Marathi Kavita
सौ. उज्वला सुहास सहस्रबुद्धे
☆ शब्द मनीचे… ☆ सुश्री उज्वला सुहास सहस्रबुद्धे ☆
☆
मन दुखावले,
शब्द मूक झाले!
ओलावले डोळे,
संवाद न बोले!
*
अंतरात भाव,
निखळ प्रेमाचा!
शब्द शब्द माझा,
असे हृदयीचा!
*
नसे वाट सोपी,
खाच खळग्यांची!
कशी पार करू,
वेस विचारांची!
*
भाव भावनेचा,
खेळ निरंतर!
चालला मनात,
जीवनी दुस्तर!
☆
© सुश्री उज्वला सुहास सहस्रबुद्धे
वारजे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # ३१६
☆ पेढे वाटू गावा… ☆ श्री अशोक श्रीपाद भांबुरे ☆
☆
अधरावरती ओठ टेकता मधुर च्युइंगम व्हावा
या ओठांनी त्याच ठिकाणी कायम आश्रय घ्यावा
*
त्या मुरलीची घून ऐकुनी वेडी झाली राधा
मला वाटते तिच्याचसाठी शिकून घ्यावा पावा
*
ओठ तसा तर मिटून आहे काही बोलत नाही
तरी अंतरी श्वास कसा हा तिचाच करतो धावा
*
प्रीत सागरी संगम व्हावा याच्यासाठी आम्ही
नदी किनारी दिल्या सोडुनी दोन कागदी नावा
*
पलंगासही आज लगडुनी मस्त चांदणे आले
मधुचंद्राच्या रात्री आम्ही कलश दुधाचा प्यावा
*
वर्षभरातच हलो पाळणा चैतन्याचा येथे
उदरामधुनी तुझ्याच सखये छावा जन्मा यावा
*
तुझ्या नि माझ्या अस्तित्वाची खूण वाढते आहे
आगमनाच्या नंतर आपण वाटुन खाऊ मावा
☆
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्रीशैल चौगुले
कवितेचा उत्सव
☆ काव्यदर्पण… ☆ श्रीशैल चौगुले ☆
☆
भाव अंतरीचे उमटता मनी
साद हृदयात समेटतो ध्वनी.
*
दिशा नजरेत स्पंदनांचे शब्द
काव्य गुंफताना भावनांचे ऋणी.
*
बंध रेशमांचे सोयरिक नवे
भेट आयुष्याची आठवण जुनी.
*
ऋतू बहरात पाखरांची झेप
रंग संसारात पंखवेल वेणी.
*
ध्येय आभाळाचे गाठताना ओळ
धुंद लेखणीची भिजरी पापणी.
☆
© श्रीशैल चौगुले
मो. ९६७३०१२०९०.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
श्री तुकाराम दादा पाटील
कवितेचा उत्सव
☆ मी… ☆ प्रा तुकाराम दादा पाटील ☆
☆
नाही कधीच केल्या मजबूत योजना मी
करतो खुशाल आहे खोट्याच वल्गना मी
*
स्वातंत्र्य आज आहे झालाय कैदखाना
सोसून खूप थिजलो तेथील यातना मी
*
जमलेत गुंड सारे कोंडून मारणारे
थकलो करून आहे त्यांचाच सामना मी
*
वैरी बनून मजला जखडून टाखणा-या
दडपून टाकल्या त्या सा-याच वासना मी
*
झाले गुलाम सगळे विसरून हक्क त्यांचे
त्यांच्या कडून कसली घेतोय चालना मी
*
शोधून ही ठिकाणा ज्याचा मला मिळेना
ठेवू उगा कशाला त्याचीच कामना मी
*
ज्याच्यात प्रेम नाही आहेच दगड धोंडा
त्याच्या पुढे कशाची करतोय अर्चना मी
*
मी क्रोध जाळताना झालो मलूल तेव्हा
विसरून सर्व गेलो माझ्याच भावना मी
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री दीप्ती कुलकर्णी
कवितेचा उत्सव
☆ महत्व पदराचे… ☆ सुश्री दीप्ती कुलकर्णी ☆
(काव्यप्रकार : अष्टाक्षरी)
☆
तुझी सावली पदरा जपे अवस्थी अर्भक
थरी मायेचा पदर सदा बनतो रक्षक ||१||
*
कधी पदर रुमाल ठरे हात पुसण्याला
माझा ठरतो आधार नित्य मम मदतीला ||२||
*
पदराची बाब खास थोपवितो तो उन्हाला
माझ्या डोक्यावर येतो सावली ती धरण्याला ||३||
*
पदराच्या सावलीत सांगे हितगुज मन
असे अमाप विश्वास मुक्त होई मन तन ||४||
*
असो कसाही पदर सुती असो वा रेशमी
एक भाव जपे सदा साथ देतो तो नेहमी ||५||
*
पदराच्या सावलीत नसे कशाचीच भ्रांत
माया पाझरे अंतरी मन करतसे शांत ||६||
*
ममतेचा हा पदर छत्र होई सदा शिरी
होई सदा आश्वासक छाया धरी सर्वांवरी ||७||
