Marathi Kavita
शुभदा भास्कर कुलकर्णी (विभावरी)
चित्रकाव्य
– आनंद वारी… – शुभदा भास्कर कुलकर्णी (विभावरी) ☆
☆
पाऊले चालली
पालखी संगती
ज्ञानोबा माऊली
मुखे नाम घेती
*
आनंदाचा कंद
हरी नाम छंद
सारे वारकरी
नाचले ही धुंद..
*
असूनी संसारी
केले पुण्य भारी
म्हणूनी घडली
आनंदाची वारी..
☆
कवयित्री : शुभदा भा. कुलकर्णी (विभावरी)
कोथरूड – पुणे, मो.९५९५५५७९०८
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री सुहास रघुनाथ पंडित
कवितेचा उत्सव
☆ हा किती बरसे घन... ☆ श्री सुहास रघुनाथ पंडित ☆
☆
रान ओले पान ओले ओलावले माझे मन
हा किती बरसे घन
*
पावसाच्या या ऋतूला पंख फुटले पोपटी
तापलेल्या या धरेला प्रेम हस्ते थोपटी
मांडलेला हा पसारा घेई अवघा व्यापून
हा किती बरसे घन
*
चित्र हे नयनांपुढे आज रंगांनी खुले
आसमंतातील गंधाने पहा हे मन भूले
श्याम रंगी मेघ बरसे चुंबूनी माझे मन
हा किती बरसे घन
*
जीवनाचा स्पर्श होता जीवनाचा अर्थ उमगे
अंकुराचे रोप होता एक आशा पालवे
काल नव्हते चैतन्य जे ते आज आले कोठून
हा किती बरसे घन
☆
© श्री सुहास रघुनाथ पंडित
सांगली (महाराष्ट्र)
मो – 9421225491
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कविराज विजय यशवंत सातपुते
कवितेचा उत्सव # ३०३ – विजय साहित्य
☆ नातं मैत्रीचं…! ☆ कविराज विजय यशवंत सातपुते ☆
☆
शब्द पडतात फिके
मैत्री काळजाची सर
तिच्या वर्णनात जाई
भरूनीया प्रेम घर…! १
*
भेट असो रोज तरी
नाही भागत तहान
नातं मैत्रीचे देतसे
सुख दुःख वरदान…! २
*
मैत्री कर्तृत्वाचा झरा
मैत्री राग लोभ मोह
काळजात दडलेला
मैत्री भावनांचा डोह…! ३
*
मैत्री मंदिराचा पाया
“मैत्र” प्रासादिक नाते
असो नर किंवा नारी
दळी गुणदोष जाते…! ४
*
मान अपमाना नसे
मनी तिळमात्र जागा
नातं मैत्रीचे आगळे
एक स्नेहांकित धागा…! ५
*
अर्धा कप चहासाठी
मैत्री भांडणाचा पूर
दिठी आणि मिठीतून
लावी जीवा हुर हुर..! ६
*
मनातलं बोलताना
जपे गुपितांचा ठेवा
“मैत्री” शब्दातीत नाते
नाही ईर्षा नाही हेवा…! ७
*
“मित्र” आधाराचा हात
“मैत्री” आयुष्याचे रूप
बंधनांच्या पलीकडे
जळे जीवनाचा धूप…! ८
*
हवी मैत्री पदोपदी
आयुष्याच्या प्रवासात
कधी “ओवी” कधी “शिवी”
अंतरीच्या आरश्यात…! ९
*
मैत्री कधी मोबाईल
कधी फेसबुक नोट
नातं मैत्रीचं लाघवी
नको अंतरात खोट…! १०
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
ज्योत्स्ना तानवडे
कवितेचा उत्सव
☆ मृद्गंध ☆ सौ.ज्योत्स्ना तानवडे ☆
☆
सागर घनदाट मेघांचा उचंबळतो अंबरी
अतीव इच्छा त्यातुनी याव्या सरी वरती सरी ||
*
काळ्या करड्या फिकट पारव्या मेघांच्या या लाटा
झाडांमधुनी जणू शोधतो वारा चोर वाटा ||
*
भिरभिर वारा पानांमधुनी छेडीतसे धून
क्षणात येते मळभ वेढुनी गायब होते ऊन ||
*
ऊन काहिली सोसेना तगमग हो जीवाची
तहानलेली सृष्टी पाहे वाटुली पावसाची ||
*
वृक्ष डोलती सळसळ पाने वारा धावत आला
सोबत घेऊनी मृद्गंधा सांगावा देता झाला ||
*
अंगे भिजली मने मोहरली थेंब आले आले
जलधारांनी सचैल सारे चिंब चिंब मन झाले ||
*
मृद्गंधाने धुंदी येई जलधारांनी तृप्ती
विश्व व्यापुनी अभंग राहे नभ मातीची संतृप्ती ||
*
(संतृप्ती म्हणजे संपूर्ण समाधान)
☆
© सौ.ज्योत्स्ना तानवडे
वारजे, पुणे.५८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
प्रतिमा रवींद्र कुलकर्णी
कवितेचा उत्सव
☆ पाऊस असा घनगर्द ☆ प्रतिमा रवींद्र कुलकर्णी ☆
☆
पाऊस असा घनगर्द बरसतो
रातही काजळकाळी
का गीत असे ओठात माझीया
असल्या भलत्या वेळी?
