मराठी साहित्य – कवितेचा उत्सव ☆ हेचि दान देगा देवा… ☆ श्री अनिल वामोरकर ☆

By Hemant BawankarNo Comments

श्री अनिल वामोरकर

? कवितेचा उत्सव ?

☆ हेचि दान देगा देवा… ☆ श्री अनिल वामोरकर ☆

☆

पाहीले मी

एक स्वप्न नवे

दूर गवताचे हिरवेगार,

गालीचे होते पसरले…

 

नदी नाले

ओसंडून वाहत होते,

नाद खळाळत्या पाण्याचा

कानात घुमतो आहे..

 

प्रत्येकाच्या

होते सुहास्य वदनी,

मतमतांतरे होती

मन भिन्नता मात्र नव्हती..

 

नव्हते कुणाच्याही

मनात जातीपातीचे किल्मिषे

धार्मिक सण साजरी होई

उत्साने, आनंदाने..

 

स्वप्नात पाहीले

ते सत्यात उतरु दे

राहू दे गुण्यागोविंदाने

देवा हेचि दान दे…

☆

© श्री अनिल वामोरकर

अमरावती

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ अंकुरित आभाळ… ☆ सुरेखा चिखलकर ☆

By Hemant Bawankar1 Comment

सुरेखा चिखलकर

संक्षिप्त परिचय 

सुरेखा महिपती चिखलकर

शिक्षण – B.A. मराठी
दिव्यांग – 80% दोन्ही पायांनी

सध्या सामाजिक कार्य, कवयित्री, ब्यूटी पार्लर आणि लेडीज शॉप चालवते. सामाजिक कार्यासाठी महाराष्ट्र शासनाचा पुण्यश्लोक अहिल्याबाई होळकर पुरस्कार, आणि साहित्यिक 30 आसपास पुरस्कार.वाचन आणि लेखन अविरत चालू आहे…

 

? कवितेचा उत्सव ?

☆ अंकुरित आभाळ… ☆ सुरेखा चिखलकर ☆

☆

अजाणत्या वयात कळत नव्हते काही

सर्वासारखे मला उभे राहता येत नाही…

*

पण याच जमिनीत एक स्वप्नांचा अंकुर रुजला ,

पंख नसतानाही आभाळाकडे झेप घेण्याचा ध्यास लागला..

*

दोन्ही हात जमिनीवर उड्या मारण्याची हौस भारी ,

पण ह्याच जिद्दीतून फुलली माझ्या अस्तित्वाची गाथा खरी..

*

कळले जेव्हा बालमनाला दोष दिला नाही देवाला

आरूढ झाले दैवावरती केली सुरवात शिकण्याला…

*

केली चिरफाड पायांची जिद्द होती उभे राहण्याची

 नशिबाने दिली आस मिळाली साथ कुबड्यांची …

*

शिक्षणाची पायरी दिवसेंदिवस चढत नव्या उमेदीने घडत होते,

लेखणीच्या बळावर मी आभाळालाही स्पर्श करत होते…

*

तुटले होते पंख जरी घेतली झेप उडण्यासाठी

अंकुरलेल्या स्वप्नांना कवेत घेण्यासाठी…

*

बनेल उदाहरण प्रत्येकाला सोडून लाचारी भिड आयुष्याला

थकतील पाय जरी पथ चाल तू घडण्याला…

*

नाही  आशा मला उद्याची धडपडते मी मनोरुग्णांसाठी,

मांडते रोज नवा डाव स्वतःशीच पुन्हा जिंकण्यासाठी..

*

धन्य ती माझी मायमाउली  उभी मी आज तिच्यासाठी,

जोपासले तिने कष्टाने ताठमानेने लढण्यासाठी…

*

ऋण तुझे फेडण्यास आई नको दुसरी ओटी,

पुन्हा पुन्हा जन्म मिळो माय तुझ्याच ग पोटी

🙏 

© सुरेखा महिपती चिखलकर

गोटखिंडी, तालुका वाळवा

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ नाते असावे असे… ☆ प्राची अभय जोशी ☆

By Hemant BawankarNo Comments

प्राची अभय जोशी

? कवितेचा उत्सव ?