☆
© सुश्री दीप्ती कोदंड कुलकर्णी
हैदराबाद
भ्र.९५५२४४८४६१
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री अनिल वामोरकर
कवितेचा उत्सव
☆ कर्म… ☆ श्री अनिल वामोरकर ☆
☆
आपुलकीच्या
नात्याने
स्नेह जपावा
मनामध्ये
अन् चुकू नये कधी
कर्तव्यामध्ये…
नकोत केवळ
विटांच्या भिंती
स्वार्थ विरहीत
प्रेम असावे चित्ती…
येणा-याचे अगत्याने
स्वागत करु या
जाणा-याच्या मनात
ओढ वाटावी परतण्याची तया…
आज आहोत
उद्या नसू हयात
ओठी प्रत्येकाच्या
नामोल्लेख असावा तयात…
☆
© श्री अनिल वामोरकर
अमरावती
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कविराज विजय यशवंत सातपुते
कवितेचा उत्सव # २७९ – विजय साहित्य
☆ मौलिक प्रवास…! ☆
☆
मित्रासवे दुचाकीने
बालपणी दिली साथ
जवळच्या प्रवासात
“सायकल” दावी वाट…! १
*
वाट वाकडी तिकडी
कींवा डोंगराचा घाट
कच्च्या पक्क्या रस्त्यातून
“सायकल” काढी वाट…! २
*
कधी मागे, कधी पुढे
बैसवोनी सवंगडी
वाण सामान वहाया
“सायकल” हरघडी…! ३
*
हवा भरताच धावे
प्रवासात भरे रंग
“सायकल” सफरीचा
मनमौजी असे ढंग…! ४
*
हातामध्ये असे ब्रेक
नियंत्रित हिची धाव
क्षण भर विश्रांतीचे
गाठी मुक्कामाचा गाव…! ५
*
नित्य घडतो व्यायाम
वेळ वाचवीते खास
नाही खास देखभाल
करी मौलिक प्रवास..! ६
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ.ज्योत्स्ना तानवडे
कवितेचा उत्सव
☆ सन्मानचिन्ह ☆ सौ.ज्योत्स्ना तानवडे ☆
☆
जन्म दिला माऊलीने
पदरात जोजविले
तिच्या पदरात सदा
प्रेम वात्सल्य लाभले ||
*
आजी मावशी ताईचा
लाभे पदर मायेचा
येता कसले संकट
हात देती आधाराचा ||
*
चूक पदरात घेई
खूणगाठ पदराला
बांधी पदरी निखारा
वाण सतीचे बाईला ||
*
ओटी पदरात घेते
संसारात प्रवेशिता
सारे सर्वस्व सखीचे
पदरी सुरक्षितता ||
*
पदराचे आभूषण
खूण तिच्या सौंदर्याची
शोभे तिला प्रभावळ
शान तिच्या सन्मानाची ||
☆
© सौ.ज्योत्स्ना तानवडे
वारजे, पुणे.५८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री राजकुमार दत्तात्रय कवठेकर
कवितेचा उत्सव
☆ गांव… ☆ श्री राजकुमार कवठेकर ☆
☆
कोठे असेल ते गांव जिथे आहे पोचायचे
कशी गांवची त्या वाट जिच्यावरून जायचे
*
कसे असेल ते गांव? भग्न? भकास? समृद्ध?
सप्तसूरांत भिजले? की ते असेल नि:शब्द?
*
असतील का सोबती? का तो भयाण एकांत?
जीणे असेल का तृप्त? समाधानी आणि शांत?
*
लळा इथला तरीही आहे हंगामी मुक्काम
जरी सुखवस्तू तरी आहे भाडोत्री हे धाम
*
असो कसेही ते गांव आणि गांवची त्या वाट
कधीतरी सोडावी ही लागणार वहिवाट
☆
© श्री राजकुमार दत्तात्रय कवठेकर
कवी / गझलकार
संपर्क : ओंकार अपार्टमेंट, डी बिल्डिंग, शनिवार पेठ, आशा टाकिज जवळ, मिरज मो ९४२११०५८१३
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री वर्षा बालगोपाल
चित्रकाव्य
आई गं आई… सुश्री वर्षा बालगोपाल ☆
☆
आई गं आई
एवढी का तुला घाई
पावसात हात धरून चाललीस तरातरा
मनी भूभू भिजतय बघ ना तू जरा ||
*
ज्ञानेश्वरांचे पसायदान तूच तर शिकवले
भूतां परस्परे जडो मैत्र जीवांचे सांगितले
मग मला या दोघांशी मैत्री करू दे
माझ्या छत्रीत दोघांना घेऊ दे ||
*
आता नको म्हणू मस्तीखोर
अगं मीच तुझा ना चित्तचोर
बघ तू माझे मित्र आपल्या बरोबर राहतील
पसायदान ते पण शिकतील ||
☆
© सुश्री वर्षा बालगोपाल
मो 9923400506
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
