Category: कवितेचा उत्सव 2

सुश्री नीलांबरी शिर्के

  चित्रकाव्य  

– बदक आणि मासोळी…–  ☆ सुश्री नीलांबरी शिर्के ☆

☆

मस्तीमध्ये जली विहरता

उसळूनी थोडे खेळू म्हटले

चोच उघडूनी मृत्यूचे रूप

क्षणात नजेरेपुढे ठाकले

काही कळेना काही सुचेना

तशीच क्षणभर स्तब्ध  राहिले

पाण्यामधली मासोळी मी

सळसळकरीत तळात गेले

☆

© सुश्री नीलांबरी शिर्के

मो 8149144177

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीमती रंजना मधुकरराव लसणे 

 कवितेचा उत्सव 

☆ रंजना जी यांचे साहित्य # 157 – लोकमान्य टिळक ☆ श्रीमती रंजना मधुकरराव लसणे ☆

☆

जिल्हे रत्नागिरी।

चिखली या ग्रामी।

जन्मे रत्न नामी।

लोकमान्य १ ।।

 

अलौकिक बुद्धि।

 निर्भय करारी।

अन्याय जुगारी

सर्वकाळ।।२।।

 

जन्मसिद्ध हक्क।

स्वराज्य मानतो।

ऐसी ग्वाही देतो।

मिळवीन।।३।।

 

स्वदेशी वापर

पर बहिष्कार।

राष्ट्रीय शिक्षण।

चतुःसुत्री।।३।।

 

करी वंगभंग।

भारी आंदोलन।

शक्ती संघटन।

सर्वकाळ।।४।।

 

होमरूल लीग

करीतसे क्रांती ।

चेतना जागृती ।

जनतेत।।५।।

 

कालगणना नि

टिळक पंचांग।

शोधक अथांग।

बुद्धिमान ।।६।।

 

गीतारहस्याने ।

भारत जागृती।

वैचारिक दिप्ती।

ओरायने।।६।।

 

केसरी मराठा।

यांचे संस्थापक।

दक्ष संपादक।

लोकनेते।।७।।

 

लेखणीचा वार।

ब्रिटिशांना घोर।

तिमिरात भोर।

उजाडली।।८।।

 

शिवजन्मोत्सव।

नि गणेशोत्सव ।

जन महोत्सव ।

सर्वांसाठी।।९।।

 

कारागृही केली।

साहित्य निर्मिती।

आयुष्य आहुती।

देशासाठी।।१०।।

☆

©  रंजना मधुकर लसणे

आखाडा बाळापूर, जिल्हा हिंगोली

9960128105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

कविराज विजय यशवंत सातपुते

कवितेचा उत्सव # 179 – विजय साहित्य

☆ 🌼 निघाली पालखी 🌼 ☆ कविराज विजय यशवंत सातपुते ☆

संत तुकाराम महाराज पालखी सोहळा

(सहाक्षरी रचना)

☆

इनाम दाराचा

सोडूनी या वाडा

निघाली पालखी

सवे गावगाडा ..! १

 

आकुर्डी गावच्या

विठू मंदीरात

तुकोबा पालखी

तांबे गजरात ..! २

 

पुण्य नगरीत

दिव्य मानपान

जागोजागी चाले

अन्न वस्त्र दान ..! ३

 

पालखी विठोबा

पुण्यनगरीत

निवडुंग्या विठू

रमे पालखीत..! ४

 

लोणी काळभोर

वेष्णवांचा मेळा

सोलापूर मार्गी

हरीनाम वेळा..! ५

 

तुकोबा पालखी

यवत मुक्काम

दिंड्या पताकांत

निनादते धाम ..! ६

 

वरवंड गावी

पालखी निवास

आषाढी वारीचा

 सुखद प्रवास ..! ७

 

आनंदाचा कंद

गवळ्याचे नाव

रंगले वारीत

उंटवडी गाव…! ८

 

मंगल पवित्र

क्षेत्र बारामती

कैवल्याची वारी

सुखाच्या संगती …! ९

 

सणसर गावी

विठ्ठल जपात

रंगली पालखी

हरी कीर्तनात…! १०

 

आंधुर्णे गावात

घेताच विसावा

माय माऊलीत

विठ्ठल दिसावा…! ११

 

गोल रिंगणाचा

बेळवंडी थाट

निमगावी क्षेत्री

केतकीची वाट..!

 

इंदापुर येता

रिंगणाचे वेध

गण गवळण 

अभंगात मन…! १२

 

सुमनांची वृष्टी

सराटी गावात

अमृताची गोडी

विठ्ठल नामात..! १३

 

गोल रिंगणाचे

अकलूज गांव

मनामधे जागा

विठू भक्तीभाव…! १४

 

येता बोरगाव

 दिंडी नाचतसे

काया वाचा मनी

विठू राहतसे…! १५

 

पिराची कुरोली

शिगेला गजर

पंढरपुरात

पोचली नजर..! १६

 

वाखरी गावात

मिलनाची वेळा

रमला वारीत

वैष्णवांचा मेळा..! १७

 

कळस दर्शंनी

पाऊले अधीर

धावतसे मन

सोडूनीया धीर..! १८

 

ज्ञानोबा तुकोबा

वाखरीत मेळ

विठू दर्शनाची

यथोचित वेळ…! १९

 

वैष्णवांची वारी

हरीनाम घोष

वारीचा सोहळा

परम संतोष…! २०

 