☆ नाते असावे असे… ☆ प्राची अभय जोशी ☆

☆

माती आणि दगडाचे

असे आगळे वेगळे नाते

सृष्टी मात्र दोघांनाही

स्वतः सारखेच जपते.

 

पहिल्या पावसाची माती

ओला सुगंध पसरवते

दगड भिजतो तेंव्हा मात्र

त्याला लकाकी येते

 

पावसातील माती ही

अवखळपणे वाहते अन्

दगडाचे दिसून येते

एकाच जागी स्थिरावणे.

 

माती आणि दगडाचे हे

प्रतिक आहे भावनांचे

प्रत्येक वेळी विरघळताना

असे स्थिरतेने पाहणे

 

दोघांकडेही पाहताना वाटे असे सारखे,

दगडाचे फक्त पाण्यात भिजणे…

अन्

मातीचे अगदी निरागसतेने विरघळणे…

 

भिजणे आणि विरघळणे जणू

हे असे निसर्गाचे सांगणे

या मानवाचे,

एकमेकांचे असे होऊ शकते का

स्वच्छ आणि नितळ नाते ?

☆

©  प्राची अभय जोशी

मो 9822065666 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ विजय साहित्य # २८४ – सोबती…! ☆ कविराज विजय यशवंत सातपुते ☆

By Hemant BawankarNo Comments

कविराज विजय यशवंत सातपुते

? कवितेचा उत्सव # २८४ – विजय साहित्य ?

☆ सोबती…! ☆

☆

वेळ द्यायचा कुणाला

वैयक्तीक गोष्ट ठरे

जिवलग मित्रासाठी

पाझरती स्नेहझरे..! १

*

नसे मैत्रीत हिशोब

असे प्रेम जीवापाड

नाही लपू देत कुणा

संशयाच्या दाराआड…!२

*

मैत्री नाही व्यवहार

नाही‌ स्वार्थी देणे घेणे

निरालस अपेक्षांचे

जाते देऊनीया देणे…!३

*

शब्दाविना जिथे जिथे

काढी आवर्जून वेळ

त्याच नात्यामधे जमे

जीवलग मैत्री मेळ…!४

*

कोणत्याही अटीविना

नाते मैत्रीचे टिकेल

अविश्वास संशयाला

तिथे निरोप मिळेल…!५

*

कुणासाठी द्यावा वेळ

नाही सांगावे लागत

जिथे वाहे स्नेह झरा

तिथे येतसे धावत…!६

*

त्याच त्याच चुका जेव्हा

सवयींचा होती भाग

नाते निखळ मैत्रीचे

जाते लावूनीया आग..!७

*

नको अपेक्षांचे ओझे

करा मित्रांची कदर

वेळ वाईट‌ येताच

धरा मैत्रीचा पदर…! ८

*

समर्थन पडे थिटे

फाटे कारणांची झोळी

दोष स्वभावाचे करी

सुखी जीवनाची होळी…!९

*

आहे ताकद तोवर

पैसा खेळतो हातात

आयुष्याच्या‌ संध्याकाळी

हवा‌ सोबती दारात…!१०

☆

© कविराज विजय यशवंत सातपुते

सहकारनगर नंबर दोन, दशभुजा गणपती रोड, पुणे.  411 009.

मोबाईल  8530234892/ 9371319798.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ कीर्तीचा मृदंग… ☆ प्रा. भरत खैरकर☆

By Hemant BawankarNo Comments

प्रा. भरत खैरकर

? कवितेचा उत्सव ?

☆ कीर्तीचा मृदंग… ☆ प्रा. भरत खैरकर ☆

☆

विरुनी जरा उरावे, धरित्रीच्या ठायी

वेडे समर्पण आपले होईल सुगंधी जाई!

* 

इच्छांची टोके आपल्या बांधती रेशीमगाठी

उचलावे आयुष्य सारे श्रमाळल्या हाती!

 *

शीव ओलांडूनी दुराव्याची पंखात घ्यावे आभाळ

आसमंती वास्तव्य जरी कां धरित्रीत असावी नाळ!

