Category: कवितेचा उत्सव 2

कविराज विजय यशवंत सातपुते

कवितेचा उत्सव # २६७  – विजय साहित्य

☆ विजया दशमी…! ☆

☆

आली विजयादशमी

करू‌ रावण दहन

वध महिषासूराचा

देवी महात्म्य गहन…! १

*

सण विजयी हसरा

कुलरीत परंपरा

सरस्वती पुजनाने

वाटू‌ सोने परस्परा…! २

*

गाव सीमा उल्लंघूनी

करू संकल्प सृजन

सण दसऱ्याचा आला

दूर ठेवूया दुर्जन…! ३

*

अष्टदल रेखाटून

शारदेची आराधना

ग्रंथ संपदा पुजन

सारस्वती उपासना…! ४

*

पाटी पुजनाची प्रथा

संस्कारांची रूपरेषा

सीमा उल्लंघुनी जाऊ

अंतरीच्या दिव्य देशा..! ५

*

पाने आंब्याची लावून

दारी तोरण सजले

झेंडू पिवळा केशरी

घर आनंदें नटले…! ६

*

अक्षरांनी अक्षरांची

वर्णियली शब्दमाला

नव कार्य शुभारंभ

सण दसऱ्याचा आला…! ७

*

आज आहे महोत्सव

कला शिक्षण शक्तीचा

धनधान्य शस्त्रपुजा

ठेवा सात्विक भक्तीचा..! ८

*

नको दुष्कर्माचा संग

घेऊ आज गळाभेट

मनामधे करू घर

राहू काळजात थेट..! ९

*

नानाविध परंपरा

सांभाळत आला सण

कुल दैवत स्मरणी

रंगे एक एक क्षण…! १०

☆

© कविराज विजय यशवंत सातपुते

सहकारनगर नंबर दोन, दशभुजा गणपती रोड, पुणे.  411 009.

श्री राजकुमार दत्तात्रय कवठेकर

 कवितेचा उत्सव 

☆ भुरूभुरू पावसात फिरतांना… ☆ श्री राजकुमार कवठेकर ☆

☆

या भुरुभुरु पावसातून फिरताना

किती आल्हाददायक वाटतंय.

*

ही ओली वाट दुतर्फा हिरवाळीच्या गालिच्यासारखी….

रस्त्यावरची छोटी छोटी तळी..

अन् त्यात डुंबणारी पाखरं…

तान्हुल्याच्या जावळासारखी झुलणारी शेते….

फांद्या फांद्यावर गाणारा पाखरांचा थवा…

कोवळ्या उन्हात चमचमणारे दवबिंदूंचे मोती…

फुलांचा अन् ओल्या मातीचा दरवळ…

ओठांवर येऊन थांबलेले निळे गाणे…

वाटतं

संपूच नये ही वाट अन् चालणं ही.

*

या भुरुभुरु पावसातून फिरताना

किती आल्हाददायक वाटतंय,

भर उन्हातून ‘तिच्या’ सोबत

जात असल्यासारखं…

☆

© श्री राजकुमार दत्तात्रय कवठेकर

कवी / गझलकार

संपर्क : ओंकार अपार्टमेंट, डी बिल्डिंग, शनिवार पेठ, आशा  टाकिज जवळ, मिरज मो ९४२११०५८१३

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

प्रा. सौ. सुमती पवार

 कवितेचा उत्सव 

☆ माझ्या स्वप्नात सजते… ☆ प्रा. सौ. सुमती पवार ☆

☆

आले गेले, किती ऋतू आले गेले

पण पुरे नाही झाले कधी स्वप्नांचे झमेले…

किती गोड दिसते तू, किती गोड हासते तू

तुझे अधर भासती जणू मधू अमृताचे पेले…

*

कळी होऊन फुलते फूल होऊन झुलते

का ग येऊन स्वप्नात मज डोळे मिचकावते

फांदी फांदी बहरावी लहरते वाऱ्यावर

बंद डोळ्यांनी मारून टपली अवचित जाते..

*

जणू नशा तू चढते मनी घुटमळते घुटमळते

तोल जातो अवचित मग नशा उतरते

तू फुलते फळते मोहरते अंगोपांगी

तळहातावर जणू लाल मेहेंदी रंगते..