ते रुप पाहण्या नयने आसावली
मनमयूर नाचे वेडावून गोकुळी
मधुसूर बासरी करते मोहक खेळी
मन गंध-धुंद, कानात गुंजती,
आज सख्याच्या ओळी…
घनव्याकूळ भेटी घडल्या कातरवेळी
अन तरंग उठती श्यामल यमुनाजळी
गारुड करीतसे अजुनी तो वनमाळी
का नीज नसे डोळ्यात?
जाळते रात, अशी काजळी…
☆
© प्रतिमा रवींद्र कुलकर्णी
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री प्रमोद वामन वर्तक
चित्रकाव्य
स्त्री हट्ट! श्री प्रमोद वामन वर्तक ☆
☆
हट्ट कसा करायचा ते
बायकांनाच कळतं,
पक्षी काय मानव काय
यात त्यांचंच फावतं!
*
पंख पसरला उन्हात
थंड ठेवण्या डोके प्रियेचे,
रग लागली पंखाला
सांगू कसं आता वाचे?
*
जरी धरे छत्र प्रियेवरी
राग पहा नयनातला,
समस्त नवऱ्यांना कळावा
भाव त्याच्या मनातला!
भाव त्याच्या मनातला!
☆
© प्रमोद वामन वर्तक
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610
मो – 9892561086 ई-मेल – pradnyavartak3@gmail.com
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
डॉ. स्वाती पाटील
चित्रकाव्य
– सृजनानंद – ☆ डॉ. स्वाती पाटील ☆
☆
ओढ म्हणू की आनंदाची शिरशिरी
अंगातून वाहते तरंगाची थरथरी
हसले उन्हात चांदणे या वनांमध्ये
लेऊन रंगांची रंगबिरंगी मखमल सुंदरी
*
थुई थुई नाचतो झुकतो थोडा पुढे
कळेना राणी मज शोधू तुला मी कुठे
ओढ दाटली मिलनाची तुझ्या ग सखे
बरसतो मनी मल्हार का कोडे अता सुटे
*
हा संभार नाही केवळ मिलनाचा गडे
निळे निळे लक्ष डोळे तुझ्या वाटेकडे
येशील कधी पाहतो वाट आसमंत हा
मागेन आता हे सृजन सडे मी नभाकडे
☆
© डॉ.स्वाती पाटील
सांगली
मो. 9503628150
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री सुनील देशपांडे
कवितेचा उत्सव
☆ “पावसात भिजायचं…” ☆ श्री सुनील देशपांडे ☆
☆
पावसात भिजायचं
मातीत रुजायचं
आभाळी भिडायचं
*
स्वप्न पहायचं
पावसात भिजायचं
थंडीत थिजायचं
मनात पहायचं
*
कवितेत हसायचं
पावसात भिजायचं
स्मृतीत रमायचं
गेलेल्या दिसांचं
*
चित्र स्मरायचं
पावसात भिजजायचं
आजारी पडायचं
देणं डाॕक्टरचं
*
देऊन टाकायचं
पावसात भिजायचं
घरात शिरायचं
भजी अन् चहाचं
जमवून आणायचं
☆
© श्री सुनील देशपांडे
email : sunil68deshpande@outlook.com
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
वनिता संभाजी जांगळे
कवितेचा उत्सव
☆ आषाढ सरी… ☆ वनिता संभाजी जांगळे ☆
☆
ओल्या सरी संगतीनं
वाहू लागला रानगंध
ओसरती आषाढ सरी
रानं पसरती हिरवे पंख
*
ढग डोंगरावर लोंबतो
ओला गारवा झोंबतो
यक्ष पत्नीच्या शोधात
वेडा मेघदूत धावतो
*
लाल कौलारू छप्पर
गळू लागली वळचण
हिरव्या डोंगराच्या कुशीत
खेडी जातात सुखावून
*
कोवळा जीव कुरवाळीत
शीळ घालतो रानवारा
चिंब सरींचा शिडकाव
आषाढ पावसाच्या धारा
*
फुटं कातळाला पाझर
आबादानी झाली रानं
आंबल्या-चिंबल्या जीवाला
सुखावतो आषाढघन
☆
© वनिता संभाजी जांगळे (घागरे)
जांभुळवाडी-पेठ, ता. – वाळवा, जिल्हा – सांगली
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
रेणुका धनंजय मार्डीकर
चित्रकाव्य
महिधात्रिकेची फुले… रेणुका धनंजय मार्डीकर ☆
भावगीत (वर्ण संख्या १२ यति ६ व्या अक्षरावर)
☆
पानांच्या छत्रीत लावण्यात न्हाली
महिधात्रिकेची फुले इवलाली ||ध्रु||
*
किती बाई याचे रूपडे देखणे
पाचूच्या मण्याचे सरित गुंफणे
नाजूक साजूक दिसे भुईवाली
महिधात्रिकेची फुले इवलाली ||१||
*
हिरव्या रंगात पांढरी पाकळी
भुईला पाहण्या बघाना वाकली
कधी मुंडावळी तोरणाची जाळी
महिधात्रिकेची फुले इवलाली ||२||
*
लोधर म्हणती, भुईन आमला
मनाला भावला शब्दात गुंफला
औषधी खजिना आहे भोम्यामाली
महिधात्रिकेची फुले इवलाली ||३||
*
रानभाजी खाती भुई आवळ्याची
दगड फोड्या हा आहे याची ख्याती
देखणे लोलक पाचुची झळाळी
महिधात्रिकेची फुले इवलाली ||४||
☆
© रेणुका धनंजय मार्डीकर
औसा.
मोबा. नं. ८८५५९१७९१८
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
