच येईल

विंझणवारा घालीत सृष्टीवरी

तहानलेला भवताल सारा,

अधीर प्राशण्या जल अधरावरी!

*

शांत सजल हे रूपदेखणे,

सृष्टीस मिळण्या वाट पाहते!

चैत्र पालवी आतुरलेली,

गंधीत रंगीत फुलून येते !

☆

© सुश्री उज्वला सुहास सहस्रबुद्धे

वारजे 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री शरद कुलकर्णी

 कवितेचा उत्सव 

☆ नित्य युद्धाचा प्रसंग… ☆ श्री शरद कुलकर्णी ☆

☆

छातीवरती तीर, मी

सहज झेलले होते.

प्रत्यंचा होउन धनुष्याची

ताण पेलले होते.

मी असा अद्भुत योद्धा

हरुन विजयी झालो.

युयुत्सु नसलो तरीही

युद्धास प्रत्ययी आलो.

नि:शस्त्र निहत्ता वीर

मी अहिंसेने लढलो.

झेलताझेलता वार

वीरगतीस प्राप्त झालो.

आम्हास नित्य युद्धाचा प्रसंग

उक्तीस शरण मी गेलो.

लढतालढता स्वत:शी

मग धारातिर्थी पडलो.

 ☆

© श्री शरद  कुलकर्णी

मिरज

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री हरिश्चंद्र कोठावदे

 कवितेचा उत्सव 

☆ दुभंग… ☆ श्री हरिश्चंद्र कोठावदे ☆

☆

  सगुणाचा साकाराचा भक्त दिंडीत नाचतो

 निर्गुणाच्या वारूळात मौन निराकार होतो

* 

कधी औदार्याचा राणा कधी कार्पण्याचा स्वामी

भोगी कधी ऐहिकाचा कधी स्मशानाचा जोगी

 *

हाच विदेही अनंत देहाचाही हाच बंदी

 तोडी वज्राच्या शृंखला कुसुमांचा हाच कैदी

 *

 पोथ्यापुराणात शोधी यक्षप्रश्नांचे  उत्तर

आरशात एक कोडे  करी यास निरुत्तर

 *

 याचे उत्थान असीम याचे पतनही धन्य

मायामोही गुंतलेली  मोक्ष भक्तीही अनन्य

 *

पंचप्राणा भिडे याच्या   दूर  हाक श्रेयसाची 

बेडी  तूटता  तुटेना पायातल्या प्रेयसाची

 *

द्वैत  अद्वैताचे द्वंद्व  काही केल्याही सरेना 

 दोन्ही घरात क्षुधार्त दोन्ही लोकीचा पाहुणा

 ☆

© श्री हरिश्चंद्र कोठावदे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

रेणुका धनंजय मार्डीकर

  चित्रकाव्य  

हा वाकांबी मनभावन…  रेणुका धनंजय मार्डीकर ☆

(उद्धव वृत्त)

(मात्रा : 2+8+2+2=14)

☆

फुललेल्या कारंजाची 

ही सुमने सुंदर सजली

अन् गंध गोड देताना 

मम् मनात सारी रुजली

*

हा वाकांबी मनभावन

मोहिनी घालतो कणकण

हे वैशाखाचे वैभव 

की रिमझिमणारा श्रावण

*

बहु रूप गुणाच्या खाणी

या कुंभी अंगी लपल्या

मी शब्दांना गोंजारत

त्या काव्यामध्ये टिपल्या 

*

श्वेतांगी तुषार त्यातच 

रक्तांगी मोहर फुलतो

हा कुंबी रंगीत शेला

पांघरताना मग खुलतो

*

हा वाक नामे आला

अन् जंगली पेरु झाला

शिरपेचावर वृक्षाच्या

जरतारी किरिटच ल्याला

*

हा वैद्यराज गुणकारी

लोभसवाणा मजमोही

मी कविता त्यावर करता 

मग सुखावला ना तो ही

☆

© रेणुका धनंजय मार्डीकर

औसा.

मोबा. नं.  ८८५५९१७९१८

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री अनिल वामोरकर

  चित्रकाव्य  

गणित… ☆ श्री अनिल वामोरकर ☆

☆

मुखी न येवो अवाक्षर

सद्गुरू आई खेरीज,

होईल पापांची नक्कीच वजाबाकी,

अन् पुण्याची बेरीज…

या जीवनाच्या गणितात

उरेल नक्कीच शून्य,

असता हृदयी तूझीच भक्ती,

मज नकोच काही अन्य..

सार्थ जीवन 

कृतार्थ हा जन्म

न देणे न मागणे

सुटले गणित मम…

☆

© श्री अनिल वामोरकर

अमरावती

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