*

कुण्या राजाची होऊन राणी मागे वळून पाहते

आणि रोज रोज मग माझ्या स्वप्नात सजते…

☆

© प्रा.सौ.सुमती पवार 

नाशिक

मो. ९७६३६०५६४२; ईमेल – svpawar6249@gmail.com

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. रेणुका धनंजय मार्डीकर

  चित्रकाव्य  

संक्रांतवेल मनोहर …   सौ.रेणुका धनंजय मार्डीकर ☆

☆

बहरून आली पानोपानी

कांती केशरलेली

संक्रांतवेलही दवबिंदूसह 

गगनाला भिडण्या गेली

*
झिरमिर झिरमिर झिरमाळ्यांचे

गुच्छ लगडले सारे

झोके देती हलके छेडत

पवनाचे धुंद इशारे

*

थडथडणारी थंडी त्यातच 

बहरून बहरून जाते

केशरी शेला अहा लपेटून 

मनात माझ्या गाते

*

गंध नसे पण रंग देखणा

नजर सुखावून जाते 

स्वागत करती गुच्छ साजरे

गगनाशी यांचे नाते

*
चिवचिवणारे पक्षी येऊन

घरटी त्यावर विणती

महावेल म्हणुनी होते 

संक्रांतवेलीची गणती

*

दुरून वाटते आग लागली 

वेलीवरती सारी 

उत्तरायण आले आले 

शुभपर्वाची नांदी न्यारी

*
थंडी मधला शेला झाला

शब्दांचा माझ्या सुंदर

मम काव्यात बहरून आली

संक्रांतवेल मनोहर…

*

© सौ.रेणुका धनंजय मार्डीकर

औसा.

मोबा. नं.  ८८५५९१७९१८

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

श्री सुहास सोहोनी 

  चित्रकाव्य  

– घाणेरी –  ☆ श्री सुहास सोहोनी ☆

☆

हो मी घाणेरी, घाणेरी, कुणी हसा वा चिडवा;

नाही करणार कधी, बागेतल्यांचा मी हेवा… 

*
शालू हिरव्या पानांचा, त्याला कातरी किनार;

रंगरुपाने देखणी, बहुगुणी अशी नार… 

*

काया काटेरी तरीही, फळे असती मधूर;

श्रावणातल्या पाण्याचे, मला सुखावती सूर… 

*
चार कौतुकाच्या ओळी, लिहिल्या ना माझ्यावर;

दुर्लक्षिती सारे तरी, नाही घेत मनावर… 

*

कुणी घेईल जवळ, किती वाट मी पाहते;

खंत उरातली माझ्या, कवीमनाला कळते..

*

वईदांड्यातून आता, आले आहे मी बागेत;

कधीतरी मिळेलच, स्थान फुलांना पुजेत… 

*

छान दिसणे असणे, फार फरक दोन्हीत;

दु:ख पचवून सारे, द्यावा आनंद हसत… 

*

ऋतू येतील जातील, खंत कशाला करावी;

जिद्द आणिक उमेद, जगण्याची ना सोडावी… 

*

गूज सांगून मनीचे, झाले मोकळी मोकळी;

आता बहरेल पुन्हा, माझी डहाळी डहाळी……

आता बहरेल पुन्हा, माझी डहाळी डहाळी……

🌹

कवी : मेधानुज

प्रस्तुती : श्री सुहास सोहोनी 

रत्नागिरी

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ.वनिता संभाजी जांगळे

  कवितेचा उत्सव 

संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ श्रद्धा… ☆ श्रीशैल चौगुले ☆

☆

‘नासा’चा नि भक्तीवासाचा

तसा कसलाही भेद नाही श्रध्देत

एक विज्ञानात बोलतो, दुसरा ज्ञानात

देव सर्वत्रच कर्तव्याचे ठेवीत असतो भान

जसा अंतरी नाचतो आनंद

सौख्यभरे

तसा अप्रत्यक्ष दर्शनार्थी’मिडीया’

माध्यमातून

फक्त आपण क्रियेत रहावे

आळवत भक्ती अंतरंग,

कधी अभंगात, ध्यानस्थी

तर कधी पुजा-पाठ नि त्याच्याच नामजप अथवा नामघोषात.

उमटतात अक्षरे ग्रथातील प्रत्येक

पानात

कधी अध्यात्म अध्याय होऊन,

तर कधी वेबसाईटवर ऐप्सद्वारे,

जिथे न दिसतो, तिथेच वसतो

अवकाशात फिरतो भौतिकातून,

आप तेज वायू पृथ्वी आकाश व्यापून

धरतीवर पुन्हा मुर्ती स्तब्ध

कधी मंदिर-मठ नि आश्रमातून

घंटानादात संत नि आधुनिक

संशोधकांच्या दैववादात.

 ☆

© श्रीशैल चौगुले