श्री शरद कुलकर्णी
कवितेचा उत्सव
☆ असा पाऊस पडावा… ☆ श्री शरद कुलकर्णी ☆
☆
आली झुळुक सुखाची
पावसाच्या संकेताची.
गेले सुखावून वृक्ष
आशा चैत्रपालवीची.
*
पावसाच्या निरोपाचा
गेला सुखमयी वारा.
किती दिसांनी मयूराचा
आज फुलला पिसारा.
*
नको बोलवू पक्षांना
साद घालून आकाशी.
अंतर्यामी त्यांचे आहे
नाते गोडगूढ वृक्षांशी.
*
आता फक्त निसर्गाचा
रम्य नजारा साठव.
पावसाच्या आनंदाचा
उस्फूर्त हा उत्सव.
*
सृजनाचा निर्मितीचा नव्या
असा पाऊस पडावा.
निराकार स्वरुपाचा जसा
साक्षात्कारच घडावा.
☆
© श्री शरद कुलकर्णी
मिरज
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
अध्यात्माचे शाश्वत धन! 
॥ अंतर्बोध ॥