पोचली पालख्या

पंढर पुरात

आनंदला विठू

भक्तीच्या सुरात..! २१

 

युगानु युगाची

कैवल्य भरारी

अखंड प्रवाही

आषाढीची वारी…! २२

© कविराज विजय यशवंत सातपुते

श्री सुजित कदम

 कवितेचा उत्सव 

☆ सुजित साहित्य # 165 ☆ संत भानुदास…☆ श्री सुजित कदम ☆

एकनाथ पणजोबा

नामांकित संतकवी

थोर संत भानुदास 

ऋचा अभंगाची नवी…! १

 

सुर्यपुजा उपासक

भक्त विठ्ठलाचे खास

मुखी पांडुरंग नाम

हरिभक्ती सहवास…! २

 

मिळविली यश कीर्ती

कापडाच्या व्यापारात

संत भानुदास भक्त

पांडुरंग अंतरात…! ३

 

मनामध्ये भक्ती भाव

दृढ निश्चयाचे बळ

संत भानुदास रूप

परमार्थ चळवळ…! ४

 

परकीय आक्रमणे

तांडे यवनांचे आले

मठ देवळे फोडून

पीर दर्गे  फार झाले…! ५

 

नाना अभंग आख्याने

भानुदास ग्रंथ सार

भक्तीभाव प्रबोधन

मनी विठ्ठल साकार…! ६

 

सेवाभावी भानुदास

प्रासादिक केली भक्ती

पांडुरंग आशीर्वादे

अभंगात दैवी शक्ती…! ७

 

भव्य देऊळ बांधले

राजा कृष्ण राय याने

नाम विठ्ठल स्वामींचे

शिलालेख कौशल्याने..! ८

 

नेली विजय नगरी

पांडुरंग पुजा मूर्ती

भानुदास प्रयत्नाने

पंढरीत विठू मूर्ती…! ९

 

घाली विठ्ठला साकडे

चला जाऊ पंढरीस

धीर धरा भानुदास

सांगे विठू समयास…! १०

 

तुळशीच्या हारासह

घाली गळा रत्नहार

विठ्ठलाने भानुदासा

दिला दैवी उपहार…! ११

 

गळी ‌हार‌ पाहुनीया

ठरवीले दासां चोर

झाली पांडुरंग कृपा

विठू भक्ती ठरे थोर…! १२

 

बंदी केला भानुदास

मृत्यू दंड सुनावला

व्यर्थ आळ भक्तांवर

पांडुरंग रागावला…! १३

 

सोडूनीया राजधानी

विठू आला पंढरीत

भानुदास दोषमुक्त

लीन झालासे वारीत…! १४

 

भानुदास आळवणी

विठू भानुदासा सवे

पांडुरंग पुजा मुर्ती

परतले रुप नवे…! १५

 

भानुदासी कुळामध्ये

पुन्हा जन्मे जगन्नाथ

विष्णु देव अवतार

तेची संत एकनाथ….! १६

 

पंढरीत महाद्वारी

गरुडाच्या मंडपात

संत भानुदास रूप

चिरंतन पादुकात….! १७

 

कार्तिकाची एकादशी

पुण्यतिथी महोत्सव

संत भानुदास स्मृती

परंपरा रथोत्सव….! १८

 

© श्री सुजित कदम

संपर्क – 117, विठ्ठलवाडी जकात नाका, सिंहगढ़   रोड,पुणे 30

मो. 7276282626

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

  चित्रकाव्य  

– भंगारवाला… –  ☆ श्री सुनीत मुळे ☆

(हायफाय हॉलबाहेर बेपर्वा श्रीमंतीनं फेकलेल्या अर्ध्या रित्या पाण्याच्या बाटल्या भंगारवाला झाडांच्या मुळात ओतत होता. एक संवेदनशील फोटो आणि काव्य रचना…)

☆

वरवर बघता वाटत असेल,

याचा धंदा केवळ भंगार !

उपेक्षेच्या जगण्यालाही,

याने केला आहे शृंगार !

☆

वजन कमी करण्यासाठी,

पाणी ओततो मुळावर !

आतमधे सजली माणसं,

अतृप्तीच्या सुळावर !

☆

भंगारवाला नसेल तर,

बकाल होईल सगळं जग !

ए.सी.ची तर वृत्ती अशीच,

आत गारवा,बाहेर धग !

☆

ओझं कमी करण्यासाठी,

ओतलं नाही वाटेल तिथं !

त्याचा सद् भाव ओतत गेला,

तहानलेली झाडं जिथं !

☆

सावलीवरती हक्क सांगत,

झाडाजवळ थांबत नाही !

माझ्यामुळेच जगलंय असं,

स्वतःलाही सांगत नाही !

☆

“निष्काम कर्म ” गीतेमधलं,

कळलेला हा पार्थ आहे !

“जीवन”देऊन,भंगार घ्यायचं,

केवढा उंच स्वार्थ आहे !

☆

पाणी विकत घ्यायचं आणि,

अर्ध पिऊन फेकून द्यायचं !

कृतज्ञता / कृतघ्नता,

याचं भान केव्हा कसं यायचं?

☆

डिग्रीपेक्षा नेहमीच तर,

दृष्टी हवी अशी साक्षर !

भंगारवाला अंतर्धान नि,

अवतीर्ण होतो ईश्वर !

☆

कवी : अज्ञात

प्रस्तुती : सुनीत मुळे 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