 *

आत्म्याची राख होता अश्रूंचे वाढी ओझे

काळाच्या उदरात कीर्तीचा मृदंग वाजे!

☆ 

© प्रा. भरत खैरकर

संपर्क – बी १/७, काकडे पार्क, तानाजी नगर, चिंचवड, पुणे ३३. मो.  ९८८१६१५३२९

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – चित्रकाव्य ☆ हा रक्तपुष्पी फुलोरा… ☆ रेणुका धनंजय मार्डीकर ☆

By Hemant BawankarNo Comments

रेणुका धनंजय मार्डीकर

?️?  चित्रकाव्य  ?️?

? हा रक्तपुष्पी फुलोरा… ? रेणुका धनंजय मार्डीकर ☆

(वृत्त : उद्धव, मात्रा : 2+8+2+2=14)

☆

ते रूप विहंगम दिसते 

उमलून रोज येताना 

जास्वंद देखणा हसतो

पानात फूल होताना 

*

स्वागत अरुणाचे करण्या

अरुणा नामाने येतो

हरिवल्लभ कोणी म्हणती

श्री चरणी सेवा देतो 

*

गजवदनाला प्रिय भारी

ही जवाकुसुमी फुलारी

हा लाल लाल जयपुष्पी

किरिटावर शोभा न्यारी

*

रंगात रंगला सारा 

हा रक्तपुष्पी फुलोरा 

पिवळा, जांभळा, भगवा

अन् शुभ्र दिसे हा गोरा

*

बहुगुणी आणि उपयोगी

कुंतलास जासुम जपतो

झुपक्यात उमलतो गोंडा

झिरमाळी पानी लपतो

*

मी पाहत बसते याला 

वाऱ्यावर झुलतो जेव्हा

कलिकेचे फुलात सजणे 

भ्रमराचे गुंजन तेव्हा

*

पाकळीत झालर फुलते

रंगांच्या मखमालीवर

काव्यात उतरतो माझ्या

गाणे होते मग सुस्वर

☆

© रेणुका धनंजय मार्डीकर

औसा.

मोबा. नं.  ८८५५९१७९१८

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

Please share your Post !

Shares

मराठी साहित्य – चित्रकाव्य ☆ मराठीची ऐशी की तैशी! ☆ श्री प्रमोद वामन वर्तक ☆

By Hemant BawankarNo Comments

श्री प्रमोद वामन वर्तक  

?️?  चित्रकाव्य  ?️?

☆ मराठीची ऐशी की तैशी! ☆ श्री प्रमोद वामन वर्तक ☆

☆

(काल बेला शेंडे हिच्या लाईव्ह शो ने लोकसत्ताच्या “अभिजात लिट फेस्टची” सांगता गडकरीला झाली. पण तिकीट बारी वरील पाटी बघून (फोटो बघा) डोकं भणाणून गेलं! तेंव्हा कार्यक्रम बघतांना लिहिलेली रचना!)

*

मराठी लिट फेस्टमध्ये 

भाषेची पडली बत्तीशी,

जीव सोडला मराठीने 

ठाण्यात कालच्या दिवशी!

*

प्रयोग ‘नवीन नाटकाचा’

होता काल हाउसफुल्ल,

बोर्ड बघून गडकरीचा 

दांडी मराठीची झाली गुल!

*

‘बेला’चं नवीन नाटक 

तिला सुद्धा माहित नसावं,

बोर्ड बघून वाटलं लोकांना 

आता हसावं कां रडावं!

*

खरी ‘अभिजात मराठी’

लोकसत्तालाच कळली,

डोळ्यात भरण्या सारखी 

*फेस्टची सांगता झाली! *

*फेस्टची सांगता झाली! *

☆

टीप: व्यक्त केल्या गेलेल्या विचारांशी / मतांशी संपादक-मंडळ सहमत असेलच असे नाही..

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – pradnyavartak3@gmail.com

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – मराठी कविता ☆ कवितेच्या प्रदेशात # ३०४ ☆ समता… ☆ सुश्री प्रभा सोनवणे ☆

By Hemant BawankarNo Comments

सुश्री प्रभा सोनवणे

? कवितेच्या प्रदेशात # ३०४ ?

