सौ. ज्योती कुळकर्णी
कवितेचा उत्सव
☆ जीवन… ☆ सौ. ज्योती कुळकर्णी ☆
☆
दुज्या कुणाच्या ओंजळीतुनी तहान भागत नाही
मरणा आधी स्वर्ग कुणाला कधीच दिसत नाही
*
सुरकुतलेल्या चेहेऱ्याचा तू चिंतातुर दिसतो
हसले नाही तर जगण्याला येणे रंगत नाही
*
लाटांवरती स्वार होउनी कवेत घे तू वादळ
अनुभवाविना संसाराची खोली समजत नाही
*
पारखून घे आसपासचे सखे सोबती सगळे
मधुमेहाला गोड बोलणे सुद्धा चालत नाही
*
प्रसाद खाण्या पाखंडी पण कुणी मंदिरी येती
किर्तनाविना भक्तांची तर पंगत रंगत नाही
*
पुस्तकातले ज्ञान पाजळू नकोस येथे काही
जीवनातले ठेच लागणे ‘वाचून’ कळत नाही
*
दंतविहिन पण असा कसा हो हिरवा हिरवा आहे
वय झाले पण जगण्याची तो आशा सोडत नाही
☆
© सौ. ज्योती कुळकर्णी
अकोला
मोबा. नं. ९८२२१०९६२४
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
ब्रम्हानंदी ऐसी लागली टाळी 
काव्यानंद 