☆ समता… ☆ सुश्री प्रभा सोनवणे ☆

(एक मुक्तछंद कविता)

☆

भारतीय आहोत सारे धर्म असो वेगळे,

सर्व धर्म समभाव येथे, एक आपली पाळेमुळे !

*

रमजान,नाताळ अन् दिवाळी, सण करु साजरे ,

 आहेत एकमेकांवरी आपले प्रेमभाव निर्व्याज रे!

*

भारत आपला देश आहे वेगळा अन् चांगला,

राम, रहीम, रॉबीन येथे नेहमी मैत्रभावे वागला!

*

प्रेम नांदो या इथे, जाती ,धर्म या भिंती नको

एकता, समता, समभाव येथे ईश्वर राखो !

*

शांती असावी सर्वदा, आपण मानवता मानतो,

प्रेमभावाचाच आपला इतिहास येथे गाजतो

☆

© प्रभा सोनवणे

संपर्क – “सोनवणे हाऊस”, ३४८ सोमवार

पेठ, पंधरा ऑगस्ट चौक, विश्वेश्वर बँकेसमोर, पुणे 411011

मोबाईल-९२७०७२९५०३,  email- sonawane.prabha@gmail.com

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ आला वसंत सोहळा… ☆ सौ.वनिता संभाजी जांगळे ☆

By Hemant BawankarNo Comments

सौ.वनिता संभाजी जांगळे

?  कवितेचा उत्सव ?

☆ आला वसंत सोहळा… ☆ सौ. वनिता संभाजी जांगळे ☆

☆

आला वसंत सोहळा

देठ पानास कोवळा

सोनपालवी आडानं

गोड गाते ती कोकिळा

 *

नाविण्याचा हा आनंद

धरा सजण्यात धुंद

मंदावलेला समिर

जाये लुटूनिया गंध

                *              

रंग हिरवा पानात

भाव कोवळा मनात

रानी फुलतो बहावा 

गंधाळूनी आसमंत

 *

रास पिकल्या पानाची

वारा नेतोया  लूटून

जुनाट त्या आठवांची

कर मना बोळवण

 *

सरं आता पानगळ 

उन चौफेर पिवळं 

कुहूकुहू ताल धरी 

किती सुरेल ते बोल

 *

रानीवनी पळसाला

रंग केशरी चढला

किलबिल पाखरानी

सोनआनंद वाटला

☆

© सौ.वनिता संभाजी जांगळे (घागरे)

जांभुळवाडी-पेठ, ता. – वाळवा, जिल्हा – सांगली

संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ श्री अशोक भांबुरे जी यांची कविता अभिव्यक्ती #३१९ ☆ षड्रिपूंची होळी… ☆ श्री अशोक श्रीपाद भांबुरे ☆

By Hemant BawankarNo Comments

श्री अशोक श्रीपाद भांबुरे

 

? अशोक भांबुरे जी यांची कविता अभिव्यक्ती # ३१९ ?

☆ षड्रिपूंची होळी… ☆ श्री अशोक श्रीपाद भांबुरे ☆

☆

लाकडाची वाटतो हा देह मोळी

जाळणारच षड्रिपूंची आज होळी

 *

अर्पिला नैवेद्य मी होळीस आणिक

माय माझी वाढते बघ तूप पोळी

 *

डोस थोडा वाढवावा लागणारच

टाळता ही येत नाही रोज गोळी

 *

राख फासत एकमेकाला उद्याला

गावभर फिरणार आहे मस्त टोळी

 *

रंग होता लावण्याचा बेत माझा

अन् तिने तर घातलेली शुभ्र चोळी

 *

हो तिलाही शौक आहे रंगण्याचा

शोधते संधी अशी ती नार भोळी

 *

रंग इतका फेक माझ्यावर सख्या तू

त्याच रंगाने भरावी पूर्ण झोळी

☆

 © अशोक श्रीपाद भांबुरे

धनकवडी, पुणे ४११ ०४३.

ashokbhambure123@gmail.com

मो. ८१८००४२५०६, ९८२२८८२०२८

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares